2010年2月28日 星期日

230210 ~ 280210 期待

又過咗一星期,聽日又要返醫院抽血睇吓可唔可以打第四針,有啲擔心但希望得啦!

見個人冇咩特別唔舒服,都幾精神,所以今朝一早去聖堂望彌撒。哈...!竟然回程返屋企時遇到我老闆喎!真係橋啊!佢重比利是我添啊!過咗年重有利是逗真開心啊!感覺又真係好利是咁,如果聽日都係咁利是,順利打到針就好啦!

希望哩個利是會為我帶嚟好運啦!





2010年2月22日 星期一

220210 又失敗咗啦!

今日本來係打第四針嘅日子,但抽血報告又衰咗!白血球指數係三,即緊緊踏界,但肝功能低過安全線,表示好容易受感染,所以今日都係唔打得,又係要抖多個星期,要3月1號返去再抽血睇報告再決定。


唉....唔開心....冇嘢講....!


                      

    
       


2010年2月15日 星期一

虎年快樂

               

  


恭喜發財,虎年祝大家心想事成、萬事勝意、身體健康啊!


                   

happy.gif happy picture by mao-seasons
             
realize.gif realize picture by mao-seasons


今朝瞓醒覺一打開門見到門口有個好靚嘅花花圖案喺門口呀!真係好開心啊!因為我哋隔離嘅鄰居係一家印度人,佢哋每逢過時過節都會用一啲彩色嘅粉未砌畫一啲花花嘅圖案喺門口代表一些祝福嘅意思,咁我噚日過去同佢哋拜年時佢哋知道我嘅情況,當時佢哋話會為我祝福,點知今朝就見到啲圖案喺門口啊!真係好多謝佢哋一家人啊!



個圖案真係好靚啊!



佢哋自己門口都畫咗個簡單嘅圖案啊!




    


2010年2月9日 星期二

020210 ~ 090210 今次副作用好勁啊!

自上星期一打完第三針後,哩個幾星期都不斷咁瞓啊!今次哩針啲副作用帶嚟嘅作悶、嘔心、胃漲及反胃、頭痛比前兩針持久,所以哩個幾星期都冇胃口同埋好倦,每日都瞓十幾個鐘,活動時間少咗,相對食嘢亦少咗。

今日瞓醒個人覺得精神咗好多,最明顯係個胃已經冇嘔心嘅感覺,所以又係時候要進寶啦!為22號打第4針而做準備功夫啦!

2010年2月1日 星期一

010210 好開心啊!成功打第三針啦!

好開心啊!我今日終於可以打到第三針啦!                      

喺到真係好多謝所有為我祈禱、送上祝福同鼓勵、不斷支持我嘅親朋戚友、同事、blog友們啊!

今日又見返「輕佻醫生」,佢今次冇再同我講錢啦!所以我當堂覺得佢踏實咗!一坐底佢就話我幾好啊!我就問佢:「咁即係幾多呀?打唔打得呀?」 佢好奇怪:「我想話你體重重咗幾好咋喎!你想問咩幾多呀?」

唉!緊係想問白血球啦!哈...哈!今次啲白血球指數真係好聽話升到上5.6,比起上次得2.8今次真係好好多啊!醫生話我未開始打針前白血球係5.8,所以而家有5.6係幾好啊!肝功能亦回升返上正常水平,所以今日可以順利過關去打針啊!我開始鐘意「輕佻醫生」呀!因為佢次次都比我過關啊!

哩頭好開心咁去打針房等打針,點知今日同我打針嘅醫生係新仔嚟咖!佢搞條血管搞咗好耐,然後"督"完又"督",搞到我隻手又痛又瘀先插到條針,重要唔係好順,搞到吊針時啲藥唔係好落,平時大半個鐘,今日搞咗個半鐘先吊完啊!

但總算順利完成今次嘅療程,亦係去到化療嘅一半啦!所以都值得高興啊!原來啲奶粉同花生衣煲水係咁勁咖!