最後倒數 ~ 2015' 東京近郊八天行

哈 ... 哈 ！！重有一星期就出發，心情開始興奮加期待。

預計八天行程
Day 1： 香港 → 成田空港 → 新宿  → 下北沢 → 新宿
Day 2：新宿 → 三鷹の森ジブリ美術館 → 吉祥寺  → 新宿
Day 3：新宿 → 河口湖
Day 4：河口湖 → 新宿→ 上野
Day 5：上野 → 輕井澤
Day 6： 輕井澤 → 上野
Day 7：上野 → 築地市場 → 淺草雷門 → 晴空塔 → 上野
Day 8：上野 → 成田空港 → 香港

今次行程最期待其中一個項目係三鷹の森ジブリ美術館 ，一向醉心宮奇峻嘅卡通，尤其龍貓睇咗都有過百次，所以一直好希望到此館一趟。本想到步之後先到Lawson買票(1,000円)，睇咗網路上買票教學(林氐壁中有一個唔錯嘅教學)，但我自己覺得都幾複雜，而且有限人次入場，到時未必買到心水日期及時間，咁樣會對我安排行程時有點障礙，所以我先在日航天地購票(HKD115)，雖然要比多幾十蚊，但確保心水日期可以入場。

去完三鷹後，當然要到隔離嘅吉祥寺，吉祥寺係近年來東京人認為係"最想居住嘅地方"。近期亦見好多旅遊雜誌推廣哩個地方，而且哩到亦係購買藥品嘅好地方，因為價錢比新宿同上野都要平，到時一定會喺到大出血呀！

行程裡面有四日係離開東京市區到郊區走走，首先會到富士山河口湖，前文講過，多年前曾到訪山中湖及箱根，但兩次都無緣與富士山一見，今次會入住富士吟景酒店，酒店其中一個賣點係可以喺酒店房來欣賞「逆富士」，我唔貪心，比我一睹富士山已經好滿足啦！

另外一個郊區係輕井澤，我第一次自遊行就到東京，亦到訪過輕井澤，覺得哩個地方真係好舒服，好值得再次到訪，大笨蛋又未去過，所以同佢走一趟，而且可以去我上次去唔到嘅白系瀑布。

築地市場亦係到訪東京必去嘅地方，市場多年來都傳聞將會遷拆，大笨蛋一直想到此一遊，不過就唔打算去排隊食「人龍」壽司，到時睇吓邊間唔使排就去邊間啦！

雷門寺亦係大笨蛋一直想再去一次嘅地方，哩個係佢嘅情與結，當年跟團到此景點，佢好鐘意哩個地方，但由於時間關係，未能令佢盡興，所以佢一直想再到訪哩個地方。

最後晴空塔係近年東京新景點，所以都要到此一遊吧！

旅程中對我最重要嘅緊係要有本自家旅遊手冊啦！今次都唔會例外啦！一切準備好，希望到時可以天氣好，睇到靚靚風景啊！有朋友而家喺東京，話啲櫻花開始開啦！好運的話重可以睇到靚靚櫻花，想吓都開心啊！