Day 8 @ 黑門市場、関西空港

2014年5月25日 晴天
10:04~10:06 | 大阪市営地下鉄御堂筋線(普通) 天王寺行 | 心斎橋 → なんば
14:30~15:07 | ラピートβ47号 関西空港行 | 難波 → 関西空港
(交通收費及詳細資料請往交通篇)

嚟到行程最後一日嘞！心情好複雜，通常旅程嘅尾聲都係好唔捨得，但另一方面又覺得終於可以返香港真好啊！

食完早餐拾整嘢後就拖埋行李坐地鉄去難波，先去南海車駅寄存行李，前幾日返難波嘅時候已經搵好存物櫃位置，二樓同三樓都有存物櫃，我揀二樓，因為可以放大行李嘅存物櫃數量多啲。 (可以用哩條連結查到日本邊到有存物櫃 ： http://coinlockersearch.com/ )

存物櫃位置就係花店隔離

最大嘅存物櫃可以放兩個24吋喼呀！

如果唔夠Coins，可以行到走廊最尾轉彎就有個counter可以換硬幣。

放好晒行李後就向黑門市場進發。 哩間日本一嚟咗幾次都食唔到，諗住今次嚟食都係無機會。下次嚟一定要喺哩到食一餐。

一條大直路行兩個幾字就到嘞！

由於哩日係星期日，所以好多店舖都休息。

哩間100円店都好啱我哋行，大家都有啲收獲。

哩間黑門三平好出名食魚生。又平又新鮮。

千成屋亦係好受歡迎嘅生果店

因為前一日買嘅士多啤利太酸，所以見到都唔敢再買啊！

見到好罕有嘅白色士多啤利，我知唔係成日有得賣，但2980円一盒真係覺得有啲貴，爭札咗好耐都係決定唔買，不過返咗嚟香港又覺得有啲後悔添！

哩間大福店嘅大福好好味咖！上次嚟買過嚟食咖啦！買盒出機場食先！

今次嚟黑門市場覺得多咗好多哩啲即買即食嘅店舖。

行過見到哩間賣肉店，佢有個鐵板放喺到幫客人即買即燒。

我哋因為食神戶牛計劃泡湯，所以就喺哩到補返數啦！

揀咗兩塊，3068円

入口即溶，真係好好味啊！

跟住買咗半個蜜瓜喺市場內嘅無料休息案內所到食，嗰到有枱、有櫈，有洗手盆，旁邊有洗手間，真係可以喺到四周圍買咗食物然後坐喺哩到慢慢嘆呀！下次嚟一於喺到咁食返餐。

我因為諗住同佢哋去一蘭食哩個行程最後一餐，所以就唔喺哩到食咁多嘢啦！

食飯時間，一蘭要排十幾人先到，重要三開三組人坐。

唔知係咪心情影響呢！總覺得哩碗麵無以前咁好食啊！

食飽就慢慢咁行返車駅攞返行李準備離開啊！哩間舖頭時時都咁多人啊！

喺二樓售票處買好票就入閘

順利上咗車，哩班車好多強國人喺我哋後面，好嘈、好煩，啲小朋友不斷咁走嚟走去，大有大嘈，細有細叫，好彩只係半個鐘車程咋！

到咗機場先去寄行李，五個喼都係79.3kg咋！

跟住喺商店行咗陣就過關去候機室。

飛機都到咗啦！

食個大福先！

成粒士多啤利包喺大福裡面。

準時上機起飛，食個普普通通嘅飛機餐，瞓個覺就到埗。

「愉快」旅程終於完畢，哩一刻感覺鬆晒，可以安全將人哋亞媽帶返嚟交返比佢哋啊！

今次旅程對於我自己嚟講玩少咗想玩嘅嘢、睇少咗想睇嘅嘢、食少咗想食嘅嘢、去少咗想去嘅地方，雖然喺我做足準備，但仍然出現小問題同小爭拗，始終人多就會意見多，但總結三寶都玩得開心，多年嚟要同佢哋嚟一次自遊行嘅心願亦了結咗，我都心滿意足啦！ 至於重會唔會有第二次.......暫時...短期內....都唔會再有咁嘅諗法住囉！

......完