31/07/2009 晴天
(Part 1)
今朝一早去浸完風呂，就去食早餐嘞！但早餐比我想像中少嘢食啊！
今日幾好天
今日我哋去小樽呀！
小樽係一個海嘅地方
9:45就到咗啦！幾古典嘅車站！
一早嘅小樽都通都有一啲舖頭開咗啦！喺啲藥房睇過，果然啲價錢平過狸小路啊！重有好多做緊特價添呀！
幾大個煲
小樽街境
舊國鐵手宮線係日本第三、北海道第一古鐵道線，由美國合約工程顧問興建，小樽 - 札幌路段於1880年開業，大大貫通兩地石炭及水產業物流運輸及客運業，加強小樽港嘅補給站角色，促成明治後期小樽港與北之華爾街嘅興起。二戰前，日銀小樽支店都用此線運送貨幣現金，手宮線可說係小樽與札幌嘅經濟命脈。
戰後小樽工商業沒落，該線客運服務於1960年終止，其貨運功能亦喺1985年被裁，六十年代後保育小樽運河民意高漲，間接令當局意識保存手宮線作為北海道最古鐵道線見證嘅重要，逐保存今日JR南小樽駅至旧手宮駅，並改為長達2.6KM嘅步道「手宮線跡地」。
跟住就去到小樽最人氣嘅小樽運河啦！真係好多人啊！
出拔小路
橫街內有好多食店，哩間出名食蜜瓜雪糕咖！
由出拔小路露台影出去都幾靚啊！
哩間拉麵舖喺尖沙咀都有開分店咖！上次跟團都嚟食過，都幾好食咖！
跟住就行入堺町通，哩條街所有小樽有名嘅店舖都喺晒到，淨係行哩條街都有排行呀！
K's Blowing原名「堺町工房」，以其開放式體驗而打出名堂。
麵包超人呀！
有麵包超人緊係有細菌小子啦！
我哋今日就喺哩間多喜二食晏啦！好多人嚟到小樽會選擇政壽司、旭壽司呀！而我捨棄佢哋選哩一間係因為睇咗有線嘅活得很滋味裡面介紹過哩間啲壽司同海鮮好正，而且係百年老舖，所以就嚟試吓！
哩隻咪咪係都要企喺門口唔肯讓開比人入去舖頭。
我哋叫咗一set手握壽司同埋一個海鮮鐵板燒，哩個燒帶子就送咖！
個帶子好鮮甜
12件手握壽司set ￥3,150
我覺得味道一般
海鮮鐵板燒 ￥3,675
份量好少，而且隻北寄貝唔新鮮呀！食落有啲鯹味呀！
總括嚟講哩間嘢唔掂呀！食咗咁多餐都未試過話不滿咖！ 但哩間真係唔得，啲店員可能見我哋係外國人，亦對我哋啲態度嘛嘛哋！好明顯同佢哋啲當地人唔同咖！而且食物唔多新鮮但價錢又唔平！所以我唔推介呀！
.....續
Shirley : "小樽" 真係一個好舒服既地方黎架 , 我下次去都諗住翻炒呢度 , 嘩 ~ 聽妳咁講 , 果間壽司店真係好唔掂喎 , 都係去番D有口碑既好D , 比如 "政壽司" . 不過隻貓真係好正 .
回覆刪除Bye Bye !
P.S. : 睇妳之後果D天氣 , 日日都好天 , 熱唔熱架 ?
[版主回覆08/08/2009 23:12:00]小樽真係好舒服啊! 不過講浪漫都係冬天先覺得氣氛濃啲啊!
哩間多喜二真係唔好幫襯呀! 嗰個旅遊節目主持 人講到難好食咁! 都握人咖!
係呀!離開咗富良野之後就日日都好天, 真係激鬼死呀! 中午會覺得熱啲囉! 但一早一晚都係有啲涼咖! 同埋佢熱得嚟唔會好似香港咁辛苦, 比較乾爽, 所以ok咖!
又係魚生壽司唔掂, 但呢道係咁近海嘅北海道喎, 真係好奇怪呀!
回覆刪除[版主回覆08/11/2009 07:32:00]哩間喜多二真係令我好意外佢竟然係咁唔掂, 溫泉酒店可能係包餐, 所以差咗啲, 但哩間嘢價錢一啲都唔平, 竟然咁差, 真係街邊檔都好過佢幾十倍呀! 但好多當地人幫襯佢咖! 唔知係咪見我哋係外地人所以求其比啲嘢我哋食呀! 佢重大把位都安排我哋坐遠離佢哋服務範圍門口盡頭嘅角落呀! 總知哩間嘢講一次就要鬧一次呀!
札幌去小樽要幾耐呀~~??
回覆刪除[版主回覆08/13/2009 13:32:00]我哋來回都係搭普通列車, 要九個字, 如果搭到快車就半個鐘可以到咖啦! 同埋佢啲班次都幾密, 三四個字就有一班車咖啦!
我想問問你係咪(賭神)或他的弟子﹖映相一定唔上鏡，或者映背脊﹖﹖
回覆刪除[版主回覆08/21/2009 12:52:00]因為我仇家多, 驚人尋仇呀! 哈...哈! 講笑啫! 其實真正原因係我樣衰呀! 驚大家見到連隔夜飯都嘔埋出嚟呀! 所以為咗大家健康著想都係唔好見人嘞!