2014年5月17日 星期六

出發啦!2014白濱、和歌山、有馬溫泉遊

終於到咗出發嘅日子啦! 點吓有無帶漏嘢先!
自家製手冊、電子機票、JR預約信、預約住宿信,日元當然唔少得啦!今次對換價係0.07575,都唔錯吖!


今次租咗個Pocket Wifi過去,HKD70.00一,唔知個網路接收得好唔好呢?!

希望一切順順利利吧!

2014年5月10日 星期六

預計行程(5~8日)_2014白濱、和歌山、有馬溫泉遊

重有一個星期就出發啦!心情既興奮又緊張呀!繼續預演一吓行程。

行程第五天 (難波  神戶三宮 → 有馬溫泉)
哩朝一早先同大笨蛋去難波八阪神社,因為覺得神社外型好似隻老虎咁好得意想去睇吓!幾位靚太無謂跟我哋走嚟走去啊!之後返酒店接返佢哋,之前講過因為機票套票嘅酒店訂唔唔難波東方酒店,所以麻煩一點先去心齋橋日航酒店放底大行李先!

表妹哩日要先離團返香港,所以同佢道別後就得我同大笨蛋帶住三位靚太出發去神戶三宮食牛嘞!

食完神戶牛之後就會前往有馬溫泉,之前試過坐阪神電鐵,又試過坐覽車上六甲山再坐吊車到有馬溫泉,今次唔想三位靚太移動太多,所以選搭JR巴士有馬エクスプレス,一程車唔使上上落落,應該比較適合佢哋。


到咗有馬溫泉後,就喺溫泉街走走,然後到酒店Check in,哩晚會住有馬ロイヤルホテル (有馬皇家酒店)。

行程第六天 (有馬溫泉  神戶三宮 → 心齋橋)
又係瞓醒覺食個早餐浸個溫泉就離開有馬溫泉,都係會坐返巴士去三宮。

跟住會喺神戶市內走走

三點多就返心齋橋日航酒店Check in及稍作休息。

黃昏活動及晚飯都係喺心齋橋、道頓堀一帶。又一天Hea住完成。

行程第七天 (心齋橋  富田林→ 心齋橋)
哩一日原本計劃咗去鶴見綠地花博紀念公園及溫室,但因為睇咗GO!JAPAN嘅月刊,所以改咗去富田林市農業公園サバーファーム 。跟據資料顯示,公園有花睇、有士多啤利摘,有整大福嘅體驗課,好啱三位花痴靚太。

比足大半日時間佢哋,四點後離開返大阪心齋橋。

返到心齋橋照舊返酒店稍作休息,然後心齋橋、道頓堀一帶作最後衝刺,有咩想買就盡情咁買埋去。

行程第八天 (心齋橋  黑門市場 → 関西空港香港)
到咗行程最後一日,無咩行程安排,應該會去黑門市場道具商店街走走,跟住食埋個晏就就坐南海電鉄往機場準備乘搭六點開出嘅客機。


就係咁八日行程Hea住咁完成嘞!希望一切如計劃一樣,順順利利令各位團友玩得開開心心。



2014年5月4日 星期日

預計行程(1~4日)_2014白濱、和歌山、有馬溫泉遊

距離出發日期越嚟越近,雖然話今次去嘅地方比較大路,交通安排比較容易,但不竟帶住三位退休年齡嘅靚太,都唔希望會出太大錯誤,其實都有一點點壓力啊!

好,咁就預演一吓將會出發嘅路線先!

