巴黎、瑞士之夢想自遊行(第十四天)

10/07/2008(星期四)　天晴    蘇黎世(Zurich)→提拉諾(Tirano)/ 聖莫里茲(St.Moritz)

原本今日係plan咗去梅恩菲爾德(Maienfeld)嘅海迪村，但之前有對香港夫婦話嗰到得個行字冇嘢睇！而且見議我我坐車去提拉諾(Tirano)，只須要喺車上面已經飽覽到好靚嘅風景，所以今日係我哩個旅程唯一一日冇計劃過嘅行程。

雖然話只係搭車，但因車程比較長，而且轉車次數比較多，如果一miss咗一班車就可能影響好大，所以都幾緊張嫁！

我哋食飽早餐就去搭7:37開出班車，預計去到提拉諾(Tirano)係13:24，即係要坐5個鐘頭47分鐘，中途重要轉4次車添呀！

差唔多9點去到Chur轉車去Samedan，今日真係勁多人呀！

Bergun / Bravuogn

Preda

哩輛就係貝尼納特快車(Bernina Express)嘅觀光車啦！

喺Samedan搭一個站去到Pontresina再轉，哩個站完全冇指示牌，又成個站都掘緊路，咁我哋跟住人潮去到對面月台，見到已經有車咪即刻上囉！但 坐底一陣就比人手指指喺到耍手擰頭，我都唔知佢哋講咩，但B女話佢哋話我哋坐咗佢哋啲位喎！吓！唔係呀嘛！張枱明明都冇掛住Reserve個牌，冇理由坐錯，但除咗我哋都有好多人比叫離開哩個車廂。真係唔明，但其他車廂都滿晒啦！連企位都冇咩啦！平時放單車個車廂都企滿人，個查票員都好無奈咁比啲人企啦！因為真係好full啊！

開車啦！

我哋好好彩，搭咗一個站就已經好多人開始落車，原來佢哋嚟哩到係行山同踏單車嫁！

我哋開始進哩條路線最靚嘅路段(由Bernina Diavolezza至 Brusio)

費恩冰河

雷尼亞黑湖，哩個係一座雨水驟積嘅湖泊。

拉哥∙皮安哥湖，又稱白湖，哩個湖同上面嘅雷尼亞黑湖之間係義大利同瑞士的分水嶺。由哩兩座湖泊流嘅水最後係注入遙遠嘅亞德里亞海同埋黑海。

原來哩個白湖都好出名嫁 ！瑞士旅遊局重攞佢嚟做Catalogue嘅封面嫁！

Alp Grum

波斯基亞佛(Poschiavo)

波斯基亞佛湖

哩條路線最具代表性嘅係有一段路係一座巨大嘅環狀橋

過咗哩座環狀橋再過40分鐘就會到達咗意大利嘅提拉諾(Tirano)，我哋初初都唔知會去到意大利嫁！火車上有個伯伯重好關心咁問我哋有冇visa呀！如果唔係唔入得嫁！冇問題，我哋個特區護照咁巴閉，去歐洲都唔使簽證吖嘛！

意大利提拉諾(Tirano)出入境關口，啲人都係自出自入都冇人查證件。

哩到好多意大利餐廳

基本上我哋都係落一落車，大槪六、七分鐘我哋就跑返入去車站，見到有班車係去聖莫里茲(St.Moritz)就上車嘞！大槪三個鐘到就到咗啦！

之前plan行程有略略睇過聖莫里茲(St.Moritz)嘅資料，但見哩到係滑雪勝地，所以我哋冇考慮到嚟，但而家竟無意中嚟到又覺得哩到好靚，我同B女都好鬼鐘意哩到呀！

聖莫里茲湖

可惜今次無咩時間，我哋只係喺車站附近逗留咗半個鐘就要走啦！如果下一次真係有機會再拜訪瑞士，哩個地方會係其中一選呀！

我哋搭17:04班車返蘇黎世，都要三個半鐘先返到去呀！差唔多九點先返到去，今日搭車都搭到夠晒，淨係今日嘅車費都夠cover返個Swiss pass呀！

黃昏下嘅蘇黎世

B女本來話今晚豪一餐落街食，但今日雖然淨係坐車，但喺間車裡面僕嚟僕去影相都好鬼倦，明朝重要搭早機落巴黎，所以最後都係決定返去食埋最後一包麵早啲瞓嘞！為咗滿足B女要豪一餐嘅心願，就用CHF5.00買條腸比佢送麵啦！

食: 香腸3條: CHF15.00(CHF5.00 x 3)

    Supermarket: CHF5.15

                (果汁2枝: CHF1.60 x 2

                                  乳酪3杯: CHF0.65 x 3)

   住: CHF102 (CHF34.00 x 3)