2013年10月22日 星期二

Day 3 @ 滯留高雄

2013年9月22日

哩朝一早起身睇吓窗出面咩環境先!


風已經無前一日咁大,不過浪就大咗好多啊!


見前一日好多人同一時間食早餐做成少少混亂,所以哩朝早少少落去餐廳食早餐。

 七點幾落到去,果然無咩人,鐘意坐邊都得呀!




食完早餐後返上房拾整嘢到大堂集合,公司搞手話我哋知佢哋已經通知晒人事部同各部門亞頭我哋聽日返唔到工,至於扣唔扣返大假就返到去先再開會決定(到而家都未公佈,不過聽聞傾向唔會扣返我哋假),但當然家屬、朋友就要自己打返自己公司處理啦!

九點半準時開車離開返高雄,我之前都一直擔心路面嘅情況,好彩雖然大部路沿海邊但都無出現水浸或道路受損,行咗大半個鐘,司機比我哋落車去去洗手間,其實只係半個鐘未有哩個需要,所以大家都走晒去岸邊睇浪。


跟住坐多個半鐘就返到高雄。哩日第一個行程係去維格買手信,哩個原本係我哋臨離開前嘅一個項目呀!

買完手信又去食飯,食飽之後就去夢時代



哩個係我哋原本旅程最後一個項目,跟住就出機場,所以時間唔多,不過而家真係大把時間,比三個鐘我哋,Shopping 唔係我強項,三個鐘都唔知行去邊好!

行咗一陣地庫嘅超市同三樓嘅誠品睇咗一陣書,就無咩好做,好彩商場內有WIFI,原來我哋前一日失去聯絡真係嚇親好多人,一輪報平安之後,得知香港將會喺黃昏時份掛八號風球,比我哋預期早咗!當然諗可能只可以掛到聽日嘅中午咋!咁我哋咪有半日「曠工」。

又到集合時間,大家上返車出發去食晚飯,導遊話如果平常嘅團遇到哩種打風滯留嘅情況,一般哩晚嘅唔會再幫大家安排晚飯,但哩次喺包團同埋我哋公司要求,所以哩晚亦幫我哋訂咗喺酒店裡面食晚飯,同時佢通知我哋聽日返香港160張登機証亦已經攞到手,所以我哋今晚同聽日都可以放心咁去玩,唔使擔心返唔到香港喎!

聽咗哩個消息,大家都好似鬆口氣,而且見到各領隊同導遊前兩日實在為咗幫我哋安排各樣事項而忙到頭昏腦漲,哩刻大家心情都好興奮,而且哩晚嘅餸菜亦係咁多餐哩面最豐富同好味,又咁啱哩到大堂有個舞台,於是大家都好高興咁上去影合同祝酒,哩個場面好似去咗飲咁呀!

食飽飯就去行六甲夜市,哩個夜市比起墾丁大街差好遠,哩到多嘢食好多,只不過之前食得太飽,食唔落。






幫襯咗一杯好出名嘅鄭老牌苦瓜汁,幾好飲喎!另外佢嘅木八瓜奶都好出名咖!當晚好多強國人都喺到爭先搶購呀!





因為我哋臨時滯留高雄,旅遊公司霎時間無可能搵到一間酒店可以同時容納百六人,所以要分開咗四間酒店入住,我哋被分配咗去華皇酒店,地點同酒店設備都唔錯,唔單只大堂有WIFI,連每間房都有,比起前兩晚嘅六褔莊真係無得比呀!




由晚飯開始,無論食、住同節目都比原定行程精彩,哩半日同聽日額外旅程先係我哋今次行程重點呀!

....續 4.1@三天變四天高雄、墾丁追風遊

2013年10月14日 星期一

Day 2.2 @ 墾丁海生館

2013年9月21日

(由於天氣極之惡劣關係,好多情況係影唔到相,所以哩篇會文字記錄多,因為對於自己係好難忘嘅經歷,但如果怕淨係睇字又無相嘅話就可以跳過哩篇唔好睇嘞!)

前篇講到天兔越嚟越迫近台灣南部,當時我哋身在墾丁市內餐廳,雖然話係市內,但四周都喺幾空曠,所以風力都相當大。

導遊們見風雨略略減細就快快地安排我哋返上旅遊巴,向哩日唯一嘅行程海洋生物館進發。而平時海生館閉門時間係下午六點,但當日都提早四點關門。

雖然由餐廳去海生館只係幾個字嘅車程,但車外嘅風雨不斷咁打落旅遊巴上面,其實都幾驚啊!

