2009年12月31日 星期四

251209 ~ 311209 再見2009!!

不經不覺2009年又成過去啦!今年對於自己係難忘嘅一年,實在發生咗好嘢!當中有開心亦有唔開心,開心嘅我會永遠記住,但唔開心嘅我希望隨住2009年嘅過去都跟住過去啦!


 


到祝願大家新一年有新嘅開始,開開心心,最緊要係身體健康啊!


 


          


2009年12月24日 星期四

191209 ~ 241209 一波未平一波一起

進入咗第一針化療針嘅第二星期,身體狀況回復正常,本以為可以開開心心等待下一次嘅治療,但我嘅肥家姐竟然舊病復發,真係令我心情直插谷底啊!


事源係我肥家姐係一個十幾年嘅精神病患者,近幾年哩個病比較開明咗,所以正確哩講係一個情緒病患者,佢一有心事困擾就會突然咩都唔記得晒,唔識返屋企,搭錯巴士、甚至試過上人哋本地遊嘅旅遊巴唔知去咗邊,要我哋四出咁搵佢啊!


佢而家適當嘅治療下已經冇病發好幾年啦!但當佢知道咗我患上咗癌症之後,佢個腦袋唔知係咪又諗得太多嘢!竟然又再突然唔記得晒啲嘢,噚日離開咗宿舍後唔知佢去咗邊,今次佢連電話都唔記得帶,幾個鐘頭都唔知去邊到搵佢好!


我又唔可以出街,B女媽咪一放工就去佢平時鐘意去嘅地方搵,但搵咗幾個鐘都搵唔到,好彩佢連銀包同八達通都唔記得帶,所以冇去搭車,最後佢宿舍附近嘅商場管理處打嚟,管理員話佢唔識返屋企,淨係記得屋企電話號碼同我個名。


而家同佢入咗醫院,都唔知佢幾時可以平復返啊!B女媽咪除咗要為我擔心,而家重要為佢奔波,我又唔可以去醫院,想幫輕都唔得,點解係都要跟住我哋呀??


                                   

worried.gif


2009年12月18日 星期五

141209 ~ 181209 嘔吐獅子魚

14號打完化療針後嘅半夜開始就化身成一條新加坡名勝「嘔吐獅子魚」



無論食咩落肚都全不保留咁嘔返晒出嚟,就算飲啖水落去都要嘔返出嚟!除咗覺得辛苦之外,當時真係感到有啲氣餒啊!但眼見B女媽咪重冇放棄過咁不斷煮啲可以容易入口,又有營養嘅食物,又諗方法慶住啲嘢等我半夜三更爬起身想食嘅時候都有得食,份心機真係令我好感動同唔安落,咁大個人重要佢咁擔心,所以同自己講點辛苦都要捱,點樣嘔都要食落去,至多再嘔過啫!有咩大不了


好彩我重有個強項係瞓覺,以前遇到有咩唔開心、唔想諗我就會去覺,所以今次我都一樣呀!嘔到倦覺得好辛苦就去瞓,咗當冇事發生,終於捱到今日總算食嘢落去都唔再嘔啦!




今日中午公司人事部重搵人送咗個生果籃嚟屋企,佢哋話哩啲係員工福利喎!我做咗咁耐都唔知有哩啲福利啊!


嘩!裡面好多生果啊!




重有我最鐘意嘅士多啤利呀!我一口氣食咗八粒士多啤利,真係又香又甜呀!



好耐未試過今日咁食咗咁多嘢呀!原來食嘢可以好滋味咖!



 


 


2009年12月14日 星期一

141209 第一針化療針


今日下午三點到醫院覆診,今次哩個醫生比較後生,所以比我感覺比較輕佻,佢睇一睇個file就話:「之前個醫生offer比你嘅療程須自費HK$24,000.00,而家比多個選擇你,每枝針都加新藥,每枝HK$8,000,合共HK$48,000,然後每四日打一枝補血針,每枝HK$800,可以返醫院打、去賽馬會打、或者返屋企自己打都得。」!自己打都得??唔係呀嘩!


跟住重講:「其間重有藥要食,加埋晒成個療程比十萬蚊到啦!」十萬??咁我就問佢個效果係咪好啲,副作用係咪少啲,但佢話效果同副作用係一樣,分別係二萬四嘅係歐洲出品,十萬嘅係美國出品。我覺得點解我今日都打第一針,佢哩一刻先比啲咁困惑難題比我喺幾分鐘內決定呀!上次又唔講,咁即係想點呀?



同媽咪商量咗一陣,都係用返原本個plan,因為既然成效同副作用都一樣,咁無充分理由要我比多咁多錢囉!Confirm之後,哩位醫生連我個傷口都無檢查就叫我出去等打第一針化療針嘞!哩一刻我有啲懷疑佢係咪有佣分咖!


