巴黎、瑞士之夢想自遊行 (第一天)

27/06/2008(星期五)　雷雨    香港 → 香港赤臘角機場

今日一出門口就勁落雨，好彩都同阿B女媽咪順利去到巴士站。但同伴LH就因為太大雨同我哋會合唔到要自己出機場。

十點機，我哋七點半已經到咗，諗住可以早啲check in啦！但法航啲人話counter未開要等一吓！咁咪等一陣囉！呆吓等吓到八點突然見到電子板話我哋班機要delay一日。 吓…1日，一定係眼花，冇可能發生，再埋counter問，個staff竟然話唔清楚呀！你自己埋對面排隊問吓啦！

嗱嗱淋去排隊，嘩！原來好多人喺到排隊啦！

有啲法航職員分派張通告比我哋，大致都係話班機今日飛唔到要延遲到明日，但並冇註明原因。再問啲職員又係答唔知。

我哋都排咗個幾鐘頭先埋到counter，得到嘅答覆係今日只有一班早機去巴黎，就係我哋嗰班，另外有班要喺芬蘭轉機，但都close咗counter，飛機亦就起飛嘞！如果一定要今日飛法航今晚十一點有一班，但班機over-book咗，所以我哋只可以放嘅waiting list，要今晚嚟等睇吓上唔上到。

唉！最後我哋冇得選擇吓都係要搭返明朝機，佢話比返三百蚊車馬費叫我哋返屋企,明朝七點前要去到押口等上機，嘩！我哋今次冇咁順灘，我哋唔走呀！咁佢就話安排今晚喺機場酒店瞓一晚。真係好掃興呀！

 

喺酒店攞房都搞咗好耐，成十一點半先上到房，我哋三個人就分咗三間雙人房，而每間房都可以打三分鐘免費IDD，哩啲都係問佢先話比你知有嫁咋！ 

咁我哋上到房就打電話過巴黎間酒店話我哋要delay一日先到，但唔知係咪嗰邊重係清晨呢！同我講電話個人把聲好後生 ，又好似知啲唔知啲，我話今晚嚟唔到佢話YES，我話緊嗰四晚keep返間房比我哋佢又話YES，咁我問可唔可以今晚酒店費唔好claim我哋，佢又話YES..YES..OK..OK，咁我咪問底佢個名啦！有咩嘢都有得跟吖嘛！但嚟到哩到佢就好似唔識聽嘞！問極都講唔出，咁我用我謹謹重記得嘅法文問佢個名，咁佢就答咗一個好難聽到我唔明嘅字，咁我用法文叫佢串個字比我聽，佢就係到兒兒哦哦都串唔出，唉！算啦！就夠三分鐘都係晏啲先再打過搞個話得事啦！而LH就託佢個朋友幫我哋send個e-mail過去先！因為都係白紙黑字清楚啲。

之後我哋返落機場Air France個counter問佢哋攞返封信要有今次delay航班理由(但之後睇返原來佢哋打錯咗個航班編號)，搞掂晒都十二點幾要去食晏啦！

我哋攞住啲couple間間舖頭睇過都係去食buffet最底，於是就用一張HKD160.00嘅couple食咗一個價值HKD180.00再要加一嘅Lunch Buffet嘞！嘢食都 OK啦！

食飽飽就諗住過去博覽館睇吓啦！原來喺機場上機鐵係唔使入閘嫁！就咁上車就得嫁啦！過到去閘口個工作人員話博覽館而家冇展覽所以休館冇嘢睇喎！佢建議我哋出咗閘之後沿住馬路行返去機場二期啲商場行，我哋緊係唔行返去啦！最後冇出到閘原車返機場，一毫子都唔使比坐咗兩程機鐵呀！

返到機場行吓SKYPLAZA同探知館，行吓HEA吓！無無料料又五點幾，唔係今日我老細都放假我真係想返工取消今日假，無端端就晒咗一日假。

返上房又再打電話過巴黎間酒店，今次哩個應該係老板娘啦！我一講個名佢已經知道啦！佢話收到我哋個e-mail，之後四晚嗰間房留返比我哋冇問題，但今晚因我哋唔夠二十四小時通知所以理論上係有權收我哋錢，但佢明我哋唔係蓄意，所以話如果今晚間房可以租出就唔claim我哋，否則我哋就要比埋今晚嘅房租，都合理吖！

然後又係晚飯時間，都係Buffet呀！不過好似同晏就啲嘢差唔多，價錢就係HKD308.00再加一。都幾貴啊！我哋張 couple 就值HKD260.00

食飽飽返房睇吓電視就瞓啦！明朝要五點半就喺大堂集合啦!

再攞啲證件呀、登機證呀、同其他文件出嚟睇吓先發覺原來航空公司封信係打錯咗航班編號嫁！唉！點攪嫁！明日又要去攞過張！哩間法國航空下次真係要慎重考慮呀！