巴黎、瑞士之夢想自遊行(第四天)

30/06/2008(星期一)　天晴   巴黎 → 聖米切爾修道院 (Mont St.Michel)

今朝食咗早餐六點就落街啦！

哩到啲地鐵淨係入閘要比票嫁咋！出閘係就咁行出去就得嫁啦！

但好多本地人都唔比錢買票，就咁喺哩個出閘位行入嚟！但我哋千其唔好學呀！比佢哋捉到要罰成八九十蚊歐羅嫁!

好順利六點半倒就去到羅浮宮站，見咁早咪去羅浮宮影吓相囉！噚日人山人海，今朝幾寧靜幾舒服呀！

好啦！夠鐘行去旅行社集合嘞！咁臨出發緊係去吓洗手間啦！諗住旅行社實有洗手間比我哋用啦！哈…就遍係冇，佢叫我哋去對面餐廳，過到去搵咗輪原來要落地牢重要比錢呀！

今日哩團都幾多人，每人派張入場卷就上車嘞！

上咗車之後分別有英文、日文同意大利文嘅廣播，但因為實在太早起身好倦所以原全聽唔到講咩就瞓咗啦！大槪兩個鐘倒啦就到咗一個休息站比我哋去吓洗手間同抖吓！B女媽咪一直好想喺歐洲哩啲休息站嘆返杯咖啡，今次終於如願以償啦！

然後再坐多兩個幾鐘，聖米切爾山已經出現喺我哋面前啦！

但入去修道院前先去間酒店食晏先！哩餐團費包埋嫁！都幾好味吖！但同枱嘅意大利人話嘛嘛哋喎！

頭盤 - 煎蛋

主菜

甜品(芝士涷)

飯後咖啡 ~ 正呀！

食飽飽入城啦！

聖米切爾山座落在諾曼第省嘅西南端，一個遠離法國本土嘅小島。圍繞住聖米切爾山係一大片嘅沙洲，潮漲時成座山都會被海水包圍住。而山頂嘅修道院係整座山城最矚目建築。

修道院(Abbaye)由8世紀時開始興建，原本只係一個祈禱所，後來喺11世紀開始被修建成本篤會修道院，而且不斷增建城牆、歌德式教堂、鐘樓同尖塔。喺法國大革命時重做過監獄；直到1874年，法國就列佢為保護文物同埋開放比遊客參觀嘞！

我哋被分成兩組，講日本一組，講英文同意大利文又一組，然後開始遊覽啦！一點幾開始行但四點三要上返車都幾趕。

迴廊2列拱門係利用聖米切爾山東北方部分採開恩產石灰岩，上面有葡萄葉等浮雕

被喻為西洋驚異的驚異樓

個導遊一邊講兩種語言我哋就係咁跟住佢，係咁向上行，一心諗住佢同我哋上到最高之後會解散自己行，但佢都唔停咁講，同埋後來先發覺條路係one way嫁！我哋過咗係唔可以行返轉頭嫁啦！唉…好多地方諗住返轉頭先影最後都係miss咗！我哋跟到咁上下幾就決定唔跟佢，比返啲耳哃機佢之後自己行呀！

哩朵唔知係咩花呢？淨係喺哩個修道院見過，其他地方都未見過呀！佢好得意好特別呀！(後記: 終於查到啦! 叫做西番蓮，係熱情果嘅花嚟嫁！)

 

好快就四點啦！雖然只係沖沖咁遊覽哩座修道院，但哩個地方的而且確係值得一嚟！真係好壯觀、好靚。

返上車又瞓一陣，六點七又比我哋落車去吓洗手間、買吓嘢食！

返到巴黎已經九點三啦！咁我哋又去羅浮宮影夜影啦！但等到九點九都係影到黃昏咋！

成十點半先叫做黑啲，因為重想去鐵塔影所以哩張雖然個天未黑晒都算啦！

咁跟住去夏瑤宮影鐵塔夜景，但去到好多個出口都封咗，咁唯有喺一個比較遠嘅出口出，但出到去夏瑤宮被封咗唔入得，條街好多警車同差人，唔知發生咩事但冇辦法影到鐵塔。我都諗住放棄嫁啦！但LH話要去鐵塔個站試吓，咁我哋又嗱嗱淋搭兩個地鐵站落去鐵塔到，一出站就見到個鐵塔但唔完整囉！不過算啦好過咩都影唔到！但唔知點解今晚啲燈係籃色呢！我之前睇人哋啲相明明係黃色嫁喎！

影完又嗱嗱淋走啦！因為都十一點九啦！我哋唔係好清楚尾班地鐵開到幾點，都係唔好玩到咁盡啦！十二點幾終於返到酒店，睇到電視原來今晚十一點嗰陣法國總統同好多人為咗歐盟唔知啲咩喺夏瑤宮做緊亮燈儀式呀！唔怪得封晒路啦！唉... 我哋都唔知係好彩定唔好彩嘞！

食: 早餐(熱狗): €5.10

咖啡(休息站): €1.40 + €1.20

行: 巴黎 à聖米切爾山 :€158x3 (包修道院入場費及午餐)

        10 Carnet: €11.10

其他: Toilet: €1.00

住: €110.00 (三人房)

手信: €3.00