「又再」京、阪賞櫻行

記得上年311後，好唔捨得咁取消咗京都賞櫻之行，轉眼一年過去，雖然有啲災區重等緊重建，但日本大部份嘅地方都已經回復正常，而且我選擇嘅關西亦未受311嘅影響，所以擱置咗一年嘅賞櫻之行喺今年嘅年頭已經喺腦海又再浮現。

由於北海道同關西地帶未受311影響，所以這兩個地方都係而家比較多人到訪嘅地方，再加上四月係櫻花季節，所以都不敢怠慢，喺一月中已經聯絡Agent hold機位，同埋自己上網訂京都及有馬酒店。 今次係三人行 - 媽咪、細妹 + 自己。

 

喺京都駅附近有幾間心水酒店，喺一月至二月間, 酒店或 Jalan.net 都不斷調整房價，當中有升有跌，最後落實嘅酒店都係喺07年到訪京都時已經住過嘅Apa Hotel堀川通，揀佢除咗因為佢價錢比其他酒店平之外，佢頂樓有個大浴場亦係最大吸引我嘅原因。

雖然我已經去過有馬溫泉，但由於媽咪未去過關西，所以我都想帶佢去哩個日本三古湯之一嘅有馬溫泉浸一浸，今次就揀咗奥之坊，佢比較近有馬溫泉駅，同埋價錢亦係同區中最平嘅一間，選擇無浴室同洗手間，每人房租可以再減2000円。

最後大阪酒店係套票包，本想住Cross Hotel，但二月國泰假期並無哩間酒店可以揀， 最後又係揀返07年住過嘅難波東方酒店 (Namba Oriental Hotel) ，住生不如住熟嘛！而且佢嘅位置喺千日前內，無論去心齋橋、道頓堀或出關西機場都好方便啊！

由於今次嘅行程基本上係上年已plan好，所以只須要喺網絡中update一吓交通資料就可以，不過喺過程中，見到好多台灣嘅背包客到訪一啲比較少遊客去嘅地方，其中睇到京都嘅山科疏水道喺春天季節水道兩旁會開滿櫻花同油菜花，個畫面真係好靚，所以就改一改行程，將哩個咁靚嘅地方加入咗去，希望到時我都可以睇到咁靚嘅場面，返嚟同大家分享啊！

除此之外，我重見到啲背包客好多都好有心機自製一本度身嘅旅遊手冊，原本自己都已經好粗糙咁準備咗一本，但見佢哋個個都整得好精美，而今次我準備資料嘅時間充裕(因為好多資料上年已做好)，所以都忍唔住整理一下資料做返一本。原來自己都幾享受製造嘅過程，當手冊做起嘅時候好似已經將自己嘅行程預演咗一次，好有滿足感啊！

 簡單粗糙的旅遊手冊

為自己度身製造的旅遊手冊

以下兩條link可以參考到Anita及 A*I Style嘅旅遊手冊製作。 而我自己嗰本下一篇先post吧！不過無佢哋做得咁好啊！失禮晒！
http://anita225.pixnet.net/blog/post/26260842
http://aistyle.pixnet.net/blog/post/29589298