2010年5月28日 星期五

電療開始啦!(第一至十二次)

1052010 ~ 12052010 (第一至二次電療)

噚日已經開始咗電療!我比預約時間早15分鐘到,我被安排喺哩到嘅七號機做治療。

由於係第一次,所以個治療師好詳細咁講解治療嘅過程,佢話我會喺七號機做二十五次治療,之後會轉去另一部機再做多六至七次就可以完成療程,之後佢就指導我去邊到換衫同擺放用完嘅袍,換好衫就等叫名,都好快啊!等咗幾個字就叫名入去放射治療室。


治療室內有兩個男治療師負責喺我身上度位同調校電療機,另外重一個阿嬸企喺一邊,我好似上次做設計時咁樣瞓上張特別嘅床上。真係有啲緊張呀!


由於係第一次做治療,所以就用多咗時間將定咗位嘅資料輸入電腦,其中一個治療師亦用紅色水筆喺我要放射嘅位置畫咗幾個十字,一切準備就緒治療師同阿嬸就離開治療室,剩返我一個後就可以開機開始治療嘅過程。


由於副射嘅強光會傷眼,所以全程我都係合埋雙眼,只聽到一啲機器嘅聲音,我覺得大概十分鐘,治療師就入嚟話治療完成走得啦! 聽日再返嚟繼續啦!噢!原來都冇咩嘢啫!


治療師話頭兩個星期應該唔會有咩特別唔舒服,所以三星期後先會安排見醫生,而兩星期後電療位置會出現紅腫,到時就要小心處理啊!


             


13052010 ~ 20052010 (第三至七次電療)

電咗七次暫時冇咩特別唔舒服,只係已經唔痛嘅傷口經過幾次嘅電療又開始有啲“咭咭”痛,同埋一向都唔怕熱嘅我,三十幾度都可以唔開風扇,但而家成日都覺得個人好“慶”,問過治療師,佢哋話係正常喎!

本來今日可以做第八次,但啱啱收到醫院電話話今日部電療機壞咗要停一日。 嗱! 咁個療程又拖遲一日啦! 我重諗化療要睇抽血報告所以好難控制, 電療就唔會有哩啲情形, 點知今次唔係我唔得係部機唔得, 真係....... !


唯有當比個傷口休息一吓, 下星期一再繼續啦!

    

    

 24052010 ~ 28052010 (第八至十二次電療)

療程去到三分一啦!被電嘅位置已經出現咗一個淺啡色A4 size大嘅哄,開始有好輕微嘅刺痛,但唔嚴重,暫時情況都尚可以接受。

因為每日接受治療嘅時間通常都一樣,所以喺醫院會遇到幾個排喺我前面或後面嘅病友,大家都會傾吓計交流吓心得,尤其哩個搽唔搽Gel 嘅問題,醫生就一定吩咐咩都唔好搽,但有啲電咗十幾廿次話要喺未紅瘇時就要搽定啲Gel以防發炎或甩皮,又有啲話冇咩事就唔好搽,最初我都唔知搽唔搽好,最後我決定冇咩嘢都係唔搽,因為搽咗又要洗,咁喺洗嘅途中都會產生磨擦,對個傷口都係唔好,所以都係唔好搞咁多嘢嘞!

而家繼續有睇中醫,好多嘢都唔食得要誡口,但自己太為食,一時忍唔住口食咗啲凍嘢,哩兩日隻腳又有少少腫返,而且用手指咁咗落去,啲肉唔識彈返上嚟呀!

(後加:哩張相放咗出嚟之後,因為角度問題,令到好多人都誤會我隻腳真係好腫,其實正面影都只係腳眼有少少腫啫!多謝大家關心,請放心啊!)









變黑咗嘅手指甲就開始退色,慢慢變返粉紅色。

而個光頭亦開始長毛毛啦!但如果要流返以前咁長就有排等啊!一年都唔知得唔得呢?

                     


2010年5月18日 星期二

少少編織分享

繼上次因手痕所以拾起好耐無用嘅編織工具出嚟織咗件衫後,條引一時不能收起,所以一口氣織/鉤多咗幾件過一過手引啊!

哩件係第一件想鉤嘅款,但因啲線太糼中途都放底咗一段時間先再繼續,所以斷斷續續成兩個月先完成啊!不過唔知點解條貼係都要紐紋呢?




有朋友就快生小B,所以織咗哩件衫仔比佢做禮物,因為要送比人,所以哩件比較有心機,如果自己嗰啲我通過都會好懶唔多會收埋啲線頭,但哩件真係收好晒,底面都見得吓人咖!


重比我搵到個盒,PACK咗都好似喺街賣咁啊!(
wo20.gif image by macaoraymond
又喺到自己讚自己嘞!)


哩件幾年前都已經想織,但當時無時間,而家終於如願啊!


哩件之前都POST過啊!




完成咗哩幾件後,我諗都會有排唔再織嘢住啦!因為哩啲製作都幾費神啊!










2010年5月10日 星期一

100510 終於可以開始啦!

啱啱收到醫院電話嘅通知,聽日下午可以開始電療啦!

心情既興奮又緊張啊!興奮係終於可以開始啦!咁即係話如無意外六月尾就可以完成晒療程;緊張嘅係因為未試過唔知會點呢?

不過無論如何都係開心啊!

2010年5月6日 星期四

160410 ~ 060510 等待...等待...等待...!!


等待真係一個好悶、好心煩嘅時刻。 自三星期前見咗電療醫生後,就一直喺屋企等電話通知開始電療日期,但足足等咗三個星期都音訊全無。前幾日忍唔住打電話去醫院追問,佢哋留底咗我個名話check吓先轉頭覆,但最後都係石沉大海,打多幾次連電話都冇人聽或打唔通,唉....都唔知佢哋想點....! 咁搞法幾時先可以完成晒啲療程呀??  好煩呀!

哩個星期對腳重腫到好似豬蹄咁,行路都冇力,星期一返咗醫院抽血後,正式完晒化療嗰六個療程,所以就可以開始睇返中醫,由於之前啲化療藥太勁,醫生話我啲內臟件件都唔係太好,哩個亦係引至腳腫嘅原因之一,唯有而家慢慢調條理返,續件續件拾返好啦!真係好煩呀!




P.S. 07/05/2010  5:00 P.M.
我今日密集式咁打電話去醫院追問佢哋開始電療日期,終於收到佢哋嘅回覆,係設計同埋量度電療嘅程序啱啱完成,File亦去到電療機嘅部門,但而家嘅電療機仍然排滿晒,所以未有空位比我住,不過佢話我係排喺龍頭,如果下星期有人完咗個療程,咁就會到我喎! 講咗一大輪最後個答案都係:「你繼續等電話啦!」

無奈!!