2010年1月31日 星期日

260110 ~ 310110 沮喪後再努力!

喺星期一覆診後,因打針失敗所以B女為咗盡快增加營養,當晚就整咗好多好嘢比我食,當中包括花膠海參煲豬展、煎牛排,但由於我未病前嘅食量唔算大而且少肉,家陣霎時間食咁多嘢落去又加上心情嘛嘛,所以一食落去後疑似食滯咗,期後兩日又做一條嘔吐獅子魚,連只係飲奶粉都嘔返晒出嚟,個人又好倦,每日瞓二十個鐘,狀態好似打咗化療針咁,亦因為咁所以心情都好差。

       

好彩哩個情況只係維持咗兩日,星期四開始可以食返嘢,再加埋做運動,個人都精神返。

而家一日食六餐,早、午、晚三餐,每餐中間都飲一餐奶粉,因唔鐘意飲奶粉,所以之前偷雞每日只係飲一次,而家要跟足啊!跟住再喺六餐之間加插水果同飲花生衣煲水,扣起十至十二個鐘頭瞓覺,計埋計埋我差唔多個個鐘頭都要食嘢落個肚到,基本上佢都冇機會有肚餓嘅感覺啊!希望啲白血球接收到晒乖乖啲反彈啦!

噚日收到同事寄嚟嘅慰問咭,真係令我好開心啊!好似幫我打咗枝強心針咁呀!好多謝佢哋嘅支持啊!

    
  

咭裡載滿同事們嘅關心同鼓勵,真係好窩心啊!

希望聽日都係可以順利打到針啦!

 

2010年1月25日 星期一

250110 失敗咗!打唔到第三針啊!

今朝照舊九點返醫院抽血,然後下午兩點返去見醫生,今次哩個係一個好串嘅女醫生,佢話我今次嘅白血球指數底過要求而且肝功能亦下降咗!如果堅持打枝化治療針落去,感染風險會好高,所以佢今日唔比我打針。                              

我問佢可唔可以打補血針(阿輕佻醫生成日叫我自費打)幫助吓,佢又話我未到要打補血針嘅地步,講咗一輪最後都係要推遲下星期一再返去抽血覆診,睇吓到時白血球報告點先決定點做。

唉!我已經咩都做齊咖啦!但到係得出咁嘅結果,我都唔知重可以做啲咩啊!

                                   

2010年1月24日 星期日

160110 ~ 240110 平安渡過了!

哩個星期無驚無險又過咗啦!重養肥咗三磅添啊!


而家最頭痛係隻右手血管自上次打針後腫咗直到而家重未消腫,咁即係聽日就迫住要用做過手術嘅左手嚟抽血同打針,但之前姑娘曾講過做過手術嘅手要避免打針、抽血及量血壓,我都唔知點算好,唯有等醫生決定啦!


希望聽日一齊順順利利可以打到第三針啦!


2010年1月15日 星期五

120110 ~ 150110 買咗新玩具啊!

胃口、體力、精神都開始恢復正常,所以又開始不斷咁食、食、食!


唔精神時通常係B女媽咪返工前煮好嘢啲早餐同晏就,然後慶住等我起身食,咁家陣冇咩嘢就自己整啦!又可以打發吓時間,又唔使佢做咁多嘢啦!不過我唔係好識煮嘢食咖咋!


我比較鐘意食粉,今次好似送多過粉啊!


賣相嘛嘛,不過味道都OK啊!


睇過好多資料,除咗要食多啲嘢吸收營養外,其實重要做運動去增加抵抗力,咁我都有落街做運動,而我嘅運動模式係急步行半個鐘至九個字,但有時又落雨,有時又好凍,落一落公園又要換衫、戴帽、戴口罩,好似好煩咁呀! 諗諗吓如果可以喺屋企做就好啦!


於是上網搵吓有冇啱心水嘅跑步機。 哈!比我搵到部唔係好大部又唔係好貴嘅跑步機,雖然我未試過喺網上買嘢,但實在太吸引啦!所以好快就完成咗購買過程,噚日落單,今日送貨。


新玩具到啦!


