2014年9月29日 星期一

Day 5.2 晚飯@有馬ロイヤルホテル

2014年5月22日 晴天
10:44~10:51 | [大阪市営]御堂筋線 江坂方面(上り) 心斎橋 →梅田
11:30~11:57 | [阪急]神戸本線 三宮方面(下り) 梅田 → 三宮
12:38~12:49 | [普通]神戸市営西神・山手線  三宮 →谷上
12:51~13:02 | [普通]神戸電鉄有馬線 谷上 → 有馬口
13:04~13:08 | [普通]神戸電鉄有馬線 有馬口 →有馬温泉

(交通收費及詳細資料請往交通篇)
酒店:有馬ロイヤルホテル

準確七點就落餐廳食飯。


可能酒店唔係好多客人,所以酒店安排咗一間大大大房比我哋五個人,門口重放咗我個姓啊!一定唔會入錯房。


睇吓有咩食先!


放到一枱都係嘢

哩啲係咩我都唔記得啊!

魚生就唔錯,一啲腥味都無。

豆腐煱啱我。

生肉鍋係我揀哩個住宿套餐嘅主菜。


咩嚟呢?唔係好記得啊!


哩個有啲難入口,好似啲濃濃嘅芡汁咁。

櫻花蝦湯,無味!

哩碗飯比較上年嚟住嘅菇水飯好食好多。

一個唔錯嘅甜品結尾。

雖然唔係樣樣都啱食,不過哩餐真係都唔錯,食得好飽好滿足,三寶重食得好開心添呀!可能見佢哋開心,所以哩餐好似好味咗呀!

食飽抖咗陣又再去浸溫泉,大概十點就去瞓,真係好少旅程可以咁正常時間去瞓啊!


Day 5.1 難波 →三宮→有馬溫泉

Day 5.1 難波 →三宮→有馬溫泉
2014年5月22日 晴天
10:46~10:54 | [大阪市営]御堂筋線 江坂方面(上り) 心斎橋 →梅田
11:30~11:57 | [阪急]神戸本線 三宮方面(下り) 梅田 → 三宮
12:38~12:49 | [普通]神戸市営西神・山手線  三宮 →谷上
12:51~13:02 | [普通]神戸電鉄有馬線 谷上 → 有馬口
13:04~13:08 | [普通]神戸電鉄有馬線 有馬口 →有馬温泉

(交通收費及詳細資料請往交通篇)
酒店:有馬ロイヤルホテル

朝早起身食早餐後,便走過去隔離睇吓三寶搞成點,點知敲極門都無人,哈!突然諗起房出面嘅露台係相通,走出去睇吓佢哋搞咩鬼,原來無晒人,我諗佢哋落咗街。如果有機會嚟哩到,但隔離啲人係唔識,要記住鎖好露台嘅門同落返窗簾,因為真係可以去到人哋嘅房咖!

原來三個花痴落咗去平台嘅花園賞花兼做運動。

表妹落去叫佢哋返上嚟影返張合照先!

原本諗住去完有馬返嚟都係住返喺到,但因為過兩日嘅房都比人訂滿,所以要住日航店,咁襯表妹而家重喺到,多個人推行李,所以我哋喺出發去有馬前先將攞啲行李過去日航酒店。

如果搭地鐵過去要又上又落,我估計行過去嘅路程唔係好遠,所以就一行六人五個喼徒步過去,不過哩個係一個錯誤嘅決定,有團友不繼埋怨路途遙遠好辛苦。

朝早嘅道頓堀無咩人行得好舒服。

行吓停吓,終於搞咗成個鐘先到達日航酒店。喺櫃檯安排好啲行李後,同表妹「道別」就出發去有馬溫泉,最原本計劃係先去三宮食個神戶牛,但因為哩幾日餐廳booking都滿晒唔做我哋生意,唯有睇吓另一間心水餐廳walk in 有無位。

我哋先喺心齋橋坐[大阪市営]御堂筋線到梅田

再由梅田坐[阪急]神戸本線前往三宮,十一點幾就順利到咗三宮。

另一間心水餐廳就係車駅對面,一出車駅就已經見到餐廳門外排咗十幾個人龍,大家商量過後都唔係太想等,所以決定先到有馬再食晏。

經驗所知由三宮去有馬如果坐電車的話要轉三、四次車,我想三寶舒服啲所以諗住今次坐巴士入,但巴士要到下就一點幾兩點先有車,如果食完晏入去就非常配合,但而家唯有搭返電車吧!