行程第一天 (香港  関西空港 白濱)
坐國泰凌晨機前往関西空港。頂計航班早上六點多到達。如一齊順利,應該七點可以完成入境手續。
首先會到JR綠色窗口換購JR Kansai Wide Area Pass

搞掂Pass後可以坐関西空港前往日根野再轉乘特急くろしお1号(新宮行)到白浜。

到達白浜後在JR白浜駅前購買明光バス兩日劵。

先到酒店放底行李再前往三段壁。完成三段壁行程後可以坐巴士回程到酒店附近嘅白良浜一帶閒逛。當晚入住南紀白浜温泉 旅館むさし (武藏),地點位於白良浜旁邊,所以到附近御舟足湯同圓月島睇日落都好方便。酒店對面重有間24小時營業嘅超市(Gourmet City / グルメシティ白浜 白良浜)同埋足湯橫丁可以行夜街。

行程第二天 (白濱)
哩一日無咩行程,瞓醒覺食個早餐,浸個溫泉就check out轉去另一間酒店。哩間酒店係成個行程嘅重點同埋價錢最貴嘅一間 - 南紀白浜 浜千鳥の湯 海舟

利用明光巴士兩日劵先到海舟放底行李,再到隔離千疊敷走走。其實三段壁離開哩到都好近,但我想今日盡量早點返酒店享用酒店嘅設施,所以先喺前一日完成三段壁嘅行程。

離開千疊敷就坐明光巴士去とれとれ市場(白濱海鮮市場),預計幾位靚太可以喺哩個市場消磨數小時,所以晏就都會喺哩到買海鮮在場外BBQ。
                              
食飽飽就可以返酒店check in,之後大家自由活動,想做咩就做咩!酒店內有三個免費貸切風呂、一個大浴場+露天風呂同埋一個面對太平洋嘅男女混浴風呂。要每個浸晒都有排玩呀!

安頓好晒佢哋之後,我自己會到崎の湯走走,因為問過其他團員都不大興趣,所以只有我自己到此一遊,不竟哩到喺白濱嘅地標,亦有千多年歷史嘅古溫泉,一定要嚟睇睇先心息啊!
                             
第二日嘅行程就係咁hea住完成嘞!

行程第三天 (白濱和歌山)
照舊瞓醒覺食個早餐,浸個溫泉就check out。跟住會離開白濱,利用JR Kansai Wide Pass乘坐特急くろしお14号前往和歌山。

到酒店放底行李後就到和歌山城及和歌山市內遊覽。


晚餐後就回酒店休息,當晚會入住天然温泉 紀州の湯 ドーミーインPREMIUM和歌山,佢同第二晚住嘅海舟係同一個酒店集團管理。

第三日行程又完成啦!

行程第四天 (和歌山貴志川 和歌山難波)
同樣地瞓醒覺食個早餐,浸個溫泉就check out,不過哩朝早餐酒店唔包要自己準備。然後到酒店大堂寄存行李或將行李存在JR和歌山駅內存物櫃,咁就唔使返轉頭到酒店攞行李。

預計乘坐和歌山電鉄9:44 或10:18由和歌山開出嘅主題列車- 草莓列車(粉紅色) / 玩具列車(綠色),本來我係想坐玩具列車同小玉列車,但原來預計當日小玉列車係停使,前一日到埗有小玉列車但又無玩具列車行使,而且我預約咗哩一日去貴志川摘士多啤利,真係令我兩難呀!



由於預約咗11:00到貴志川観光いちご狩り園摘士多啤利,所以到咗貴志駅就先去果園,返轉頭先到貴志駅探訪小玉駅長。
回程嘅列車好似只有玩具列車(綠色)比較啱時候,真係選擇唔多。



其實哩日係充滿變數,因為我唔知道可唔可以成功預約到摘士多啤利(詳情哩篇講過),如果唔成功的話可能會取消到貴志駅而改去黑潮市場或之前一日前往,因為有團友真係好想坐小玉列車。

完成咗和歌山嘅行程後,會喺大約三點離開返回大阪難波。哩程亦係可利用JR Kansai Wide Pass最後一程乘坐[特急]くろしお20号

返到難波後先到酒店check in及稍作休息,之後就可以到心齋橋及道頓堀行街食飯,第四天行程又完成啊!

哩晚會住 なんばオリエンタルホテル (難波東方酒店),我每次到難波都係揀哩間酒店,因為佢地點實在方便,不過今次機票酒店套票訂唔到哩間,三個月前已經滿晒,所以最後嗰兩日要轉去大阪日航酒店啊!