巴黎、瑞士之夢想自遊行(第十五、十六天)

11/07/2008-12/07/2008 (星期五、六)　天晴    蘇黎世(Zurich) → 巴黎(Paris) → 香港

終於嚟到旅程最後一日嘞！今次真係玩到好倦，當去到旅程一半我已經有啲思鄉想返香港啦！但B女話好好玩唔掛住香港喎！玩到今日佢都唔想走，佢真想死，重玩唔夠，嚟十幾日老豆已經哇哇叫啦！

噚晚條街真係好嘈！瞓咗陣！未夠四點樓下街啲人又喺到大叫，所以五點到我已經起身食嘢準備啦！哩間Hostel真係好唔掂！冇咩嘢都唔好嚟住。

拖住沉重嘅行李同疲倦嘅身軀離開啦！

我哋搭哩班車離開！

只須十分鐘就到機場啦！連查票員都查唔切票我哋已經落車啦！

好順利咁就搞掂咗個登機證同劃埋由巴黎返香港嗰程機位嘞！

如果要退稅，過咗海關就即刻轉右手邊有間房仔開門入去就得啦！

有時間行吓舖頭使埋啲散子

準時上機啦！就係哩隻飛機仔啊！

我哋個位啱啱喺機翼底

哩個包包都幾好食喎！唔知係咪我肚餓呢！

轉眼已經到咗戴高樂機場侯機室啦！

又開餐啦！不過哩個飯都幾難食呀!

我食餐嗰陣問個服務員攞咗少少香檳飲，咁就可以容易瞓著，因為只要3%酒精就足以令我變死豬呀！

今次班機full晒，啲人唔瞓係咁行出行入攞嘢食攞嘢飲，搞到我都成日醒，瞓吓醒吓又食嘢啦！

食埋份早餐就快落機啦！

今次啲行李好快出嚟呀！第三四五件已經係我哋啲行李呀！朝早未夠八點已經攞齊行李離開啦！

今次巴黎、瑞士十六日自遊行喺哩到完滿結束啦！

行: 蘇黎世 → 機場: CHF18.00 (CHF6.00 x 3)

朱古力:CHF6.80

可樂糖:CHF0.80