2015年5月31日 星期日

2015' 大阪、奈良暑假五天行(前言)

剛剛月頭完成咗三月嘅東京遊記,原本要等到十月立山、上高地出發先再會有遊記。不過近排工作實在崩潰,身邊啲同事、親戚、朋友都不斷出遊,重有幾個要去日本搵我幫手整理交通資料,令我感到要等到十月真係太漫長啊!

於是決心要喺十月前再飛一轉,但大笨蛋要留假十月去立山,所以已經再無假陪我出走一趟,諗起表妹每年暑假都會同佢囝囝出遊,一於跟佢哋出發,去邊都好啦!返大陸都照跟,點知佢聽到我要加入佢哋時,佢就提意自遊行去日本,就係咁2015' 大阪、奈良暑假五天行就係咁成就咗啦!

由於今次有小朋友同行,所以一切行程都以佢為先。

計劃行程:
第一天 :難波 → 大阪くらしの今昔館海遊館 → 難波
第二天 :難波 → インスタントラーメン発明記念館天王寺動物園 → 難波
第三天 :難波 → ユニバーサル・スタジオ・ジャパン(環球影城) → 難波
第四天 :難波 → 奈良 → 難波
第五天 :難波 → 心齋橋黑門市場

由於只有五日,而且除咗奈良之外都只係喺大阪內移動,所以都諗住無咩pass需要用,不過睇咗啲資料後決定會買兩個套票。

1. OSAKA海遊きっぷ
<発売金額>
・大人(高校生以上):2,550円
・小児(小学生):1,300円

哩張套票包海遊館入場劵 (大人:2,300円 / 小児:1,200円)及當日大阪市內地鉄,只要坐一、兩程地鉄已經可以歸本啊!

2. 近鐵周遊券一日版 (詳情可以參考小氣少年的部落格)



哩個套票包近鉄難波至近鉄奈良來回(560円 x 2) 及奈良市內巴士 (200円/程),雖然計落哩張套票唔係著數好多,但唔使每次買票,尤其坐巴士時,所以我覺得買咗佢都方便啊!

哩兩個套票都可以喺関西機場嘅第一航廈一樓關西旅遊情報處購買。

又再期待出發嘅日子,不過重要等成個月,七月中先可以出發啊!






2015年5月9日 星期六

2015' 東京近郊八天行

前言: 2015旅遊計劃 (點一下項目便可以入到有關文章)

交通 (點一下下面嘅項目便可以入到有關文章)
預算交通手段
實際交通篇

(點一下下面嘅項目便可以入到有關文章)
Day 1.1 @東京到着
Day 1.2 @ 原宿、下北沢、新宿
Day 2.1 @ 三鷹の森ジブリ美術館
Day 2.2 @ 吉祥寺
Day 3.1 @ 河口湖駅、天上公園
Day 3.2 @ UKAIオルゴールの森
Day 3.3 @ 山梨宝石博物館 & 富士吟景 ~ 晚飯
Day 4.1 @富士吟景逆富士
Day 4.2 @河口湖駅、新宿、上野
Day 5.1 @ 輕井澤 ~ 旧軽井沢銀座通り
Day 5.2 @ 白系の滝
Day 5.3 @ 雲場池、王子購物廣場、味の街
Day 6.1 @ 上野恩賜公園
Day 6.2 @ 東京鐵塔、銀座
Day 7.1 @ 築地市場
Day 7.2 @ 淺草雷門
Day 7.3 @ 晴空塔
Day 8 @上野、成田空港

酒店 (點一下下面嘅項目便可以入到有關文章)
Day 1~2:ホテルサンルートプラザ新宿
Day 3:湖楽おんやど 富士吟景
Day 4:上野ホテル丸谷
Day 5:アパホテル<軽井沢駅前>軽井沢荘
Day 6 - 7:上野ホテル丸谷

八天嘅旅程轉眼間已在上星期完滿結束,雖然返咗嚟成個星期,但身邊不斷有朋友日遊,不斷發放靚景、美食,令我有返唔到嚟嘅感覺啊!

出發前查閱日本天氣,八天行程有三日雨天,五天陰天,但到達當地後得到天公做美,睇景嘅日子都遇到好天氣,亦滿足多年心願見到富士山之餘,連逆富士都欣賞到,真係不枉此行。

完成今次嘅行程,本人覺得東京始終太城市,我亦不太愛行街購物,所以今次之行了結咗我同大笨蛋多年心願後,相信會有一大段日子都唔會再到東京了。

而家已開始著手籌備我十月嘅立山、上高地紅葉之旅。反而哩個先係我期待嘅旅程啊!

