巴黎、瑞士之夢想自遊行(第九天)

05/07/2008(星期六)　晴天   策馬特(Zermatt)→勞特布魯尼(Lauterbrunnen)

今朝五點幾就爬起身，好彩重未日出，等到 5:47開始日出啦！啲陽光開始慢慢咁射向馬特洪峰啦！

到6:15成個山頭都光晒啦！真係好滿足呀！

睇完日出LH都起身啦！平時hostel係七點先開始有早餐食，但唔知係咪今日有馬拉松比賽呢！我哋六點九落去canteen早餐都已經開始重好多人添！其中有好多係參賽嘅選手，有啲年紀都唔細嫁啦！真利害！

食飽飽我哋就返房收拾晒我哋嘅行李離開哩到啦！今朝我哋唔搭巴士啦！因為除咗唔知要等幾耐，而且落斜都好輕鬆姐！

哩輪就係策馬特專用嘅環保電動車嘞！

馬特洪峰又再躲藏喺雲層裡面啦！

馬拉松嘅起步點呀！

我哋搭八點八開出嗰班車出去勞特布魯尼(Lauterbrunnen)，全程差不多三個鐘頭但要轉幾次車，喺Visp、Spiez同埋Interlaken Ost轉，而今日係咁多日以嚟遇到最多人搭車。唔知係咪星期六嘅關係，基本上好多人都係向Interlaken個方向去，多人到連行李都冇地方放。

但都好順利去到Interlaken Ost轉車，喺哩到我哋都好小心咁睇清楚上嗰個車廂，因為哩班車係會喺中途一分為二，前半節去格林戴爾華德(Grindelwald)，後半節先係去我哋要去嘅勞特布魯尼(Lauterbrunnen)。

十二點就到咗Lauterbrunnen，我哋係哩到會住三晚，選哩到係因為我睇到哩到啲資料覺得真係好以海迪住嘅地方，尤其嗰個修塔布巴哈瀑布真係同海迪片頭打鞦韆嗰景一樣，而且哩到嘅住宿費都比Interlaken同Grindelwald平。

我哋今次哩間hostel好近車站，出咗車站轉上大路第一間就係，真係勁方便

http://hk.myblog.yahoo.com/jw!xKRw0VmBGB4ShQv8ezyHYho1NuoRnw--/article?mid=2898

而且哩間Valley Hostel嘅口碑好好，我三個幾月前訂三人房，但今晚都已經full咗！所以今晚只可以住六人大房，明日同後日先可以轉去三人房。

去到未夠時間check in，阿老板伯伯叫我哋放底啲行李三點後先再返去check in，咁我哋就喺佢個飯堂食埋個晏就出去！

我哋第一站就去繆倫(Mürren)，用Swiss pass坐纜車唔使比錢。

哩個小鎮好寧靜好舒服，而且哩到有好好靚嘅花花。

行行吓經過一間新加坡華人開嘅餐廳，老板同我哋傾咗陣計，我哋咪話plan咗明日去少女峰，但佢竟然話點解今日咁好天唔上去，明日會落雨喎！到時咩都睇唔到，吓！唔係嘛！而家咁好天明日點會落雨呀！但我知佢哋當地人睇天氣真係好準嫁！策馬特個伯伯已經係一個好例子啦！死啦！咁點算呀！唯有而家影返夠本先啦！老板話前面哩個就係少女峰！但我都唔知邊個打邊個。

回程啲風景

行咗輪我哋就返去Lauterbrunnen然後轉車去威根(Wengen)，又係有Swiss pass坐纜車唔使比錢。

有吊車可以再上山，哩程就要比錢，但Swiss pass就有折不過我哋冇坐。

行咗陣之後！B女喺麵包舖買咗嚿不明物體做High Tea喎！嘆完之後本來諗住去圖魯梅爾巴哈瀑布(Trümmelbach Falle)嫁！但係嗰到六點姍門，而家過去都應該趕唔切，所以就返去hostel check in嘞！

佢同LH都話好食，我就嘛嘛哋嘞！我發覺佢兩個啲口味越嚟越夾喎！

返落嚟時喺纜車攞包餅出嚟食發覺包餅發漲呀！唔知係咪上咗高啲氣壓嘅問題呢？

返到Hostel好快就搞好手續，不過勁多人呀！阿伯伯重比張鬼咁長嘅手則比我睇，我都睇唔切，唯有影低佢先！

我哋見都幾多人，所以攞咗房擺好晒啲嘢就嗱嗱聲落去廚房煮嘢食先啦！

食飽飽都係7:30，咁我哋就出去四圍行吓！

修塔布巴哈瀑布(Stabbach Falle)

散完步就返去沖涼瞓覺。

哩張係喺間房到影出去嫁！

食: Supermarket: CHF12.40 (脆肉瓜、蕃茄、香腸、蘋果、乳酪)

    麵包2個: CHF4.40

手信: CHF11.60

        Postcard : CHF0.80 x 3

住: CHF75.00 (CHF25.00 x 3)