巴黎、瑞士之夢想自遊行(第十三天)

09/07/2008(星期三)　天晴    琉森(Luzern) → 蘇黎世(Zurich)

今朝一早諗住落廚房煲整早餐食，但原來哩間不單只限煮食時間，如果係煮食時間以外會連廚房都鎖埋冇得用，我唯有用水喉開啲熱水用嚟沖杯奶茶就算嘞！雖然哩到啲水喉水係可以就咁飲，但都係有啲心理陰影所以一直以嚟都係煲水或買水飲，但哩次又費時攞個煲出嚟，於是就飲一次咁多啦！

食咗早餐準時七點半check out然後向蘇黎世出發

B女今朝拖住件行李都走出湖邊想搵鴨仔天鵝食早餐，但係唔知係咪佢哋未瞓醒呢！一隻都冇，咁唯有走啦！今次知訂啦！真係15分鐘去到火車站，好順利咁就上咗火車嘞！我哋今日係搭雙層火車呀！

好快九點已經可以落車啦！

咁我哋就去Information Center查吓明朝如果搭火車去聖莫里茲(St.Moritz)同埋提拉諾(Tirano)啲時間，因為哩到只係臨時改變行程而去，我完全無資料喺手，所以一定要check清楚啲時間。最後check到由蘇黎世去提拉諾有班快車7:00開要坐五個幾鐘，要訂位，即係好出名嘅貝尼納特快車(Bernina Express)，但係明朝班車full晒訂唔到，想再問其他個服務員都唔係好想答，人哋話日內瓦啲人冷莫，我覺得蘇黎世哩到啲人重cool。

咁唯有自己check電腦囉！嘩…如果唔搭快車要轉轉車成六個鐘先去到啊！抄晒啲時間今晚返去先再研究。

搵好方向就去Hostel嘞！今次哩間Hostel話只須十分鐘到，但攞住地圖都毫無頭緒，啲指示又好混亂，搵咗成半個鐘都無辦法搵到，啲石仔路又好難推件行李，於是我叫B女睇住行李，我同LH去搵。

終於搵到條街但又搵唔到要個號碼，見到個拉圾車嘅工人諗住佢會熟哩頭咪問吓佢啦！但佢都唔係好清楚，睇完一輪叫我等等，跟住有個男人立刻埋嚟問有冇嘢可以幫忙，我咪比個地圖佢睇，點知佢只係恐個頭埋嚟，我先擔高頭望吓佢，原來佢對眼好恐怖嫁！好淺色我可以喺佢等眼到見到自己個樣嫁！我突然諗起迷暈同黨呀…好驚即刻退後，佢即係好鬼秘咁叫NO…NO…！LH喺後面大叫走啦！但佢係咁抆住我張地圖我真係好驚！我好大力咁攞返張地圖然後退後，佢好沉把聲話 You are so cool…跟住頭先個拉圾車嘅工人喺間餐廳行返出嚟！嗰個男人先走咋！嚇死我啦！

原來拉圾車嘅工人走入餐廳搵個老闆問，餐廳老闆都走埋出嚟教我哋點行，原來落多兩條街就到啦！

哩間City Backpacker Hotel Biber個入口係喺橫街好隱秘，我諗住叫B女過嚟啦，但LH話入去睇吓咩環境先，唔睇由自可，一睇我就暈啦！四層樓梯，又窄又轉彎好似香港啲舊樓咁呀！點攞三個喼上嚟呀！

返去話比B女聽，佢話少事啦！無問題嘅！去到一個一個喼咁搬，搬到身水身汗先搬晒上去，嘩…真係攞我條命咁濟！

http://hk.myblog.yahoo.com/jw!xKRw0VmBGB4ShQv8ezyHYho1NuoRnw--/article?mid=2676

因為嚟到都好早，Hostel個職員都未走，佢重幫我哋做埋check in比埋房我哋，最後哩兩晚我哋都係住六人房。我哋間房重要上多層呀！

五樓望落街，四圍都係餐廳。

抖陣喺廚房食啲嘢先出去，哩到個廚房重簡陋，連杯都冇，等我要用香檳杯飲熱朱古力。

然後我哋就慢慢咁行返去車站，一嚟真係有啲倦，二嚟睇吓可唔可以發掘吓一條順啲嘅路。

哩啲電車係蘇黎世市內主要交通

今日車站有個市集，不過喺哩到買嘢係貴過超市，同一條腸超市CHF5.00，哩都要CHF6.00。

喺火車上三個人嘆咗兩條腸

我哋坐火車去夏夫郝善(Schaffhausen)然後搭1號巴士去睇萊茵瀑布(Rheinfall)

萊茵瀑布(Rheinfall)

萊茵河發源於瑞士中部，在瑞、奧、德三國邊境形成一個大湖，就是著名的波登湖，在SCHAFFHAUSEN遇上斷層形成的落差，就是萊茵瀑布，萊茵瀑布的落差並不大，約二十公尺左右，萊茵瀑布的美，不在於它的高度，而在於冰冷清澈的水，從高處衝下，激起壯觀白色的水花，形成一個碧綠色的水潭，波光粼粼、片片虹彩映照在瀑布之上，還有一座小小的島嶼在湖水中；河畔的露天咖啡座，許多遊客欣賞眼前美景，悠閒地品嚐著咖啡，對岸山上的古堡矗立，和諧的鑲在這幅美景間，讓人如同置身畫中。

但係喺相機真係影唔到佢嘅震撼

睇完瀑布就搭車返去蘇黎世，因為博物館唔使錢所以入去睇，但真係唔係好明啊！

博物館內嘅彩色玻璃窗

跟住就好隨意咁喺市內沿住利馬特河岸大道(Limmat)四圍行

聖母大教堂

Hostel樓下條街一入夜就好多人喺到食飯飲酒，所以都好嘈嫁！連我咁懶瞓都覺得嘈呀！

我哋今晚出街食，喺一間土耳其人開嘅餐廳食，B女同LH食泰式炒粉，我就食魚配沙津，都幾好味嫁！

食飽就返Hostel沖涼瞓覺，因為明朝要早起去搭車呀！但出面真係好嘈！好晏先瞓到啊!

食: 香腸2條: CHF11.00(CHF5.00 + CHF6.00)

    晚餐: CHF43.50 (CHF14.50 x 3)

    Supermarket: CHF29.80

                                 (乳酪7杯: CHF0.65 x 7

                                  果汁3枝: CHF1.60 x 3

                蘋果3個:CHF1.95

                布冧2個:CHF1.60

                 三文治: CHF5.20

                 蛋糕1條(370G):CHF3.90

                 果醬鬆餅:CHF1.90

                 麵包1個:CHF0.90

                 提子包:CFHF4.95)

手信: Postcard CHF1.00

住: CHF111 (CHF37.00 x 3)