2008年12月31日 星期三

再見2008 !!

今日已經到咗2008年最後一日啦今年香港真係發生咗好多唔開心嘅嘢希望新一年有新嘅境象緊哩年大家都開開心心,新年快樂。


                 Happy New Year 2009 !!



                 



2008年12月21日 星期日

一年容易又聖誕


唔知係咪年幾越長就覺得時間過得越快轉眼又話聖誕節嘞細個嗰陣咁多節日就最鐘意聖誕節,自己都會好比心機咁去佈置吓屋企、掛聖誕樹,重要不停咁寫一大疊聖誕咭互相送比同學仔呀!


 


但而家啲氣氛好似越嚟越平淡,尤其今年,見到啲聖誕樹好似冇以前咁靚,唔知係咪自己心情影響咗呢﹖


 


 


無論如何都希望大家有個開心快樂聖誕節 – Merry Christmas & Happy New Year


                    

click to comment


                                                        


 


 


 


2008年11月30日 星期日

飲宴

前兩日有位舊同事嫁女請飲,佢哋喺跑馬地賽馬會擺酒,嘩!我哩個大鄉里咁大個人未去過哩啲地方喎!


同主人家打完招呼後就四周圍八卦吓先!



哩個位係咪就係啲人拉頭馬影相嘅地方呢?



如果係跑馬日應該好熱鬧啊!



我哋坐張枱都幾好VIEW咖!



四周圍任何一個方向都係大電視呀!方便大家睇比賽呀!



2008年11月29日 星期六

越南五天團(第五天及後記)

19/11/2008(星期三) 天晴   胡志明市 香港


其實今日都冇行程,食完早餐喺就出機場返香港啦!


今朝我哋出去露天茶座食早餐呀!




食飽見重有時間我哋又走去街尾買法包呀!因為真係好好味呀!我重買咗四條冇餡齋法包返香港食,因為哩到啲法包個皮唔會硬到咬唔到,係外脆內軟嗰種,只不過VND3000.00 一條,即係HDKD1.50,真係底到爛呀!


哩個就係法包檔個靚女老闆嘞!佢好好人咖!



我哋去日本就買嘢買到要PACK箱啫,今次我真係估唔到都要PACK箱呀!因為我哋一家五口買咗好多扎肉同夫妻糕做手信呀!






隨住航機離開跑道,我嘅假期又圓滿結束嘞!而直到航班順利降落喺香港機場,我嘅驢仔生涯又隨即回復啦!








哩次旅程並冇任何驚喜,但好彩亦任何驚嚇,總括嚟講越南都係一個值得去玩嘅地方,最令我覺得舒服嘅係無論去到邊到我都可以好放心咁去洗手間!唔似得返祖國咁每次入洗手間都唔知有咩surprise比你呀!


越南比我最深印象係真係好多好多電單車同天空掛住好多好多電線呀!


而我最鐘意嘅地方係頭頓,好舒服好relax,好啦!又要比心機儲錢為下一次旅程做準備啦!


P.S. 哩張係postcard見到幾得意但我哋喺街就冇見過哩個情況



越南五天團(第四天)

18/11/2008(星期二) 天晴   胡志明市 美拖


今朝一早起身第一件事就係拉起窗簾望出去,嘩!不知咁天朗氣清,真係唔知打咩風啊!


今日食早餐酒店九樓,都算係附近比較高嘅地方啊!





食飽早餐就先去一個媽祖廟,亦係一個華人組織嘅會堂參觀。






逗留咗半個鐘到就出發去美拖市,要坐個幾鐘頭先到啊!


到咗美拖之後,導遊就安排我哋坐船遊眉公河。


碼頭



我哋就係坐哩啲船遊船河嘞!



哩個係我哋導遊呀!



好似細個喺鯉魚門見嗰啲住家艇呀!





啲水上電燈柱幾得意




坐咗一陣我哋就到咗一個冇椰子樹嘅椰子島

椰子島 (Coconut Island)


傳說當年有一位叫阮成南的人在這裏創立的天道教教壇,他結合基督與佛教自成一派,因他只吃椰肉及喝椰汁,因此被稱爲“椰子道人”。由於椰子道人以椰子為主要食糧,故稱椰子島。


導遊簡單咁介紹咗哩個教主嘅生平,但我哋聽咗之後有啲覺得佢有啲精神錯亂。但又可當笑話一則嚟聽吓 ,因為真係好好笑咖


佢喺島上豎立咗兩條柱代表咗南、北越(相中白色嗰兩條石屎柱),中間起條橋就等於佢統一咗南、北越。




佢都幾有錢咖!佢整定哩個鼎諗住做咗皇帝後就放喺皇宮裡面喎!查實哩個鼎係用一啲爛杯爛碟同埋爛茶壺貼上去咖咋


個鼎上面有教主自己個樣咖!



