北海道仲夏賞花の旅 (第四日-Part 1)

29/07/2009  晴天 

    富良野 à 札幌  à 定山溪

(Part 1)

今朝一早起身望出窗外，嚟咗幾日最好天都算係今日啦！但係我哋今朝要走啦！

食咗早餐，到酒店大堂check out咗後，放底咗啲行李就出去行吓街先！

噚晚就係喺哩間褔壽司食晚咖啦！就喺酒店後面好方便咖！

朝早富良野嘅街道好寧靜呀！

雖說咁早，但都有啲檔口都做緊準備功夫啦！

今日都重有肚臍祭嘅儀式同活動呀！所以好多設施都未搬走啊！

行行吓去到一間買家居用品嘅地方，裡面有好多花花，B女緊係唔會放過機會逛一逛啦！

種喺馬路旁嘅太陽花都好靚啊！

日の出ヘそ公園 (ヘそ神社分祠) - 即係肚臍公園呀！

ヘそ絆石: 與至親的｢絆｣ - 日文嘅｢絆｣唔係中文嘅｢絆｣倒人，｢絆石｣亦唔係｢絆腳石｣。｢絆｣(きずな)喺富良野肚臍文化中，指嬰孩喺母親體內不可分割嘅臍帶，引伸到家人、朋友、社會等倫常連繫，故有謂｢親子の絆｣、｢市民の絆｣。ヘそ絆石嘅一個洞，讓兩人可各在一邊伸手連繫對方，用握手去體驗｢絆｣嘅感覺。

街邊一朵大紅花

富良野都有間24小時營業嘅麥當當喎！

富良野神社

哩間富良野物產店都有好多手信賣咖！

見時間差唔多就慢慢行返去酒店，途經近肚臍祭會場嘅街，發覺有好多人喺到擺檔，好似啲跳蚤市場咁！

重有BB爬行比賽呀！好鬼得意呀！

一籠BB啊！好cute呀！

買咗啲街頭小食當做晏就呀！

啲日本媽咪將啲小朋友妝扮到好靚啊！

飲飽食醉係時候離開啦！真係好唔捨得走啊！富良野真係一個好靚好舒服嘅地方呀！唔知幾時會再嚟呢﹖

哩間就係傳說中嘅薰衣草號呀！搭哩間車係可以直到札幌唔使轉車咖！不過我哋唔搭佢呀！因為佢最早都要下就兩點幾先開，返到札幌要成四點幾太晏啦！

走啦！富良野 Bye Bye ！！

我哋由富良野搭去滝川再轉車返札幌

喺富良野駅同埋哩個滝川駅都要搬行李行樓梯，好彩我哋而家哩刻個喼都唔係太重，重可以應乎，但如果有啲人先去札幌、小樽shopping再過嚟就真係幾係嘢啊！

滝川駅月台

13:50就到達札幌啦！返到嚟大城市！果然係好多人！而且札幌人嘅步伐都追得住我哋香港人呀！

一條直路行咗大槪十幾分鐘就到咗聽日要住嘅酒店啦！喺到放底晒啲大件行李先入定山溪。

我哋行返去札幌駅旁ESTA下面嘅巴士站搭巴士入去定山溪嘞！

由於心急原故，我一去到見到12號定山溪嘅站有車就即刻跑上車，但見之前有一對香港情侶都好似係去定山溪，但佢哋問完個站長就冇上車，我覺得有啲奇怪，所以落返車睇清楚先發覺間巴士只係去豐滝而唔係去定山溪，我都去問吓站長，佢話下一班3:00開出先係去定山溪咖！

嘩！嗱嗱淋落車再排隊先！真好彩！如果唔係去咗邊都唔知呀！

哩間係去唔到定山溪咖！

上車前要攞張整理劵

到落車時跟住自己嘅號碼比錢，我哋搭咗￥750

一個鐘頭廿分鐘先去到定山溪，間巴士差唔多停喺我哋酒店門口呀！

                                                                                                      .....續