由於由售票處到展館要行經分幾鐘嘅空曠地方,所以導遊叫我哋準備好雨褸,但佢之前明明話係全部都係室內,好似有少少比佢呃咗!(下圖紅色路線)


之前講過天兔最接近墾丁嘅時間係下就兩點至四點,當時我哋到達時間係一點幾,海生館又係建喺海邊,好似我哋海洋公園咁,四周亦係空曠地方,所以風力相當大。

我哋喺售票處旁派好入場卷,大家著好雨褸,導遊一聲領下沖呀!大家就一齊走出售票處向珊瑚王國館沖過去,但風力相當強勁,我跟本自己控制唔到自己嘅步伐,一時啲風喺正面吹嚟,我完全行唔到,一時又响後面吹嚟,我連企都企唔穩,差啲比風吹跌,好艱辛咁終於可望到珊瑚王國館嘅門口,就喺哩刻,一直喺我前面嘅導遊被風吹跌咗成個人轆咗喺地下,大笨蛋想扶佢起身都無能為力,因為喺強風下我哋無辦法企得好穏,所以出唔到力去扶人,一陣混亂之後終於到咗珊瑚王國館,雖然只有分幾兩分鐘路程,但真係好難忘。

入到室內時,同事們亦喺後面陸續到達,由於好多人都無諗過會咁大風雨,只準備咗遮,而當時遮已經係無用,所以大部份人都係買咗一啲好單薄嘅雨褸,經過哩分幾鐘路程,強風已經將佢哋嘅雨褸吹爛到四分五裂,個個都好似落湯雞,都幾狼狽啊!當然我同大笨蛋有準備一件正規雨褸,所以無事。

其實如果講多嘢睇應該要再由珊瑚王國館行過去世界水域館,不過經頭先一幕,導遊已經強烈見意大家留喺珊瑚館算了。我都係咁諗呀!

因為我之前都去過幾個大型水族館,所以好老實講哩個珊瑚館真係無咩特別,但咁嘅環境嚟就令我不生難忘呀!















哩個魚缸有啲奇怪,竟然放咗啲海鮮壽司模型喺到,表示啲咩呢?好似唔係幾好啊!





雖然無咩特別,不過睇吓啲魚仔游嚟游去都幾開心啊!喺到超慢速欣賞咗個幾鐘之後,就開始諗住返去售票處嗰邊等集合。當時三點幾,比起之前入場更大風大雨,館內好多天花同幕門都漏水,啲記念品店有輕微水浸。

當我哋走到出口處時,暫時封咗,因為有一道玻璃門被強風吹爛咗!眼見佢哋工作人員都束手無策,只係搵兩個人頂住道門,不過情況都幾危險,風實在太大,哩兩位人兄都好似唔係好頂得住。



企咗幾個字,雨勢好似細咗啲,出口亦開返比人離開,於是我同大笨蛋就牽實兩手喺強風下向售票處進發,啲雨喺風勢下打落塊面到好鬼痛呀!

好艱辛咁行到一半,過咗幾條大柱之後,感到啲風突然唔係向一個方向推,好似打轉咁,我同大笨蛋敵不過啲風力,大家都不由自主哋被風吹開咗而且企唔到退咗幾個身位,我當時真係幾驚,因為我已經無力企穏,如果我一跌底一定會被強風吹咗去,後面幾個台灣人見我哋吹散咗都好驚喺到大叫,佢哋就即時抱住身邊幾條大柱,我同大笨蛋只有盡力向前90度彎腰,最後大家都終於拉住大家,定神後再努力向前行,千辛萬苦終於可以返去售票處室內嘅地方,好驚...當時真係好驚,重來未有過嘅經歷。

大家最後都齊齊整整咁返上旅巴,原來大部份人都被強風吹散咗,有位太太亦被吹跌咗,本來重安排返酒店前會去一去恆春古城同老街,但嚟到哩刻,導遊們都已經唔敢再冒險,宣佈邊到都唔去要返酒店。

之前旅遊巴會人齊先離開,不過而家四間一齊行動,一間緊貼住一間嚟行呀!

