09'新加坡遊-第一日(下)

喺Merlion Park(魚尾獅公園)對面就係Fullerton Hotel(浮爾頓酒店)，酒店大樓建於1928年，原為郵政總局。2001年郵局搬遷，原址被規劃成The Fullerton Hotel。具歷史價值嘅大樓同部份內部物品都得以保留啊！令到我哋哩啲遊客又多一個旅遊景點嘞！不過我冇入去參觀，只係同佢影咗張相咋！

影咗一陣相我哋就沿住路牌行過去老巴刹嘞！

但其實星加坡啲路牌指示都幾混亂，好多街名地圖搵唔到，到地圖有嘅又搵唔到條街，往往要兩張唔同嘅地圖夾一夾先知自己喺邊。

Raffles Place哩頭好多新樓起緊，所以好多地盤，又圍咗好多圍板，所以搵路真係有啲困難呀！

哩度係Raffles Place嘅MRT站，幾靚啊！其實老巴刹就喺附近，但啲路牌實在太混亂，所以我哋越行越遠。

後來見到亞坤咖央間舖頭先知我哋原來行咗去牛車水嗰區啊！

雖然行錯路，但沿途見到啲得意嘢又去行吓影吓相先！

牛車水內嘅遠果廣場，哩個廣場榮獲建築經典特賞。以中國陰陽五行為槪念，街道四邊設立以金、木、水、火命名嘅大門，廣告中間庭園則屬土。政府保留歷史建築時亦同時加入咗現代化嘅設施。哩到有博物館同餐廳咖！

哩間就喺廣場內嘅褔德祠，裡面放咗好多中國人傳統嘅用品。

重有啲好得意嘅模型講述華人早期喺新加坡嘅生活。

由於我哋一邊搵路，一邊八卦咁四周圍睇嘢，所以最後我哋用咗個幾鐘先成功去到老巴刹。

老巴剎建於建於1894年，係國家歷史遺址，喺東南亞中，佢係現存最大型喺維多利亞時期鑄鐵建築。佢本來係菜市場，改建後就成為飲食中心，場內有好多種不同嘅本地食品，包括拉茶、沙爹同海鮮等，加上哩到食物都價錢實惠，所以吸引不少食客專程到此。

六點半到達咗沙嗲街，啲檔口啱啱開工，我哋一行入去條街，已經被人重重包圍，不斷叫你去佢嘅檔口幫襯。

 

最後我哋簡咗一檔有得食燒魔鬼魚，另外再叫咗十串雞同牛嘅沙嗲串燒。

燒魔魚 SGD10.00

沙爹串燒(雞、牛10串) SGD6.00

天氣實在太熱，再加上燒烤嘅熱氣，雖然咳緊亦不得不買啲凍嘢飲吓呀！我見庶汁好吸引，所以要咗杯庶汁，但佢哋加好多冰，所以飲落有啲淡。大笨蛋就飲菊花茶。

菊花茶 SGD1.50 / 庶汁 SGD1.70

食食吓覺得啲蝦都好似好正，所以都叫咗兩串試吓，味道都唔錯啦！

燒大蝦 SGD2.00/串

食飽飽都八點鐘，跟住我哋就去Raffles Place站搭MRT去Clarke Quay克拉碼頭影夜影。

搭哩個MRT都幾煩，買票時要比多SGD1做訂金，即車資SGD1.20，咁買票時要比SGD2.20，當到步出閘後再去售票機退返張票然後再攞返嗰SGD1訂金。 看似簡單，但多人起上嚟，吓吓要排隊退票，重要啲售票機嘅動作係龜速咖！真係會等到呆咗呀！

由Raffles Place去Clarke Quey係須要喺Douby Ghaut轉車，哩個轉車站好大呀！足足行咗兩個字先去到另一月台轉車，好似我哋由中環嘅月台行去搭東涌線咁遠呀！所以之後嘅行程都好驚喺哩個站轉車啊！後來發覺原來旅遊書話由Raffles Place行過去克拉碼頭都只係3分鐘咋！咁我哋做咩走去搭MRT重行餐死呀﹖！蠢咗添！

出咗Clarke Quay，又迷茫咗一輪，因為出到地面之後又搵唔到清晰嘅路牌，我哋就憑大槪環境估計方向，好快就到咗Boat Quay，河邊兩旁有好多餐廳，佢哋啲五顏六色嘅燈照到條Singapore River好靚呀！亦有好多戀人坐喺河邊談心啊！哎啊！好浪漫啊！點解我隔離嗰個係大笨蛋呀﹖﹖

哩間係珍寶海鮮舫，唔知同香港嗰間有冇關係呢﹖右邊中間有幾粉紅嘅物體係有啲人喺到放啲會發光嘅風箏呀！現場睇係有好多顏色咖！

我企喺條North Bridge上影過去條河真係好靚啊！

哩幾條金屬柱其實係一個機動遊戲 - GX-5加G-MAX 即係跳樓機加韆鞦。所以喺河邊不時聽到有人喺到衣嘩鬼叫呀

影完相係時間返去啦！打開地圖研究咗一輪，返去條路都只係一條大正路，所以最後決定行返去酒店，咁就唔使再喺個MRT站內行嚟行去呀！

半個鐘到就順利返到酒店，完成咗第一日嘅旅程，雖然唔係去咗好多地方，但都好倦啦！而且哩間酒店嘅Internet係要收錢咖，所以我哋帶咗netbook去都冇用，十一點幾沖咗涼就瞓啦！

今日使費

車資 MRT (Dhoby Ghaut àClarke Quay) : SGD1.20 x 2

晚餐: SGD23.20

飲品: 薏米水一罐 SGD1.25

          苹果茶一罐 SGD1.25

手信: SGD35.00