終於喺四點半就開始打針,我真係好驚打針咖!

嘩!見到姑娘攞住成盆針藥,我心諗唔會全部係我嘅,但坐埋位時,果然全部都係我咖!嘜唔係一針過咖咩?!醫生幫我打咗六枝針,哩啲針藥好勁呀!一打落去已經感覺到由手臂開始,然後到身體,跟住就走上頭,所以開始覺得有啲暈
,打完六枝針後重要吊兩包藥,好似人哋吊盬水咁呀!吊完咗之後重要打多一針!整個過程都要成九個字啊!


而家暫時除咗有少少手腳痺同腰痛,其他都未有啲咩特別嘅反應!但我知道過多幾日啲所謂嘅副作用就會出現,希望到時唔會太差啦!



2009年12月8日 星期二

化療前準備


自從28/11/2009出院後好似一直到忙個不停,每日嘅行程都排得密密。



出院第一件事去做係攞私家醫生嘅轉介信到政府醫院排期做化療、電療療程。好好彩只須兩日已經可以約見醫生,當醫生評估咗我嘅狀況後,決定須要用四個月時間打六枝化療針,及兩至兩個半月做電療,完成咗哩兩項療程後,就口服五年嘅荷爾蒙藥。如果14/12/2009覆診身體冇特別問題的話,當日就可以打第一枝化療針啦!


醫院有個資源中心幫我哋哩啲新症嘅人,佢哋開咗好多癌症嘅專題講座,講解一吓我哋做治療前後要注意嘅事項,平時嘅飲食、作息留意嘅嘢。約時間聽咗幾個講座,真係幾有幫助啊!


講座中重免費派好多好有用嘅資料比我哋閱讀。



除咗上面啲書仔,重送咗兩包奶粉,哩隻奶粉話可以喺化療期間幫助提升白血球嘅數量,不過要成HK$50一包啊! 好似貴咗啲啊!



除咗去見政府醫院醫生外,亦要到隔幾天到私家醫生處覆診,跟住為咗打好個底令自己打化療時抵抗力好啲,又每三日睇一次中醫,真係好似好忙咁啊!


由於化療後身體會比較差,所以會好長時間唔可以出街,於是就襯住哩個幾星期重可以四周圍走嘅時候,扣除上面見醫生及聽講座嘅時間就不斷咁約親戚、朋友們見面,因為大家對我真係好關心,我真係好多謝大家對我嘅支持啊!


得到癌症後,上網睇咗好多關於哩個病嘅資料,從其中有啲Blog中得知一啲買假髮嘅舖頭,所以今日都上咗去其中一間諗住睇吓!點知一睇就啱啦!


如果係自己頭髮我就一定唔會染髮,但係既然係假就一於試吓自己未試過嘅嘢啦!



帶咗上去都幾自然,唔係好假啫!



萬事駒備,而家只係等下星期一嘅來臨,雖然資料聽同睇咗好多,知道將會做啲咩,但始終未試過,點都係有啲緊張,希望會安然渡過啦!


2009年12月3日 星期四

驚聞惡耗

一直冇咩大病痛,還得戚咁同自己講:「重有個多月就到年尾,今年都未攞過一日病假真係叻嘞!」


1111號做例行身體檢查前兩日已經發現左邊乳房出現咗一塊少少嘅硬塊,當時心知不妙,但仍不斷咁安慰自己冇事嘅! 果然醫生都同意有個硬塊須進一步檢驗。一輪化驗、檢查、睇不同醫生都得出同一結果係一個唔係幾好嘅腫瘤,須要割除,但範圍不太而且發現尚早,加上家族並冇哩啲病歷紀錄,所以問題不大,一切都係樂觀嘅!


於是快刀斬亂麻,1123號就入院做切除腫瘤手術,醫生重喺我昏迷前安慰我瞓醒一覺就咩事都冇會好返咖啦!但好可惜當我瞓醒時醫生話攞出嘅係一粒惡性嘅瘤,所以腋下亦切除咗九粒淋巴核做化驗 最後報告顯示癌細胞已經擴散至淋巴,正式確診為「乳腺管癌第二期」,俗稱為乳癌


一切都嚟得太快,十幾日前,癌症哩樣嘢好似對我係遙不可及,十幾日後哩位新朋友竟然已經走入咗我體內,霎時間都不知點樣招呼哩位新朋友好啊!