與此同時,導遊亦都同我哋講航空公司已經取消咗我哋第二日返香港嘅航班,因為天兔打完台灣墾丁之後會直吹向香港,我哋哩次嘅行程係跟住天兔玩遊戲。

返到酒店後,原以為會安排喺酒店食晚飯唔再出去,但哩間酒店竟然話因為之前無預先通知,霎時間做唔到百幾人嘅晚餐,所以我哋都係要出返去市區食晚飯。

大家都好無奈,返房休息一陣,沖個涼後六點又喺大堂集合準備出發,不過當時已經覺得風勢同雨勢都無之前咁恐怖,出去食咗一餐略為豐富嘅晚餐,因為哩餐原本係行程裡面最後嘅晚餐嘛!



食飽飽返上車之後,導遊話由於原定返香港航班取消咗,所以旅行社(香港永安同台灣嘅旅行社)同我哋公司嘅工作人員正不斷聯絡航空公司爭取機會,首先希望可以攞到第二朝十一點幾飛嘅機位,但可能性不高,因為機位一早已經買晒,後補都無可能有百幾個機位咁多,最壞打算係遲一日走,不過為咗方便安排,所以第二日無論天氣好壞都唔會再走墾丁嘅行程,食完早餐後就立刻返高雄,如果有機會可以安排我哋即刻走,無亦都唔擔心,因為佢哋已經訂定高雄嘅酒店,所以我哋係唔使瞓機場。但一切安排都未落實,佢哋要十一點前同航空公司取得最後結果先知點安排。

我唔擔心要遲一日走,但就驚咁多人同時要爭機位,機場一定好混亂,睇新聞都好多要團友嘅機場呆等咖嘛!

返到房本想去三溫暖,但因颱風關係,驚室內玻璃會引至意外所以封閉咗,酒店上網嘅線路被颱風吹壞咗上唔到網,電視接收本來由幾十個台吹到得返三四個台可以睇,墾丁好多電纜亦吹倒,酒店只可以用後備電,所以間房就好似無冷氣供應咁,好彩我一向都唔怕熱啫!

無嘢做其實最好就早抖,但因為要等電話通知第二日嘅安排,所以都唔敢瞓住,唔使十一點,十點已經有電話通知聽日十一點班機我哋上唔到,所以一定要喺高雄滯留一晚,但聽日都要食完早餐九點半返出高雄,因為大家都唔知返出去嘅路面情況,所以都係盡早離開為妙呀!

第二日嘅行程就係喺咁嘅情況下完咗嘞!

續.... 3.0@三天變四天高雄、墾丁追風遊




2013年10月6日 星期日

Day 2.1 @ 颱風「天兔」迫近墾丁

2013年9月21日

哩朝早起身望出窗外都真係幾大風,但浪唔算大。睇當地新聞話天兔會喺當日下就兩點至四點最接近台灣南部。
 由於大風大雨關係,原本行程去鵝鑾鼻、龍磐公園哩啲空曠地方都要改動。但確實行程要到十一點集合先公告。

所以我同大笨蛋先去浸三溫暖再去食早餐。由於去三溫暖時唔記得帶相機,所以無相同大家分享,當日朝早全程都無人,裡面有一個熱水池、一個冷水池、一間蒸氣房同一間桑拿房,但係熱水池啲水同蒸氣房都唔夠熱,冷水池啲水又唔夠凍,你間桑拿房叫做合格,不過雖然係咁,但我哋都玩咗個幾鐘呀!

跟住就去食早餐,唔知佢哋平時係咪唔慣一次接待咁多人,場面好似有啲亂。

等咗幾個字終於入到餐廳,位置啱啱向住戶外,出面橫風橫雨,電燈柱亦吹到兩頭搖。

哩間酒店上網服務真係好差,我哋喺無論喺大堂同餐廳內都無辦法上到網。
後來我哋問酒店職員,佢哋話佢哋酒店網路有啲問題,所以暫時將佢哋自己職員嘅電話網路放出嚟比我哋用住先,咁我哋先可以check到香港嘅情況,我襯上到網就放咗下面條片比朋友同屋企人睇。
跟住導遊領隊們集合晒我哋百六人然後宣告由於出面風真係好大,所有空曠地方都唔會去,哩日只會安排去海洋生物館,但去之前先去食晏就。吓...!啱啱食完早餐無耐又食飯。

其實當時我以為會取消所有行程留返喺酒店,但當時導遊話海洋生物館係戶內,所以相對唔會有問題,咁我問由酒店去生物館嘅路上會唔會有危險同要幾耐,佢話只須要半個鐘,而且台灣時時都會打哩啲風,司機好多時都面對哩啲環境,佢哋評估過無問題先會出車。咁我哋就唯有照安排出去啦!

