巴黎、瑞士之夢想自遊行(第十二天)

08/07/2008(星期二)　天晴  勞特布魯尼(Lauterbrunnen) → 琉森(Luzern)

今朝我哋坐七點半班車離哩到去琉森啦！

平時由Interlaken去琉森大部份都係經伯恩(Bern)嗰邊去，但我哋今次係另外一邊方向去，哩邊沿途風景都好鬼靚啊！

布里恩茲湖(Brienzer See)

Lungernsee

\

Giswil

Sarnen

我好耐之前跟旅遊團歐遊，接觸到瑞士嘅地方就係琉森嘞！我當時對琉森留下極深刻嘅印象，我當時同自己講哩到真係好靚，我以後一定要自己再嚟！哩個亦係B女個心願。估唔到多年後嘅今日我終於嚟到啦！B女話多年前佢帶我嚟今日我可以同佢嚟返哩到好開心啊！

一出車站又係搵Hostel(Luzern Backpacker)嘞！資料顯示我哋由火車站行15分鐘就會到，Information Center都話係嫁！但最後我哋行咗大半個鐘先去到。當然我哋又係行咗好多冤枉路啦！之前都有人話好易行錯咗！所以一定要靠湖邊行，我已經跟足，但冇人提及要上天橋,就令我哋同大家一樣要行多好多冤枉路嘞！

http://hk.myblog.yahoo.com/jw!xKRw0VmBGB4ShQv8ezyHYho1NuoRnw--/article?mid=2921

我哋去到都未夠check in時間，但因為早所以重有啲hostel嘅staff喺到，報到咗後就幫我哋收埋啲行李，不過哩間hostel都幾麻煩，佢要求keep起我本passport，之前嗰啲都唔會。

之後我哋沿住頭先條路返出去，hostel出面有個好大嘅公園對住琉森湖，嗰到有好多鴨仔同天鵝，佢哋好醒嫁！一見有人就會游埋岸邊攞嘢食嫁！我就好鬼驚呀！但B女同LH就玩得開心呀！尤其B女佢都唔驚比天鵝咬！喂完一隻又一隻，又話哩隻乖又話嗰隻食完又搶食，一陣大叫no…no… no…，一陣又大嗌go…go…go，真係冇佢咁好氣！

玩咗一大輪大家都覺得有啲肚餓，於是就過咗去等面街有間Pizza店叫咗個Pizza，間舖啱啱開市，個職員唔識英文嫁，我哋大家都係指手畫腳咁落單，佢驚搞錯重喺雪櫃攞啲材料出嚟解釋我哋知個pizza嘅餡料，佢好鬼nice嫁！

好好味呀！

食飽就出去碼頭睇吓坐遊覽船啲資料，嘩！哩到有好多選擇嫁！一毎鐘、三個鐘、六個鐘都有，我哋坐一個鐘就夠啦！咁就由一點開始每個鐘一班到四點鐘。位置喺4號碼頭，即係喺Luzern Museum對面。

咁見未夠鐘就過去卡貝爾橋行吓！哩到之前跟團都冇嚟過嫁！

卡貝爾橋建於1333年，本來係為咗琉森的防禦需要而建。橋身係棕色，而橋頂髹上紅色。喺廊橋裡面有約一百二十幅於十七世紀時所繪關於琉森歷史嘅畫。不幸地，卡貝爾橋嘅大部份於1993年因撞船意外發生嘅火災中燒毀，事後很快得以重建，回復原來的樣貌。

綠色嘅劍欗未見過呀！

差唔多就返碼頭指下個鼻就上船嘞！今次坐咗咁多次遊覽船，我覺得琉森湖哩程係最靚嫁！

兩點鐘上返岸，就開始喺舊城區四圍遊嘞！

哩間係好歷史悠久嘅餐廳

垂死獅子

獅頭壓住的法國皇家徽號fleur-de-lis盾牌和斷矛頭之外，獅頭前面還有一個豎起的盾牌，上面有瑞士國徽的十字。兩面盾牌合起來，就說出了Swiss Guards瑞士衛隊為保衛法國王室而戰死的故事。獅子的身上，在獅鬚鬃毛（mane)之後的背部，還插著另一截斷了的長矛，成為致命傷（mortal wound)，因此垂死了！