哩段時間察覺身邊嘅親戚朋友對自己真係好好,大家都不斷送上關心、祝福、慰問,尤其媽咪無微不至嘅照顧,令我知道我自己唔可以氣餒,否則會令關心我嘅人擔心同失望。


所以唔開心咗一段少少嘅時間後,而家就等傷口痊癒然後開始進行四個月嘅化療同埋兩個月嘅電療,據我所知化療並唔係一個簡單嘅療程,過程會出現好多副作用,嘔吐、甩頭髮就一定走唔甩,但都冇辦法,唯有希望自己到時身體唔好太差,能夠順利應付一連串嘅治療啦!


為免到時甩起頭髮帶嚟嗰種震撼,所以將留咗多年嚟嘅長髮剪短,希望將個震撼感減底啦!




升上中學後都未試過咁短頭髮啊!




2009年10月25日 星期日

09'新加坡遊-後感



有好多人都將新加坡同香港比較,又話香港點點點,新加坡又點點點,但我又唔鐘意咁樣去比較,其實兩個唔同嘅地方,各有各自己嘅特點、優點或缺點。尤其我哋只係去當地旅遊,根本無須處處比較,我覺得去睇吓人哋嘅地方,佢哋嘅生活方式,四周圍食吓當地小食就已經好滿足啊!


今次嘅行程雖然短啲,但我覺得真係幾好玩!未去之前好多人都話新加坡好悶,唔好玩,但我又覺得都唔錯啊!而且我幾鐘意佢哋啲美食,樣樣都幾啱我嘅口味至於又人話無咩睇,我又覺得其實唔係一定要去搵啲咩特別嘅景點,四周圍行吓,睇吓當地啲建築物呀!睇吓啲人呀!其實都幾OK吖!


所以如果有機會、有時間去短程旅遊,新加坡仍會喺我選擇之一啊!


今次係我咁多次旅行買得最少嘅一次啊! 幾收斂


 



 


2009年10月24日 星期六

09'新加坡遊-第三日

17/10/2009 晴天 

Tanny
  新加坡 à 香港


今日係喺新加坡最後一日,唔想去得太遠,所以就去小印度啦!而喺小印度區嘅附近有間食叻沙好出名店舖,於是我哋第一站就去嗰到食早餐先!


九點鐘落去Check Out 咗放底啲行李就出發啦!



噚晚哩條街好鬼熱鬧,而家拍烏蠅呀!



哩到有啲街邊檔開咗啦!



開始入咗小印度區啦!





行咗一輪開始入咗去人哋啲屋村裡面睇地址應該係屋村內嘅熟食中心嚟!喺27座地下




但搵嚟搵去只有26同28座編編就冇27座見公園有三個亞伯坐喺到咪諗住問吓佢哋囉!點知佢哋一樣好似我哋咁蒙萬話27應該喺26同28之間我夠知亞媽係女人啦!咁即係喺邊先得格!


跟住我去間電器舖問個老闆,比本旅遊書上個地址佢睇,佢即係手指右面話轉彎就係啦!佢問我喺邊到嚟玩,重問我本書係咩書嚟,佢跟住洞起手指話哩本書好嘢!唔知係咪話咁山咖啦都介紹到嚟呢?



真係一轉個彎就見到個熟食中心,咪即係香港舊屋村嘅大排檔格局囉!不過哩都就乾淨好多啊!



就係哩檔結霜橋叻沙,成個檔口獨沽一味 - 叻沙,SGD2.00一碗,冇其他選擇,埋去只係講數量同埋係堂食定攞走



檔口係由哩位老伯伯從早到晚喺火爐前煲湯、煮麵,佢就係老闆黃先生



我哋依舊兩個人叫一碗,一食落去,嘩!好好味呀!雖然啲送唔多,但啲鮮蛤好鮮甜呀!啲湯又好好味,話咁快已經將成碗粉吞晒落肚。真係好滿足呀!哩碗粉係我成個行程最回味嘅食物,真係值得我專登走入嚟搵佢呀!


其實重可以食多碗,不過又貪心想試吓其他嘢!



跟住我哋喺不同檔口叫咗杯咖啡 SGD0.80,好香好滑



同埋泰興嘅炒鮮蛤粿條 SGD2.50



都好好味呀!



食飽飽就行過去小印度,見到街道上掛咗好多好靚嘅飾物先醒起哩幾日喺印度新年呀!因為我隔離屋係印度人住,每年新年佢哋都大事慶祝一番,所以我知每年十月中都係印度新年啊!



應該噚日有大型嘅慶祝活動,所以四周圍啲地方都正等待收拾




有好多好靚嘅花環,我問隔離屋太太哩啲嘢有咩用,佢話係送比人有祝福嘅意思喎!早知我都買啲嚟送比佢哋啦!






好多印度甜品,不過我諗唔係咁啱我哋口味,所以冇買嚟試啊!



