巴黎、瑞士之夢想自遊行(第十一天)

07/07/2008(星期一)　天晴  勞特布魯尼(Lauterbrunnen) → 伯恩(Bern)

今朝六點幾七點起身，廚房照樣八點後先可以開火，咁我哋又出私家煲啦！B女煎哩個煙肉蛋三文治比我哋做晏就嫁！

我份早餐好豐富呀！

今日我哋要去瑞士首都–伯恩。

伯恩是保存完好的中世紀古城，建築物以沙岩為外牆。 伯恩以噴泉、拱廊和鐘樓聞名於世。

十點幾就到咗步，出咗車站行咗陣先搵到鐘塔，啱啱十一點開始報時啦！

 

 

噴泉本來是早期的自來水供水設施，但是由於無法供應到一般家庭，所以在住家附近興建儲水池，方便取用，再加上裝飾，成為特色，例如著名的正義女神噴泉、熊噴泉、士兵噴泉、摩西噴泉、參森噴泉及食人鬼噴泉等，大部分都以聖經故事或警世用途為主。

啲舖頭好得意呀！開喺地牢，如果姍埋門都睇唔到個門口呀！

之後就跟住熊苑方向行，途經阿雷河，熊係伯恩嘅吉祥物，處處都可以見到「熊」踨。

睇完熊仔我哋就上熊苑隔離嘅玫瑰公園。

嘩！裡面好大好靚，真係有好多玫瑰花，而且哩到可以望到晒個伯恩市啊！全部都同一隻色嘅屋頂好整齊啊！

喺哩到影咗好多相啊！跟住就行去大教堂嘞！尖頂嗰座呀！

伯恩大教堂建於1421年，於1893年完工，尖塔高達100米，係瑞士最高的歌德式教堂。

門前有234尊小雕像，以真實、詼諧兼具嘅手法表出被神挑選上天堂以及落地獄嘅人。

 

左手邊係天堂， 右手邊係地獄。

裡面啲玻璃窗好鬼靚啊！

然後我哋就慢慢咁沿住拱門街一邊行街一邊行返去車站啦！

B女叫住要食雪糕呀！我重買咗我嘅至愛做high tea添！

三點半返到Interlaken West，諗住去遊湖，但check咗船期發覺我哋蠢咗添！最短嗰程都要坐個幾鐘，重要四點八先有船！然後去到Spiez要等個幾鐘先有回程船返，如果頭先我哋喺伯恩返嚟就喺Spiez落車轉坐船返就唔使走回頭路啦！

而家唯有check定由Spiez返去嘅火車係幾點開，counter 小姐話我哋會6:05喺碼頭上船，但由碼頭去火車站要20分鐘，咁應該搭6:32個班車就最啱嘞！於是就咁決定啦！

見有啲時間就係咁意行吓Interlaken西站啦！人哋話哩邊多嘢賣啲同平啲！但我哋都冇咩時間行啊！

夠鐘上船啦！有Swiss pass唔使比錢。

到啦上岸啦！嘩！由碼頭去車站原來要上好長好長嘅斜路嫁！雖然趕時間但有個城堡同觀光車都要影吓先！

終於順利咁喺15分鐘內跑由山腳跑到上山頂個車站，喺香港我一定唔得！

去到車站班車竟然delay喎！今次已經唔係第一次delay嫁啦！之前由Zermatt去Interlaken啲火車都試過delay，又話瑞士火車好準時？

好彩去到Interlaken Ost轉車時，去Lauterbrunnen班車亦配合返我我delay咗開，如果唔係又要等一個鐘呀！所以今日七點半就可以返到去啦！

返到去啲舖頭又係close晒！重成日話想試吓對面間凍肉舖啲烤香腸添！日日都一係咪開一係姍咗！

返到去又係B女時間，話咁快沖個涼出嚟又食得嘞！

對住咁靚嘅景食嘢就寧舍開胃

今晚係我哋喺哩到最後一晚！又要拾嘢準備離開啦！

食: 蛋糕: CHF2.90 x 2

    士多啤利撻: CHF2.80

    雪糕: (1球) CHF4.00 x 2

          (2球) CHF7.00

手信: CHF119.40

住: CHF90 (CHF30.00 x 3)