哩到有九條柱,周圍八條係雌龍,中間嗰條係雄龍,代表越南九條河,八條流入中間一條而中間嗰條代表佢自己喎!




哩個鐵塔教主銘名為九重塔,佢每日會坐住佢私家火箭 -上面印住阿波羅咖!先升空離開地球(相中籃色嘅波),再進入太空(相中黃色嘅波),最後就進紅色嘅九重塔,即代表佢進入九重天,然後就有教徒拷響下面黃色嘅鐘,就代表世界和平嘞!(註: 隻火箭喺教徒喺下面人手拉上去咖咋!)


咁佢每日喺哩到升升降降,發佢自己嘅春秋大夢,但終於有一日一不小心差錯腳喺九重天撻咗落嚟瓜咗!終年九十幾歲,哩濟就真係升天啦!但唔知佢係咪真係可以去到九重天嘞!





哩個神怪嘢真係幾無聊,但島上啲植物又幾靚啊!





離開咗椰子島島就上返船去泰山島嘞!


泰山島也稱水果島,島上有許多果園,木瓜、芒果 ... 等。



上面有個製椰子糖嘅地方,全部人手製造,即造即賣,但我就冇幫襯到啊!



之後同你去飲杯茶,食吓糖果抖一抖,實質係sell你哩個花粉蜜糖同連子。



然後又過隔離食生果,今次重搵人唱返兩支曲過你聽!一邊聽歌一邊食生果,但靚女唱嘅係 "不留洞拉",所以都唔知佢唱咩!不過啲生果好正呀!所以我哋都用咗USD1.00買咗個大木瓜返去今晚食呀!




食完生果就上船返去食晏啦!今日晏就食風味餐喎!


美拖名菜 - 1. 油泡幢企魚



用啲生菜包住啲魚肉然後點醬食 - 冇咩特別都係魚一條味道一般




美拖名菜 - 2. 恐龍蛋



咪即係炸大煎堆 - B女話以前過大禮都有啦!



最好味都係啲蝦,又甜又多膏呀!



食飽後就開車返胡志明市去埋最後一個行程 - 戰爭博物館






館內收藏咗好多美軍對待越南人嘅殘暴照片,但我之前喺網上已經略略睇過覺得好核突同殘忍,所以我冇仔細咁去參觀。





由於今晚嗰餐係自費,所以五點半已經車返晒我哋返酒店,阿導遊同領隊就可以收工嘞!咁我哋就返上房梳洗一下,六點幾就自己出去搵食嘞!都係喺酒店附近食咋!最後大家一致決定去試吓燒乳豬。


喺樓下遇到啲團友,佢哋話行咗成半個鐘都搵唔到食。吓!搵唔到食??? 哩頭都好多食市喎!略略指咗大槪方向有啲咩比佢哋知,我哋就走嘞!


門口有人列隊歡迎呀!



其他團友都跟我哋嚟哩到啊!一坐底就叫燒乳豬半隻,點知部長話冇得叫半隻只可叫一隻,一隻就要VND560,000.00,咁就唯有叫一隻加三杯青檸梳打啦!個部長好愕然我哋七個人淨係叫一隻豬三杯飲品... 係呀!唔得咩!佢好似有啲恥笑我哋咁呀!


但個女侍應就好好心機,將三杯飲品平均分咗七杯,人人有份!我哋冇叫佢咁做咖!係佢自己自動自覺咖咋!


真係即叫即燒啊!


豬仔嚟啦!燒得好靚呀!但好細隻咋!真係唔忍心食佢呀! He~He!又真係幾好味喎!



話咁快就食晒佢層皮嘞!當我哋唔知點起啲肉食時,個靚女侍應就嚟幫我哋攞去砌碎件。



再轉頭!陰功囉!隻豬搞成咁嘅下場呀!



最後埋單 - VND653,000.00 = HKD326.00



跟住同隔離團友講聲Hi & Bye,佢哋奇怪點解我哋咁快就走得,我話係呀!我哋淨係入嚟食隻豬之嘛!而家去後面街食河粉呀!佢哋即刻叫哎呀早知我哋跟你啦!


嘩...比你哋跟到我重得了... !


跟住我哋就去咗哩間食河粉嘞!



其實個個都飽咗一大半,所以我同大笨蛋兩人食一碗可粉,表妹同阿妹又食一碗,但阿B女就貪新鮮係都要叫個二人火煱,所以我哋就決定叫咗一個煱先,睇吓個份量有幾多先再叫。



好彩咋!原來哩煱嘢都幾大煱咖!如果唔係就真係大煱啦!



哩煱哩足足夠四個人食呀



哩到就食咗VND250,000.00 = HKD125.00


今晚食咗成九十萬,大家都攬住個肚好滿足咁返酒店沖涼瞓覺嘞!臨返酒店前再去街尾買條法包先返去啊!食埋條包先瞓真係好飽呀!