好似都冇咩嘢睇,於是我哋就坐MRT去烏節路,雖然知道行名店唔啱我哋,但始終係熱門景點之一都要去行吓先得!


嚟小印度一定會經過哩間竹脚中心




幾個站就去到Orchard,我哋只係去咗兩個商場 - Wisma Atria 同埋義安城(Ngee Ann City)



Wisma Atria內又有Foodrepublic,哩到有係齊集咗好多新加坡美食,我緊係要試吓噚日食唔到嘅嘟嘟糕啦!




有椰子同花生味 SGD0.70一件



好味道!



跟住就過去義安成,目的只有一個就係去買椰子酥



哩間舖頭啲班蘭蛋糕好出名,但我想出機場先買蛋糕,我喺人哋啲blog到見到有人話佢哋隻椰子酥好好味,於是嚟睇吓!



重有得試食,又幾好食喎!入口即溶,美味無窮。好買兩盒先



跟住又買咗啲糕點試吓!不過味道麻麻哋




大笨蛋重食咗杯北海道麻布工房嘅士多啤利雪糕



哩到都有間亞坤,我同大笨蛋都想食佢做哩個旅程最後一餐,但大家都想去返牛車水間舖頭食。所以買完嘢就搭MRT去Raffles Place



今日星期六,出咗車站成個Raffles Place都好靜,同前兩日比較真係天壤之別呀!



點知我哋日日經過都冇幫襯,今日專登嚟幫襯,佢竟然冇開門喎!明明旅遊書寫星期六都會開咖嘛!有冇搞錯!



咁唯有去返老巴刹熟食中心啦!前晚影咗個夜景,而家嚟個日景





我哋簡咗碗魚蛋麵 SGD3.00 ,唔掂!



煎蠔 SGD5.00 得五粒蠔仔,其他全部都係粉,同埋有咩理由煎到蠔還蠔,粉還粉,散晒咖!好唔掂!



唔知係咪跟本唔係好肚餓,今次啲嘢真係嘛嘛哋!開頭諗住食完行返去酒店,但真係好倦同埋正值中午時份,實在太熱嘞!最後都係搭MRT去Bugis返酒店啊



酒店旁嘅St. Joseph Church,本來預咗啲時間喺教堂旁嘅小店買啲記念品,點知竟然休息冇開舖喎!門口明明貼住個時間表星期六都開咖嘛!嘜咁茅咖!到到都講咗唔算數



冇地方行又倦,於是三點幾就返到酒店,喺大堂拾吓頭先買啲嘢返落喼,同埋換吓衫,因為成身濕晒呀!之後就等到四點半星航有Shuttle bus 嚟酒店接我哋啊!


好快五點就到咗機場啦!



十分鐘到就搞掂晒啲手續



用埋星航送嘅SGD40 coupon買蛋糕,一共買咗五盒同一盒椰子酥都係用咗三張Coupon咋




買完嘢去找換店換返用剩啲坡紙就過關,咁奇怪點解過海關唔使check手提行李??



見重有SGD10 coupon剩,所以喺Toast Box 叫咗兩個set都係SGD8.70,姐姐話剩返啲冇得找返比你喎!佢話唔好浪費,叫我要多件蛋糕上機食喎




真係食到好飽呀!然後就去閘口啊!原來去到閘口前先撿查手提行李啊!



黃昏時份,要離開新加坡啦



上到機叫咗杯坐星航先有嘅特飲 - Singapore Sling 好酒味呀!嘛嘛哋!以我飲3%酒精都即瞓嘅人哩杯嘢對於我嚟講就係好勁呀!



瞓咗陣有嘢睇,原來有生命最後一個月-花嫁,正呀!我本來都諗住去睇咖啦!




好感動呀


飛機餐到啦!不過真係好飽食唔落啊!而且個肚重好痛添呀!



班機遲咗成半個鐘先到步



終於三日短短嘅行程就喺一個好似食滯咗狀態吓圓滿結束啦



今日使費


車資 MRT (Little India àOrchard) : SGD1.10 x 2


                 (Orchard àRaffles Place) : SGD1.20 x 2


                 (Raffles Place àBugis) : SGD1.20 x 2


早餐: 叻沙 SGD2.00


          咖啡 SGD0.80


          鮮蛤炒粿條SGD2.50


小食: 士多啤利雪糕 SGD3.80


          嘟嘟糕 SGD0.70 x 2


          椰汁糕 SGD0.80


          樹輪蛋糕SGD1.50


午餐: 魚蛋麵 SGD3.00


          蠔煎 SGD5.00


          庶汁 SGD1.7 x 2


手信: SGD29.60