2011年7月27日 星期三

匆匆忙忙沖繩四天團 - Day 4.3

行到一點半就到領隊約定嘅地方食飯,哩間餐廳都幾出名啊!我見好多自由行嘅人都會嚟哩到食咖!

因為餐廳都幾多人幾full,所以要同團友夾枱坐,領隊又再一次安排妹妹仔跟我哋坐,出水痘嗰個就跟佢自己坐,由於妹妹仔有本事可以將條菜燒到出火,為免佢搞極都無得食,我哋唯有出手燒埋比佢食,所以都唔記得咗要影相呀!

臨尾影返張先!


哩到啲食物選擇都幾多啊!淨係飲品都有好多可以揀呀!












食完飯後準備坐車去outlet,喺等旅遊巴嘅時候,由於出水痘嘅妹妹仔唔會同我哋出機場,所以佢留喺餐廳到等酒店消息,領隊都算係咁啦!見到佢無錢交酒店費同嚟緊個星期嘅生活費,就借咗十萬円比佢,當時佢當住我哋咁多團友數錢比佢,我諗佢係想我哋幫佢做個證明,佢真金白銀咁借咗十萬円比佢啊!
雖然只係相處幾日,同枱食過幾次飯,但見到佢咁嘅情況,一個人重病緊咁要留喺一個陌生地方,真係唔係好放心啊!大家嚟個擁抱同安慰一吓之後,我哋就懷住唔安樂嘅心情離開餐廳繼續我哋嘅行程啊!搞到我都差啲喊出嚟呀!
(後話:由於實在唔放心,返到嚟香港幾日後有搵領隊問妹妹仔嘅情況,領隊話妹妹仔已經退燒同埋好得七七八八,而且重識到人出咗去玩,咁都放心啲啊! 不過好似話妹妹仔嘅屋企人關於借錢嘅事唔多認數,佢叫我如果有咩事要同佢做證,所以當日佢當住咁多人先比錢妹妹仔都啱啊!希望只係一場誤會啦!)
[2011年7月31日: 個領隊終於可以攞返啲錢嗱!不過佢要同妹妹仔啲屋企人講如果唔還就報警先肯還啊!最後都係搞到不歡而散呢!]


由國際通出發只係幾個字嘅車程就去到Outlet嘞! Outlet對於我一向都無咩吸引力,如果係自己去我一定唔會去outlet啊!一個鐘頭對於我嚟講時間太多了。
哩個outlet地方唔算大,價錢唔算平,貨品唔算新,outlet outlet,啲貨當然out out哋先襯吖嘛!



有輛小火車比小朋友坐。


哩個女仔喺到將啲玻璃用手畫上圖案做裝飾,畫得幾靚啊!


去咗間手信店行吓。


未嚟嘅時候好想買一對石獅子,但嚟到嘅時候見到又好似無無謂謂,到最後買咗哩個鎖匙扣都幾好啊!


好嘞!最後一個行程就係去赤嶺駅坐一個站嘅單軌電車去機場。

一上到月台就有車,要拿拿臨跑上車啊!








好快就到咗機場啊!


哩個喺那霸空港駅嘅指定影相位。


過條天橋就係那霸機場國內線。


我哋當然唔係去哩到上機,我哋先上返旅遊巴再過去國外線機場。由於機場真係好細,我哋到起飛前半個鐘先入閘到候機室。


候機室只有一間細細嘅免稅店。



黃昏時分,終於要踏上歸途嗱! 沖繩我會再嚟啊!


前幾年成日都覺得沖繩曾經比美國佔領過,哩到會比較西式,無咩好睇,但今次嘅到訪,沖繩令我有另一番感覺,雖然今次只係跟團,但感覺都幾好玩,成個行程都好relax,總括嚟講沖繩都好值得嚟玩,如果識揸車,沖繩好啱自駕遊,但好似我咁唔識揸車而要自由行,就要查好晒啲巴士時間表啊!否則會擔誤好多時間啊!

                                                                                                                            ...... 完


匆匆忙忙沖繩四天團 - Day 4.2

離開魚市場就向國際通進發,哩到安排咗兩個半鐘比我哋,如果唔係第一晚已經行咗一啲我哋嘅目標地方,淨係得兩個半鐘真係唔夠時間,我之前睇blog見個有人講過,國際通條街唔長,比男人行兩個鐘頭夠有餘,但比女人行行兩個星期都唔夠時間行啊!而家我哋只係去返一啲當晚我哋想去但又收咗舖嘅地方。

我同細妹領隊未開始介紹國際通有咩行已經急不及待先離隊行先,講真哩條街我未出發前已經Googlemap好多次,再加埋前幾日實地行過,絶對唔會盪失路啦!