老規矩,放住少少相,遊記會陸續補上。

Day 1:Line Friends Store@原宿

Day 1:下北沢

Day 1:新宿

Day 2:三鷹の森ジブリ美術館


Day 2:吉祥寺

Day 3:河口湖 ~ 天上公園

Day 3:河口湖逆さ富士

Day 3:河口湖 ~ 河口湖オルゴールの森

Day 3:河口湖 ~ 山梨宝石博物館

Day 4:河口湖

Day 4:不忍池@上野公園

Day 4:上野アメヤ横丁

Day 5:軽井沢 ~ 白糸の滝

Day 5:軽井沢 ~ Princes Shopping Outlet

Day 6:櫻花@上野公園


Day 6:上野東照宮

Day 6:東京塔

Day 7:築地市場


Day 7:雷門

Day 7:晴空塔


Day 8 @上野、成田空港

2015年3月21日 / 星期六 (第八天)
13:40~14:21 | スカイライナー31号 [成田空港行]  | 京成上野 → 空港第2ビル 2,470円
18:05~10:19 | CX505 | 成田空港 → 香港

(交通收費及詳細資料請往實際交通篇)

嚟到行程嘅尾聲,已經無咩行程啦!所以哩朝早可以瞓晏啲,去浴場浸完浴就食早餐。


差唔多到十點先Check Out,時間尚早,好多店舖都未開,上野都有激安の殿堂,就去嗰到行吓啦!



由於早嘅關係,裡面無咩人幾好行。

發覺今次見到嘅商品多咗日本製嘅產品。通常見到 "Made in Japan"都唔會放過呀!哩對杯幾靚。

另外今次住嘅酒店遇到嘅問題係啲插頭位好貼,如果我哋用香港帶去嘅轉插頭,通當都唔可以同時放兩個插頭,所以見到哩個插USB嘅插頭就買咗兩個,咁就可以下次用啦!

行到十二點幾出嚟萬無目的四圍盪,經過公園門口,又見到幾棵滿開嘅櫻花樹,離遠影原來都幾靚。


跟住都無咩地方去,我哋又去行公園。

哩日好多白鴿喺到,佢哋唔怕人咖!


睇完白鴿,諗住返上野JR駅食一蘭拉麵,不過大笨蛋話佢想再食多次伊豆榮嘅鰻魚飯,因為香港食唔到咁好味嘅鰻魚。

哩次嚟因為係食午飯時間,所以要等幾個字先可以入座。

大笨蛋食返之前嘅套餐 ~ 鰻魚飯配魚生



我哩個套餐樣樣都有啲,滿足晒我嘅要求,哩到啲天婦羅都好好味呀!


肥美嘅鰻魚

好味嘅天婦羅

連配菜都唔錯

魚生好新鮮

食飽飽就行返酒店攞齊行李去京成上野駅坐Skyliner離開啦!

攞返第一日喺機場購買嘅套票去counter換乘車劵

我哋準備坐13:40開出嘅班次

時間啱啱好要上車啦!

 車廂寬敞唔多人

櫈腳都係有得义電

八個字就去到機場,喺機場三、四樓商店街行咗一陣,無咩嘢買就過海關。


點知喺海關過檢時,個背囊過幾次都過唔到檢驗機,所以關員要求檢查我嘅背囊,不過個關員搵咗幾個字都搵唔到問題所在,最後佢哋喺我袋裡面一個信封內搵到張Swiss Card,咁真係無話可說,雖然好唔捨得,因為佢係我喺瑞士買咖!但都係要比佢哋沒收啊!


我一向都好小心將指甲鉗同小刀放喺喼,不過今次我喺第二日將Swiss Card攞出嚟用之後就唔見咗,我無諗過佢會留咗喺個背囊到,最搞嘢係我喺行程第四日買咗個新背囊即時用,明明將啲嘢倒晒出嚟再換去新背囊,但都無發現張Swiss Card入咗喺個信封裡面,所以關員都搵咗好耐,佢哋認為係刀仔、指甲鉗之類,無諗過原來係一張咭咁薄嘅Swiss Card。

我問可唔可以寄返香港比我,佢哋話只可以寄返日本,境外就唔得嘞!當時又唔記得有朋友剛剛當日到達大阪玩六日,事後先諗起可以搵佢幫我,算啦!原本都以為唔見咗!唯有有機會再去瑞士買過啦!

過咗海關後就作最後衝刺,但最熱門嘅薯條三兄弟已經比人掃清晒啊!

白痴戀人就大把,不過我無興趣啊!

香蕉蛋糕都有好多,喺Skytree買唔到可以喺到補貨。

哩到好多強國人,佢哋好瘋狂,好似啲嘢唔使錢咁,買嘢時又推人,排隊時又打尖,最離譜係喺收銀處hold住個位然後不斷咁叫啲friend同佢攞貨埋去,真係你哋玩晒咩!所以我都無咩心機睇,見到就討厭,早走早著呀!

去候機室搵個位义吓電上吓網,好快就上機返香港,結束哩個行程後,要等到十月先可以再重新出發啊!

《完》