不過由於之後再上唔到網,所以屋企人見我放咗上面條片之後話出發,跟住無晒下文真係嚇餐佢哋死呀!

去到餐廳,由於太飽,真係覺得啲餸嘛嘛哋!

食食吓重停埋電,全場黑麻麻!
窗外啲風同雨打落玻璃上面bong bong聲,喺嗰刻都幾驚。
喺餐廳門口就拍咗哩條片!
跟住另一方向
再嚟一段
大家都不斷喺到拍片,因為喺香港哩刻無十號風球都八號,根本就唔會咁樣走出街囉!

眼見風真係好大,有人開始再返酒店,不過導遊話返酒店路線都係先要經過海洋生物館先可以返到酒店,所以大家唯有繼續向目的地出發。


... 續  2.2@三天變四天高雄、墾丁追風遊




2013年10月5日 星期六

Day 1.2 @ 墾丁、貓鼻頭、墾丁大街

前篇講到食晏就,食飽之後繼續上路。原本當日節目係去坐半潛艇睇珊瑚礁,但因天兔迫近,台灣天文台已經發出海上警佈,所有於當日嘅水上活動都要取消直至另行通告,所以就無得玩嘞!

 咁第一個行程就改為前往貓鼻頭,哩到可以睇到好長好長嘅海岸線,都幾靚咖!


行上去觀望台睇得重清楚呀!

















當日都幾大浪呀!


















逗留咗大半個鐘就離開。行埋公園內嘅小店,無咩好特別嘅嘢吸引到我買。


















跟住就返上車準備去墾丁大街。哩間就係今次坐嘅旅遊巴,台灣啲旅遊巴好興用兩層啊!
 好快就到咗墾丁大街。
 

哩條街係墾丁最旺嘅地方,雖然話天兔迫近,但當晚嘅天色重好好啊!


















街道兩旁開滿攤檔,有好多不同嘅小食。






不過我哋哩晚有包晚飯,而且哩到啲小食唔係好啱我胃口,而買嘅記念品店好似間間都差唔多,所以都無咩收獲。最後只係飲咗杯木瓜奶。檔口太太問我哋幾時嚟,我話剛剛到埗,佢即刻話我哋唔好彩,聽日會大風大雨,好多地方會因海水倒灌而水浸,我哋咩都玩唔到喎!
唉!如果天意要咁安排我都無辦法啦!一切聽從天意啦!


差唔多時間就行返去集合地點去開飯。天色都開始黑啦!















我哋就係喺哩間高山青飯店開飯。

















因為團體餐都無咩特別,所以無咩影相。 食飽飯後再比多個半鐘我哋行,但因為我同大笨蛋都無咩想買,而且亦開始落雨,所以我哋留咗喺哩間飯店嘅大堂上網,因為佢有wifi而且速度都幾快。

九點就坐車返酒店,哩一刻開始感受到天兔迫近,因為除咗落雨外,係好大風,我把遮都差啲吹爛。

今次係住墾丁六福莊渡假旅館,我強烈見意如果有得揀都唔好住哩間酒店,首先係佢都幾舊,下面張相係第二日返酒店時係車上面影,因為之後都大風大雨,無機會行出酒店外影相呀!其次係佢嘅設施唔係好足夠,以一間渡假酒店嚟講,佢真係嘛嘛哋囉!


房間都OK
















浴室浴缸好似唔太乾淨















基本設備齊全,每日都有一枝水供應。















不過最重要係我哋帶咗自己嘅router去插咗線都無辦法上到網,後來先知原來自己帶嚟嘅router係唔得,要喺櫃台借酒店嘅router先可以用,但當我知道嘅時候酒店嘅router已經借晒啦!都估到啦!淨係我哋哩團都用咗80間房,一半人去借都無晒啦!於是哩晚就叠埋心水早啲瞓,第二朝早啲去浸返個三溫暖先!


 ...續  2.1@三天變四天高雄、墾丁追風遊