巴黎、瑞士之夢想自遊行(第五天)

01/07/2008(星期二)　天晴   巴黎

今日係喺巴黎行程最後一日，淨係安排咗行街街所以可以瞓晏啲啦！我哋今日成九點先落街，之前日日早出晚歸，好似四周圍啲舖頭同街都未行過。重有萬神殿同盧森堡公園就喺我哋附近咋！我哋計劃今日返嚟有時間就去行吓！

落到大堂終於見到老板娘同佢個女呀！由於明朝我哋又要趕早班車所以我哋今日提早找數先，有咩老板娘都話得事吖嘛！真係好佢只係計我哋四晚房租，我冇問佢點解呀！見佢唔收就嗱嗱淋比錢算啦！

跟住第一個行程就係去探路嘞！因為明朝我哋要喺里昂車站搭7:10班車去日內瓦，所以都要去行一轉睇吓咩環境先，哩一樣係我同LH嘅作風，哩啲咁嘅重要嘢都係做一次先安心。

原來都幾方便，我哋喺St.Michel(4號線)搭一個站去Châtlet然後轉1號線都係搭一個站就到里昂站(Gare de Lyon)嫁啦！而全部計埋都係St.Michel個站有兩條長樓梯而Châtlet站就一條，之後全部都有扶手電梯嫁！

計算好我哋喺返里昂站搭一號線去凱旋門嘞！

影咗一輪相就沿住香謝麗舍大道行咗陣，就去醫肚嘞！

今日我哋決定喺巴黎豪一餐，之前BLOG友CC介紹咗我要去食青口，所以我哋今日個lunch就去Léon De Bruxelles

哩間嘢都好多人哦！我哋坐室內，serve我哋個waiter啲態度嘛嘛哋！

一坐底就有碟哩啲餅仔，冇咩味道

我哋睇完一輪餐牌我同LH叫咗個青口set lunch，B女話唔跟我哋，佢要青口通粉。

先嚟沙律同埋麵包

B女嘅青口通粉

但當份餐嚟我哋就呆咗嘞！點解我哋份青口變咗係牛扒嫁！再睇明明照圖叫都搞錯真係唔明！嘩！阿B女嗰份青口真係好好食呀！嘩！我哋嗰份牛扒真係好難食呀！咬嚟咬去都咬唔開，又實又冇味。我唔制呀！

B女叫我哋再order過一份青口喎！佢話我哋一心嚟係食青口，如果唔食到就會唔甘心返去有遺憾喎！我哋諗落又係，咁今餐真係豪啲就再order一個海鮮青口嘞！今次係點住幅圖叫啦！再叫錯我真係食唔落嫁！

\

哩份甜品好正呀！

嘩！最後真係食得好飽，啲麵包同薯條都食唔晒要打包呀！CC真係冇介紹錯，啲青口真係好好食，錯就係自己錯，未睇清楚亂咁叫！ 搞到埋單over budget。

食飽飽我哋就行落老彿爺(Lafayette)啦！唔知點解好多年前跟團去覺得哩到好靚好grand，但今日嚟到啲感覺冇晒！淨係覺得好多人好嘈！好似SOGO啊！

行咗一輪都冇咩嘢係啱買，於是就過去隔離春天行咗陣都係冇好賣，咁抖咗陣四點幾就坐地鐵去聖母院嘞！

聖母院都好多遊客啊！遊覽完聖母院就喺附近啲街逛咗陣！原來哩到賣啲嘢嘅價錢平均都比之前去過啲地方平啊！所以大家都買咗一啲啲小飾物同手信。

跟住過咗聖母院條橋就已經返到我哋住嗰頭個地鐵站嘞！其實我哋住嗰位置都幾方便嫁！跟住去超市買咗啲生果就返去啦！因為而家重好飽，所以今晚生果餐加晏就啲麵包就OK嘞！

最後哩個萬神殿同盧森堡公園都放棄咗冇去到啦！因為今日都好倦啦同埋要返去拾好行李明朝同車去瑞士啦！

食: 午餐: €57.20

        Supermarket: €10.55

        (桃2個(0.305kgs): €0.76

        蘋3個(0.775kgs): €2.48

        提子弟(0.455kgs): €2.05

        橙3個(0.88kgs): €2.46

        蕃茄仔(0.535kgs): €2.51

        脆肉瓜1條(0.21kgs): €0.29

其他: 郵票4個:€3.60

          Toilet: €0.50

住: €110.00 (三人房)

手信: €42.80 (包括朱古力豆2盒: €17.80)