Day 8.1 @黑門市場 (2012京、阪、神發花癲之行)

2012年4月16日 晴天
14:00 | 南海電鉄 [特急] ラピートβ45号 | 難波→関西空港

終於嚟到旅程最後一日嘞！幾唔舒得都無辦法。由於最後一日都無咩行程，所以哩日放縱自己可以瞓到七點先起身。係全個行程瞓得最晏嘅一朝啊！

食完早餐拾好嘢所有大小行李，九點半就check out離開酒店，行李當然記存喺酒店先啦！

喺大阪最後一日最後一個行程通常都係黑門市場啊！我哋由酒店行過去都係十多分鐘就到嘞！

所謂市場咪即係街市囉！喺香港我對街市無興趣，但哩到嘅街市緊係多嘢睇好多啦！又無咁Dirty呢！

生猛海鮮

睇吓隻墨魚幾新鮮，皮膚幾晶瑩剔透。

哩間舖頭好多遊客幫襯，入去睇吓咩價錢先。

都唔係太貴喎！

我嘅目標係想試吓河豚，因為重未食過，同埋價錢都唔平，我知哩到有間舖頭有得食咖！
搵到嗱！就係哩到呀！

都幾貴，幾片肉就要千幾円啊！不過一場嚟到，唔好諗咁多，老板我要一份！

我唔客氣嗱！味道....hmm.....食唔到有咩味，好淡，魚一嚿，叫做試過啦！不過下次我寧願食鯛魚啊！

繼續向前行

有間天婦羅店，啲嘢食賣相好靚喎！

不如試吓吖！一件矮瓜唔該！比起頭先啲河豚，哩100円矮瓜出色好多啊！

哩間豆腐店都好出名咖！佢嘅豆漿比起香港嗰啲係濃好多咖！

一朵朵櫻花都有得賣呀！應該係用嚟裝飾啲食物啊！

去到生果店，見到有平有靚嘅士多啤利就緊係唔放過佢啦！

行過哩間舖頭比佢門口啲和菓子吸引住呀！

我哋買咗盒士多啤利和菓子呀！

再入去舖頭睇吓，原來都好多手信賣喎！

價錢都合理喎！不過我買夠所以無幫襯，有機會下次可以嚟哩到入貨啊！

哩間個感覺好似我哋香港啲老餅店 (i.e. 恆香、奇華) 咁呀！

睇到啲和菓子真係喺裡面一件件人手做咖！

我哋都黑門市場行咗成兩個鐘，最後諗住再返去食多次一蘭拉麵嚟做我哋哩個行程最後一餐晏仔。
途經哩間好出名嘅爺爺芝士蛋糕店，好有衝動買返香港食咖！但又唔想攞咁多嘢，所以都係放棄咗無買到啊！

續...2012京、阪、神發花癲之行(Day8.2)@関西空港