酒店 - 平湯館 生粋源泉放流の宿

平湯館 生粋源泉放流の宿
〒506-1433 岐阜県高山市奥飛騨温泉郷平湯温泉726

平湯館距離平湯車駅好近，只須幾分鐘路程就可以到達。

我原本係訂一間無浴室無洗手間嘅本館和洋室
三人計：37,800円 + 450円入浴稅 (一泊二食 ，夕食飛驒牛)
酒店大堂有Wi-Fi服務，密碼問櫃台索取。

去到時，酒店派出一位台灣姑娘招待我哋，所以好溝通，佢話由於哩日入住人數比較多，所以將我哋嘅和洋室免費提升去本館特別室，房間面積比和洋室大一陪，同埋會有浴室同洗手間。浴室對於我住溫泉酒店其實無咩大作用，不過有洗手間就方便B女半夜起身唔使出走廊去洗手間。

酒店有個好靚嘅花園，哩到第二朝個境像係完全唔同晒呀！

好啦！上房睇吓先！

一廳兩房

好大啊！

B女可以自己瞓晒一間房呀！

我同大笨蛋緊係瞓塌塌米啦！

食飯時候就幫我哋喺和式房舖好塌塌米啦！

好大個大浴室

洗手間喺咖一邊

個窗望出去睇到好靚嘅園境係哩間房賣點之一。

哩個境真係喺我哋停留哩兩日一夜變化好大。當日到達五點嘅情況，有少少淺粉紅，有綠色嘅松樹。

食晚飯八點返上房，外面已經舖咗層薄薄嘅雪。

第二朝瞓醒就不得了，成個庭園已經舖上厚厚嘅雪，哩張相我無做黑白效果，係真顏色嚟咖！(係原色，並無效黑白的)

夜晚由庭園影返上酒店大堂

我哋就係住左手邊三樓嘅房

夜晚庭園有少少雪好靚，不過真係好凍啊！

去溫泉睇吓先，溫泉出面有啲按摩椅，面向住好靚嘅庭園。

更衣間都幾大

溫泉內沖涼嘅地方都好大，不過唔知係唔係天花有空隙位，沖涼時啲水開到最熱都覺得有啲凍啊！

室內嘅風呂。

由於室外有人浸，所以唔方便影相，哩張相喺我哋第二朝浸嘅地方，連雪景都係一模一樣，個天重不斷咁落住飄雪，頭上一片片白雪，但個身就浸喺溫泉裡面暖粒粒，真係好正，之前一直睇電視旅遊節目先有哩個場面，哩刻自己身在其中，真係興奮到難以形容呀！

以我哋用12,750円住哩間溫泉酒店真係可以話好抵呀！而且佢嘅溫泉真係好正，雖然都幾多旅遊團入住，但由於佢地方大，再加上溫泉開放時間長，只係喺半夜12:00至1:00做清楚停止服務外，基本上係全日開放，所以可以分散啲人啊！所以總結哩間係一間值得推介嘅住宿地方啊！