砌好後放入房都OK喎!



摺埋收起牆邊都唔係好阻訂。



其實今次下決心買部機返嚟做運動,除咗係為而家方便外,亦希望方便將來復工後放工返嚟做,因為知道長遠計係一定要keep住做運動先可以令自己嘅抵抗力加強,以前實在太懶,所以由而家開始要改咗哩個壞習慣啊!


             我要努力!  

   我要加油! 


2010年1月11日 星期一

050110 ~ 110110 又捱過咗嘞!

打完第二針到而家啱啱一個星期,由於今次食咗隻勁嘅止嘔藥,所以已經冇出現嘔嘅情況,但原來唔嘔亦唔代表會好過! 因為作悶同反胃嘅感覺仍然係有,只不過係嘔唔出,所以個胃會漲住好唔舒服。

再加上B女見我唔嘔,打完針第二日已經不斷咁整啲好嘢比我食,變咗所有嘢喺體內頂住出唔返嚟,足足滯咗幾日。同埋今次哩針感覺好倦同好頭暈,所以每日都瞓十幾、廿個鐘,搞到個人好呆。下次都係唔好咁快食咁多住啊!

今日總算精神返啲, 雖然都重有啲頭暈、個胃悶悶, 同埋手背至手臂血管有啲踵痛, 但比起過去嗰星期已經冇咁辛苦啊! 我當又捱過一關咖啦! 而家又要食、食、食, 做好準備等25號打第三針啊!   

      努力…!  

 

      努力…!

 

 

2010年1月4日 星期一

040110 第二針化療針

今日一早九點幾就返到醫院抽血,然後到下就兩點幾再返去見醫生,又係上次個輕佻醫生,佢話我嘅白血球跌至境界線,如果再低啲就打唔到哩一針,真係好險呀!我已經不斷咁食嘢,但都係唔係幾得咁喎!點算?? 第一針已經跌到咁底,跟住落嚟啲點算呀?

唯有今次真係試埋飲奶粉睇吓會唔會好啲先,另外我又叫醫生開隻勁啲嘅止嘔藥,因為上次嗰隻真係唔掂啊!醫生話有隻好勁嘅,不過要自費喎!如果係好自費都要啦!

哩隻就係自費嘅止嘔藥,HK$624.00得三粒,真係貴到痺啊!不過希望有用啦!



除咗止嘔外,今次亦都開多咗好多其他藥,因為白血球好低,所以要食抗生素又加啲胃藥,另外又因為上次勁頭痛又唔敢亂食藥,所以醫生亦比咗好多頭痛藥我啊! 一大堆藥感覺上好似底返啲啊!

照舊打完六針之後就吊包包。

搞到五點九先完成晒成個過程,今次打完隻手啲血管好痛呀!姑娘話可能血管對啲藥水敏感咗同埋天氣凍,所以血管收縮引至到哩啲唔舒服,過一段時間會冇事啊!

而家隻手有啲痛、個胃有啲漲、個人有啲倦之外都暫時冇咩特別啊!

2010年1月2日 星期六

010110 ~ 020110 新一年新開始


經過之前嘅唔舒服同唔開心,哩幾日所有嘢好似又回復正軌,肥家姐經過適當嘅治療同心理輔導亦已經回復咗心情,而自己亦好似平常一樣,食得瞓得,得閒就到樓下公園做吓運動。






喺執拾期間搵到一啲多餘嘅冷,咁就無聊地織咗頂帽,手工嘛嘛,不過戴上去都幾舒服啊!




而甩頭髮現象亦哩兩日開始發生,隨手一撥都可以“一束束”咁甩落嚟,唔停咁掃地都重成地頭髮,洗頭、吹頭時情況更嚴重。





我哩個懶人真係唔想做咁多嘢啊!都係剪晒去一了百了,所以今日就去咗剃頭嘞!個頭光禿禿個感覺又幾得意啊!





以而家嘅狀態,下星期一返去抽血、覆診都應該冇問題,如果順利日就可以打第二針啦!