臨時改搭電車,要憑幾年前嘅記憶諗返邊個駅上車先啱,因為幾間鐵路公司嘅車駅都係叫三宮,淨睇指示牌都搞到頭暈暈呀!好彩都順利搵到。


係哩個地下鉄三宮駅呀!

由三宮至有馬嘅車程及轉車情況可以睇返我之前兩篇網誌,哩到唔再重複講嘞!

不斷咁轉轉轉,好快又到達目的地啦!入到嚟一點幾,食晏時候到,見到車駅旁有間唔錯嘅舖頭,問過三寶佢哋都覺得啱食,所以就喺到食啦!


小小嘅店舖

簡簡單單叫咗幾個餐,價錢唔貴但全部都好好味。



食飽飽之後就同三寶喺有馬商店街略為遊一圈。

太閤橋

有馬川

有馬名物 ~ 有馬溫泉碳酸汽水,上次入住有馬奧の坊時,酒店有得送比住客飲,當時覺得嘛嘛哋!所以唔會再買嚟飲啊!

有間懷舊玩具店

哩啲玩具重有人玩嗎?

玩具博物館,嚟第三次有馬都係無入到去參觀,有啲可惜啊!

金湯

天神社 ~ 天神泉源

御所泉源

嚟到御所泉源就差不多去到酒店位置,由於行嘅都係向上斜斜嘅小路,姨媽睇嚟已經支持唔住,所以係時候返酒店等佢哋休息休息吓啦!


去到酒店,好快就完成Check in 手續,服務員一粒英文都唔識,佢不斷咁用日文同我講解酒店設施,用餐地點,溫泉地點時間,我一粒日文都唔識,但唔知點解我好似知佢講咩咁!佢一邊講,我一邊解釋比三寶知。連男、女溫泉會因應時段調轉位置我都好似聽得明咁,三寶幾讚嘆,其實去得多,就知佢哋講嚟講去都係咁上下嘅嘢,加埋身體語言都應該唔會錯得去邊啊!真係好唔明就會用漢字同佢哋溝通,都目前為止都好似幾work啊!

大家上房休息一吓就去浸溫泉,照爽呀!完全無人,我哋又包場呀!我揀哩間酒店都係因為哩個金湯,2012年去奧の坊嘅金湯無哩個咁正呀!飯前飯後臨瞓都去浸吓。

浸完返房發呆,睇風景,真係好hea,但係好舒服、好 Relax。



有馬溫泉嘅面貌

買咗士多啤利,開飯前食咗佢先!

又喺下面手信店買咗啲布丁,係神戶名物,好食就買啲返去做手信。

抖多陣就準備食晚飯啦!


2014年9月28日 星期日

有馬ロイヤルホテル

有馬ロイヤルホテル
〒651-1401 兵庫県神戸市北区有馬町987
TEL 078-904-0541 
E-Mail:info@arimaroyal-h.com


2 部屋【和室8畳】一泊二食
71,000 円(税込・サービス料込) / 入湯税大人150 円

哩間酒店喺2007年我已經到訪過 (京都、大阪八天遊 - 第五天 下),我覺得哩到嘅環境同溫泉都唔錯,唯獨晚餐不太合口味。佢價錢比同區其他溫泉酒店略為平,而且近年房間重新裝修過,所以今次就再揀返哩間啊!

酒店位置都幾方便。


酒店大堂


小小手信店

餐廳

食飯嘅時候安排好嘅位置會掛上名牌

男、女溫泉區


哩個就係有馬溫泉出名嘅金湯啊!



好啦!上房睇吓先!


入去啦!

一個客廳,一個睡房,好寬敞啊!



每間房都有張按摩椅!可以幫我哋消除一日行程嘅疲勞呀!


洗手間同浴室分開的。


溫泉酒店嘅浴室通常都用唔著啊!