2016年2月27日 星期六

Day 3.3 @ 室堂、晚餐(洋食)

2015年10月12日 / 星期一 (第三天)
07:10 ~ 07:50 | 路線バス | 信濃大町 → 扇沢
08:00 ~ 08:16 | 関電トンネルトロリーバス | 扇沢 → 黒部ダム
09:30 ~ 09:35 | 黒部ケーブルカー | 黒部湖 → 黒部平  
10:10 ~10:17 | 立山ロープウェイ | 黒部平 → 大観峰
10:45 ~10:55 | 山トンネルトロリーバス | 大観峰 →室堂

(交通收費及詳細資料請往交通篇)
酒店:ホテル立山 (Hotel Tateyama)

提早咗返車駅,又未夠鐘Check In,所以就去車駅旁嘅室堂展覽館走走,裡面有影片介紹室堂嘅春、夏、秋、冬。

亦有圖片、電腦介紹,喺裡面坐坐走走到三點可以Check In就返到車駅上嘅立山酒店,哩一刻真係覺得比咗咁貴嘅房租都係值得咖!

手續好快完成,由於亞姨唔係好習慣大浴場沖涼浸浴嘅文化,所以我訂咗貨切家庭風呂比佢兩位靚太享用,每間房住客可免費用一小時,當然係先訂先得啦!


我同大笨蛋就去大浴湯,浸一浸當堂成身暖晒。最初唔知行程咁快完成,所以訂晚餐時間係7:30,喺房百無聊賴,瞓吓、坐吓等食飯。

7:30準時到酒店頂樓餐廳開飯,上次遊記有提到哩到嘅和食晚餐超難食,我最後要豉油撈飯,所以今次絕對唔會再訂和食,而網路上對酒店西餐嘅評價都好正面,所以哩餐都期待啊!




首先一入餐廳感覺已經唔錯,好浪漫嘅氣氛,侍應送上今晚晚餐嘅餐牌,跟住就開始上菜。
 

每一款都賣相好靚,味道都唔錯啊!





個主菜係牛,對於我嚟講實在太多肉啦!又唔想嘥嘢,全部食晒落肚好飽呀!

好好味嘅甜品結尾,超飽!買咗個杯麵諗住做宵夜都要揹返落山啊!

食飽返房抖一陣就去浴場浸一浸就去瞓啦!睇嚟聽日都唔會好天,唔使早起睇日出,可以睇到天光啊!









Day 3.2 @ 黑部平、大観峰、室堂

2015年10月12日 / 星期一 (第三天)
07:10 ~ 07:50 | 路線バス | 信濃大町 → 扇沢
08:00 ~ 08:16 | 関電トンネルトロリーバス | 扇沢 → 黒部ダム
09:30 ~ 09:35 | 黒部ケーブルカー | 黒部湖 → 黒部平  
10:10 ~10:17 | 立山ロープウェイ | 黒部平 → 大観峰
10:45 ~10:55 | 山トンネルトロリーバス | 大観峰 →室堂

(交通收費及詳細資料請往交通篇)
酒店:ホテル立山 (Hotel Tateyama)

到咗黑部平,先去睇吓我哋20號牌嘅乘車時間,大槪有50分鐘先再上吊車,於是又四周圍影吓相,行吓手信店,差唔多時間就去排隊上車。








今次都可以排到個頭位企返個好位影相,到咗大觀峰後就走百多級樓梯上展望台影相,然後就坐今日最後一程交通工具(無軌巴士)前往室堂。














嚟到室堂駅依然係人頭湧湧,望出車駅外天色嘛嘛!


雖然天灰灰,但又唔算好差,只係溫度比較低,所以大家都將帶嚟所有厚衣加喺身上,然後到車駅上嘅酒店放底隨身行李,搞掂嘢都快一點,所以先到車駅內唯一間立食麵店食個晏先出發。



食飽成個身暖晒就出發,出到戶外就真係討厭自己無帶啲釘鞋底嚟,地面舖滿冰真係好滑,所以除自己外都叮囑兩位靚太要小心行。






雖然天色嘛嘛!但亦無損我哋欣賞室堂風景嘅興緻。


因步伐相當慢,用咗超過大半個鐘沿住 みくりが池行到去みくりが池溫泉酒店,喺池邊同酒店外影咗一陣相覺得全身冰凍,所以入去みくりが池溫泉嘅大堂休息一吓。







而且由みくりが池溫泉酒店望出去見到一片藍天,嗰一刻重天真地希望等多一陣烏雲會散去,天色好返就可以再行遠少少,影多啲相。但世事往往都係事如願違。




みくりが池溫泉酒店裡面有暖爐供行山人士休息取暖。本來打算嘅酒店內嘅咖啡廳食個下午茶,但因為出面天氣唔好地面又滑,所以減短咗戶外活動嘅路線,距離剛剛食晏嘅時候無幾耐,哩刻食唔落下午茶,所以只係喺大堂坐坐,聊聊,諗住抖都三點就返去立山酒店Check In。

點知坐坐吓聽到外面刮起大風嘅吹吹聲,真係吹吹聲,有記憶聽到哩種風聲嘅應該係前年去高雄遇上天免嘅十級台風,我身處空壙地方被台風吹到企唔隱嗰次。 而哩下又聽到咁嘅風聲同大笨蛋即刻起身諗住出外睇睇,點知眼見出面天氣突變,外面係大風大雪,雪係一粒粒冰粒咁落,而且感覺到雪只會越落越大、天氣會越嚟越差,所以都事不延遲,大家著上雨樓、風樓準備離開。


一踏出戶外即感到風嘅強力,大家都小心翼翼咁行,都唔敢一邊行一邊影相,我同大笨蛋一人挾住一位靚太急急腳回程,啲冰粒加強風打落塊面到好鬼痛呀!而且能見度亦好低,只望到睇前十多步嘅視線,再遠啲都已經睇唔到。好彩返車駅都只係一條路。回程唔使半個鐘就返到車駅。

返到車駅內個心先定返落嚟,我擔心兩位亞太會滑到或凍親。好彩安全到埗。