冰河公園係喺垂死獅子隔離，哩個公園裡面嘅嘢真係唔係好識欣賞，只不過有Swiss pass唔使比錢入嚟睇吓！但係睇到一啲以前同而家冰河對比嘅相就真係好感慨人類嘅破壞力真係好犀利呀！

1911年時Morteratschgletscher嘅冰河    2001年時Morteratschgletscher嘅冰河

1900年時Grindelward嘅冰河                  2001年時Grindelward嘅冰河

1900年時Aletschgletscher嘅冰河         2001年時Aletschgletscher嘅冰河

行完冰河公園就無意中行入一間記念品店，估唔到個老闆同老闆娘識講廣東話嫁！重好鬼好人添！原來佢哋係越南華僑，係瑞士三十幾年啦！

如果喺哩到買刀仔有 10% discount，如果要刻名就 7% discount，佢哋唔係枱高個價再減返，而真係出面個公價而discount嫁！而且佢哋係用部電腦刻名嫁！所以可以選字形同大細，因我之前見其他都係就咁人手刻！佢哋除咗刀仔連swiss card都刻到嫁！唉！我不斷話最衰已經買咗啦！真激氣！點知老闆娘話唔緊要你攞嚟我唔收錢同你刻啦！嘩！好感動呀！但係hostel距離哩到咁遠一來一回都姍舖啦！算啦！

但佢哋真係好好又細心，所以我哋都喺到買咗好多嘢呀！

買完嘢行咗去慕西格城牆，但係大家都倦啦！所以都冇行去，只係影吓相就走啦！

舊城區街道

差唔多六點好多人都沿住岸邊嘅Bar喺到Happy Hour，如果係香港而家哩個時間重博殺緊呀！

嚟到哩到等我哋都Happy hour吓先！

為食B女嘈完食雪糕又話要買杏仁條試吓喎！

又行吓超市啦！ 好大條三角朱古力呀！

七點啦！係時候返去啦！途經火車站

返到去check in時，我問佢攞返個passport，原來哩到係要keep passport或都CHF50.00來做鎖匙嘅deposit，要到明朝7:30後check out先攞得返，咁我緊係比CHF50.00啦！今日比佢keep咗本passport 成大半日搞到個心囉囉嘍！咁我問佢如果明朝早過7:30check out咁點攞返錢，點知佢話係7:30 reception先開，重話 : It's holiday, relax please！唉...冇嘢講。

今晚我住係雙人房加床，但入到房係雙人房加床肉，吓！咁都得。

之後就落去廚房煮麵食，去到已經有兩個parties用緊啦！我哋諗住煲水煮麵都好快姐！但最後都搞咗成七、八個字先有得食，佢哩都個電爐好慢熱呀！個廚房就大啦但啲煮食工具又唔夠，

今晚哩餐好似失色啲啊！

食: Pizza: CHF15.50

    麵包3個:CHF16.10 (CHF6.10 x 2 + CHF3.90)

    杏仁條:CHF4.90

    雪糕: (1球) CHF3.20 x 3

    Supermarket: CHF12.05

    (果汁3枝: CHF16.60 x 3

    乳酪2杯: CHF0.65 + CHF1.05

    可樂糖1包:CHF2.00

    蘋果3個:CHF1.95

    桃2個:CHF1.60)

    公仔麵2個:CHF2.20 (CHF1.10 x 1)

手信: CHF402.70

          Postcard: CHF1.00

          Stamp1個:CHF1.80

住: CHF93 (CHF31.00 x 3)