2015年12月14日 星期一

Day 1.2 @ 松本

2015年10月10日 / 星期六 (第一天)
10:15 ~15:00 | CX536 | 香港赤鱲角機場 → 中部国際空港
15:47 ~16:24 | 港線特急 | 中部国際空港 → 名鉄名古屋
17:40 ~19:45 | 特急(ワイドビュー)しなの21号(指定席) | 名古屋 → 松本
(交通收費及詳細資料請往交通篇)
酒店:リッチモンドホテル松本 (Richmond Hotel Matsumoto)

坐咗兩個鐘終於到達松本,由朝早七點多喺屋企出門口,直到到達松本已經十幾個鐘,確實有啲攰!列車準時19:45到達。


團友們拖住行李向酒店邁進


當晚松本17度,要即時加返件外褸先呀!

由於第二次到訪,所以唔使搵路,好快就到達酒店。辦好入住手續上房放底嘢後都已經八點半啦!所以咩都唔搞出去食飯先!

行咗幾間心水店舖都滿座,原本諗住可能係星期六關係,到第二朝去松本城先知佢哋有大型活動,所以哩晚松本城好多遊客。

最後我哋揀咗秋吉,喺砺波食過感覺幾好,所以就揀返佢,但松本哩間店當晚多人加上舖頭無禁煙,所以感覺麻麻哋!

快快脆脆食完就走。


燒雞肉粒飯

燒雞軟骨


 燒牛舌

燒牛肉粒

食飽就返酒店執好行李,沖涼瞓覺。臨瞓前食埋之前喺名古屋駅買嘅生果,啲提子去咗皮之後好晶瑩通透,而且重好甜啊!

第一日喺無行程嘅情況下完結咗嘞!






Day 1.1 @ 名古屋

2015年10月10日 / 星期六 (第一天)
10:15 ~15:00 | CX536 | 香港赤鱲角機場 → 中部国際空港
15:47 ~16:24 | 港線特急 | 中部国際空港 → 名鉄名古屋
17:40 ~19:45 | 特急(ワイドビュー)しなの21号(指定席) | 名古屋 → 松本
(交通收費及詳細資料請往交通篇)
酒店:リッチモンドホテル松本 (Richmond Hotel Matsumoto)

期待咗一年,但因為路線跟2013年時嘅行程差不多一樣,所以少咗一份擔心。
今次團友依然係B女媽咪、大笨蛋,再加舊年跟過我去白浜、和歌山嘅亞姨。
一行四人朝早八點已到達赤鱲角機場,好快已經辦理好登機手續,再過移民局,但唔知搞咩行得咁慢,去到閘口已經夠鐘排隊登機啦!


照咁睇真係要檢討大家嘅步伐,太散慢會影響行程啊!

哩日班機好鬆洞呀!好多位都無人,你想點坐都得呀!

飛機準時起飛。


好快就派餐啦!都唔記得係咩飯啦!只為填飽肚。

航班比預期早咗半個鐘到,大槪三點三就完成所有入境手續攞埋行李離開中部機場嘞!


經過天橋去對面嘅名鉄車駅坐車前往名古屋。

觀光案內所有好多詳細嘅地圖,不過大部份我都已經喺香港日本振興觀光局攞咗!嗰到啲資料又真係幾Update啊!

由中部國際機場前往名古屋可以選擇高速巴士或鉄路,而鉄路只有名鉄營運由機場出市區,所以不會太混亂,只要搞清楚唔好上咗只會去到金山嘅列車就萬無一失啊!

睇睇行車指示板,準急站站停,而且15:22嗰班亦啱啱開咗,接落嚟係睇吓搭特急定快速列車「μ-SKY」,車程及到達時間差唔多,而且我哋都早咗到埗,所以都唔太急,就決定坐特急算嘞!

先喺自動售票機買票,操作簡單,先入錢,然後揀單程車資跟住揀人數,搞掂!

每位870円自由席

 上車啦!特急列車車頭第一個車廂係指定席,如果想坐就加多360円,即係同快速列車「μ-SKY」同樣價錢。

當日都好多人搭車,所以我哋都係企足全程,不過都係大半個鐘都OK啊!

到咗名古屋後,就朝住JR広小路口進發。

先喺JR窗口購買アルペンきっぷ (Alpine Ticket)嘅套票

套票詳情可前往交通篇

買好票重有時間,但由於帶住大件行李,就只可以輪流喺百貨公司下嘅超市四圍逛。

B女同亞姨就買咗啲巨峰提子同柑仔返嚟


時間差不多就入閘等上車啊!


列車準時駛入月台




但我已經唔記得原來哩種列車喺無放行李位置,所以啲行李放埋喺坐位前,坐得好唔舒服啊!



Day 1:リッチモンドホテル松本 (Richmond Hotel Matsumoto)

2015年10月10日

 リッチモンドホテル松本 (Richmond Hotel Matsumoto)
〒390-0811 長野県松本市中央1丁目10番7号


禁煙◇ダブルルーム ~ 2 部屋
【朝食付】合計 35,200 円(税込・サービス料込)
其實今次旅程有一半酒店都係喺2013年嘅立山行住過,原本松本係想住車駅旁某一兩間有浴場嘅酒店,一心諗住慢慢睇定啲先,但無估計到到達日本哩一天係日本連星期一放嘅長週未,所以好幾間心水酒店都已經滿咗!就算有房嘅價錢都有啲嚇人,所以基於住生不如住熟嘅情況下就揀返Richmond Hotel嘞!

2013年4月22日 酒店 - リッチモンドホテル松本 (Richmond Hotel Matsumoto)

酒店大堂喺二樓

熟悉嘅環境,分別於今次係職員親自同我哋收錢而唔係旁邊嘅收錢機。

辦理好入住手續就可以喺接待處旁搭電梯上房嘞!

雙人單床房,預咗房空間不大,一個24吋加一個26吋喼都OK!


簡潔嘅浴室



咖啡、綠茶都係用Richmond Hotel 嘅包裝,佢哋啲咖啡真係唔錯咖!比美Doutor Coffee咖!

床頭有插頭位,以我哋之前嘅經驗,日本啲插頭位之間好窄,如果帶香港啲轉插頭通常都會頂住隔離個位用唔到,但今時今日又要义電話、又相機、又Wi-Fi,重有後備電,所以之前我係會帶拖板,但實在唔方便,三月時喺上野溵安裡面買咗兩個USB插頭,咁就好方便咁插到三個電話一個Pocket Wi-Fi 嘞!