Day2.3 @ 扇沢、黑部水庫

2013年4月23日 陰天
07:16~08:13 | [JR]大糸線 糸魚川方面(下り) | 松本 → 信濃大町
09:05~09:45 | 巴士| 信濃大町 → 扇沢10:00~10:16  | 關電隧道無軌電車| 扇沢 → 黑部水庫10:16~11:30  | 步行| 黑部水庫 → 黑部湖11:30~11:35  | 登山纜車| 黑部湖 → 黑部平12:10~12:17  | 立山架山索道| 黑部平 → 大觀峰13:00~13:10  | 立山隧道無軌電車| 大觀峰 → 室堂 
(交通收費及詳細資料請往交通篇)
酒店：ホテル立山 (Hotel Tateyama)

40分鐘後就到達扇沢，落咗車先去車駅將之前買嘅套票換成乘車劵

哩張票好重要，每搭一種交通工具都要出示佢比駅員檢查，直到立山為止，所以要好好保管，唔見咗就要重新買票啦！

到達時已經有幾輪旅遊巴停泊喺到，幾團台灣團浩浩蕩蕩咁殺到。所以我哋都不感怠慢，拿拿臨走上二樓車駅排隊上車。

上到二樓都唔係好多人，前面哩啲都係一啲日本人。目前為止大家都重好有秩序，因為啲團未到。

駅內工作人員重推銷吓立山高原車仔模型，同啲日本人講吓笑。

好快就上車啦！啱啱重想話都重有好多位吖！點知話口未完啲台灣團就到嘞！最後迫到好似沙甸魚咁呀！好彩我哋都有位坐。

16分鐘後就落車啦！睇吓幾多人！

落咗車我哋應該先上水壩展望台，但因為太多人，所以我哋跟住人潮走，竟然過咗展望台入口都唔知，一直向黑部湖行過去。

行到嚟哩到都覺得唔妥，好似次序有啲亂咗。但當時自己實在太心急，所以覺唔妥都繼續行。

真係出到嚟黑部湖，抬頭就見到展望台位置，一心諗住跟住條樓梯上就得。

但奇怪，點解條樓梯唔係綠色又無公仔嘅！

行咗兩層見到有餐廳

好似展望台餐廳，但唔係哩到喎！最後返落地面問吓駅員，佢話係頭先落車後唔好落樓梯，係另一方向上樓梯先啱。救命呀！又要行返轉頭呀！

行返上頭先車駅、哩刻無晒人就好清楚睇到前往展望台嗰二百幾級樓梯嘅開始啦！

由於心急咁跑嚟跑去，喺黑部湖下面都跑咗幾十級樓梯，我哋已經好攰啦！所以喺上哩二百幾級樓梯前先放底晒我哋身上面嘅負擔先得。 300円豪比佢。一個廿二吋喼，三個背囊，兩個手提袋揼晒入去，舒服晒！

哩條樓梯就無錯啦！

哩到啲泉水真係好冰凍，如果平時我實飲唔到，但而家行到成身慶晒，飲咗少少泉水好舒服呀！

飲啖泉水，坐底抖一抖再繼續，重有100級就到啦！努力...加油。

終於上到嚟啦！雖然無咗個藍天，但個景都好靚...好靚呀！

居高臨下咁影落去，有啲腳軟呀！頭先我就係行錯咗，去咗下面嘅餐廳呀！

個水壩真係好宏偉呀！

逗留咗幾個字，影夠相就慢慢行返落黑部湖，個湖都未溶晒雪啊！