09'新加坡遊-第二日(下)

行咗牛車水大部份景點都係時候食晏，揭吓旅遊書後就諗住去瑞記(家嫂)魚頭米粉，因為書中介紹我哋想食嘅胡椒蟹呀！睇地圖好近，但我哋又埳入迷茫中啦！

其實由印度廟行過去真係好近，但哩區太多地盤，四周圍晒板擋住啲路令到我哋行咗好多冤枉路。

行行吓又行咗去遠東廣場，噚日嚟係夜景，今日嚟個日景先！

廣場內有個幾得意嘅銅像

終於都嚟到瑞記(家嫂)魚頭米粉，午飯時間都好多人，坐滿晒啊！哩間舖頭開業至今已經70年，有好多香港明星都嚟幫襯咖！我見裡面有好多老闆都明星嘅合照 - 羅文、劉德華、張學友....

一心嚟食胡椒蟹，但舖頭啲姐姐話食蟹要早一日訂咖！吓！即係冇得食...！咁姐姐介紹我哋食麥片蝦，咁就試吓啦！另外就緊係食哩到嘅招牌菜 - 魚湯魚片米線啦！

哩個麥片蝦好好食呀！啲蝦好爽甜，加埋啲炸咗嘅麥片一齊食好香口呀！有少少辣好野味呀！當時已經唔記得咗自己喉嚨痛同咳緊呀！

哩個魚片米線都好好味，個份量都幾多啊！

哩餐都算豪啦！一共食咗 SGD37.25。但真係好好味啊！如果下次有機會再嚟一定要試吓隻胡椒蟹先！

下一站去邊呢? 買咗啲豬肉乾好重啊！都係返酒店放底啲嘢先！因為食得太飽啦！所以最後決定行返去酒店，可以當做吓運動呀！不過今次條路線都幾遠咖！

哩輪巴士就係星航提供嘅觀光巴士呀！我哋最後都係冇坐過呀！佢嘅班次好疏落，我喺哩三日只係喺條街見過佢兩次咋！

又行返去噚日影夜景嘅範圍(Clarke Quqy)，日景又另一番感覺啊！

彩色嗰座係政府大樓，外牆由911扇不同顏色嘅窗戶組成)，裡面係新加玻嘅新聞通訊及藝術部，攞放咗當地同埋亞洲各國藝術品。

哈~哈！哩到都有條香港街呀！

其實中午時份真係幾熱，但沿途都好多嘢睇，好多旅遊書嘅景點都一一出現啊！而且一真都有樹蔭同騎樓底遮陰，所以都算行得好舒服啊！

最高法大廈 (Old Supreme Court)

聖安德烈教堂 (St Andrew's Catherdral)

Raffles City Shopping Centre，內有新加坡著名百貨公司Robinsons 同埋 Marks & Spencer

不經不覺行咗大槪九個字，三點鐘就返到酒店，因為全身濕透又有啲倦，所以大家沖個涼就瞓返個晏覺先，四點半先再出發努力過。

今次目標喺去行商場呀！唔使講緊係又係行過去啦！哩次easy job啦！

幾個字就去到啦！不過始終行商場都唔係我同大笨蛋嘅興趣，所以就去咗家樂福(Carrefour)買嘢食啊！

哩到啲益力多好多顏色呀！

買完嘢食就出咗去地面嘅公園到坐吓！無意中又發現一個景點，全球最大嘅噴泉 - 財富之泉，一個直徑21米嘅青銅巨環同埋中間嘅清泉，氣勢澎湃，係1998年健力士世界紀錄大全中全球最大型嘅噴泉，設計有財源滾滾嘅意味，所以取名「財富之泉」。

走嚟走去影咗輪相，有啲倦呀！於是就坐喺樹下休息一陣，食吓頭先喺家樂福買嘅嘢食。

抖夠就行返去酒店附近食晚飯，喺商場經過一間寵物店，見到哩啲比狗仔著嘅玩意，唔知啲狗仔著咗重企唔企得穩呢?

新加坡放工時間繁忙嘅街道！

好似灣仔呀！

今晚嘅目標係逸群海南雞飯，「逸群」係新加坡海南雞飯嘅始祖，1940年創業，餐館裝潢充滿懷舊嘅味道，60年不變。

哩間舖頭真係好多人呀！我哋要等一陣先有位啊！

我哋叫咗一人份量嘅海南雞飯，啲雞真係好滑，啲雞油飯亦都好好食啊！

另外我哋都叫咗一碟鎮店之寶 - 燒肉，都幾好食啊！

食飽後，我哋去武吉士(Bugis)行夜市，途經啲火煱店，好奇怪，成廿幾三十度冇冷氣，但點解咁多人喺到打邊爐，重要係四川麻辣火煱，我行過都感覺到嗰陣熱氣呀！

今日係星期五，四周圍都好多人啊！

好快嚟到白沙浮廣場(Bugis Junction)，商場內人頭湧湧，我哋冇迫入去啊！

跟住行咗去隔離嘅星洲女人街(Bugis Street)，哩到有超過600間店舖，係新加坡最大型嘅街頭購物中心。裡面重有好多記念品比牛車水嘅精緻，但相對價錢亦比較貴啲。

今日都真係行咗好多路，確實覺得好倦，所以行咗一陣買咗少少記念品就返酒店啦！

今日使費

車資 MRT (Dhoby Ghaut àHarbout Front) : SGD1.40 x 2

                 (Harbout Front àChina Town) : SGD1.40 x 2

早餐: 魚蛋粉 SGD3.50

          Toast Box SET SGD4.20

午餐: 瑞記 SGD37.25

晚餐: 逸群 SGD14.60

飲品: 薏米水 SGD1

         益力多 SGD2.85

手信: SGD79.80