第一目標都係藥房,沖繩唔似得東京、大阪咁四周圍都係藥房,哩間全國都有分店嘅藥房都喺幾年前喺哩到開分店,佢樓高兩層,樓上賣啲貴價嘅護膚品,樓吓就一般嘅藥品、護膚品同護理產品,我嚟之前已經知道佢嘅貨品種類唔會太多,不過又真係估佢唔到連最普通我要搵嘅嘢都無啊! 比起三越旁間雜貨店重少,而且價錢亦比嗰到貴啊!枉我重行到國際通街尾添呀!



所以都係決定再返去三越隔離間舖,而且佢樓上嘅100円店我哋嗰日因為夠鐘收舖都未去睇,掛住買嘢唔記得影相啊!100円店有食品用日用品賣,佢哋啲食品真係好底,限定黑糖百力滋、紅芋百力滋、限定薯片,全部都100円,喺到入貨用嚟做手信都幾好啊!



然後就去平和通商店街,哩到都係好多手信店,其實行多幾間,基本上間間賣啲嘢都好似差唔多,分別在價錢,有時間可以行多幾間格吓價,有時啲商品差唔多但價錢可以差好遠啊!



哩啲貝殼做嘅燈罩好靚啊!又唔太貴,真係想買返個返嚟呀!不過佢嘅插頭唔啱香港用,買返嚟又要改先用得,所以都係放棄咗,又再一次影咗當買咗啊!

平和通商店街內有一間好出名賣塩嘅專賣店,裡面啲塩真係好多品種咖!

我見啲人喺咁試塩,咁試法咪鹹死囉!雪塩喺沖繩最出名,但最後我一啲都無買啊!影咗當買咗啦!




我哋喺商店街內見到有間又係好似雜貨店咁,估佢唔到哩到有晒我要搵嘅嘢,價錢重平過之前間大藥房添啊!








搵齊嘢要搵嘅嘢後,就去位於商店街內嘅牧志市場,去哩到因為想睇沖繩出名嘅海產 - 「夜光貝」,如果自己嚟,可以喺市場下層買咗海鮮,然後攞到二層嘅餐廳加工,加工費係500円一個人。但由於我哋一陣重有團餐食,所以無幫襯,純粹嚟見識吓。





哩到啲豬頭都係遊客影相嘅對象啊!不過我搵唔到一隻戴黑照嘅豬頭,佢喺啲網到好Heat咖!個個都影佢咖!




另外哩啲比人剝晒皮嘅魚好肉酸呀!



我最後都忍唔住用550円買咗兩隻苦瓜返香港呀! 真係好好食呀!個海葡萄就嘛嘛哋,好鹹唔係好啱我口味啊!



哩日天氣真係好悶熱,哩兩個幾鐘真係行到大汗疊細汗,又熱又攰,行街真係唔係我強項啊! 買兩杯嘢飲解吓渴再行過。

士多啤利汁同苦瓜蘋果汁,我本來想淨係買苦瓜汁咖!但老闆娘講咗好多嘢,我諗意思係淨係苦瓜汁會難入口,所以叫我加蘋果一齊飲,味道真係唔錯啊!

飲完嘢繼續行,嚟沖繩食牛就要食石垣牛。

沿途都好多T-shirt店,價錢唔平但覺得啲質地嘛嘛哋啊!

Kitty專門店,第一晚嚟嘅時候姍咗門,而家嚟影返夠本。


哩間御菓子店四周圍都有分店,未過去嗰陣重諗住會喺哩到買手信,但試食過後又覺得啲產品嘛嘛哋,所以最後連舖頭都無入啊!不過哩啲只係我個人意見,朋友們如果去到不妨自己試試,可能會啱你哋口味啊!



因為哩日係星期日,所以國際通會喺十二點後封路成為行人專用區。



唔明點解熱到好似個火爐咁佢哋都可以喺條咁曬嘅街上面玩啊!

                                                                                                     

here
                                                                                                        續  ...... Day 4.3