2011年11月12日 星期六

11月11日

好多人都話11月11號係好日,又話易記,宜做哩樣做嗰樣,但對於我自己就有唔同感覺,因為兩年前嘅11月11號就係惡夢嘅開始。所以我對哩日嘅印象嘛嘛哋!

噚日同公司攞咗半日假去做一年一次嘅檢查,去到醫務所先諗起係11月11號,突然心裡一寒,好彩所有報告出嚟都一切正常啊!



2011年11月6日 星期日

三門仔、馬灣

好耐無寫blog嘞!自從Yahoo Blog "Upgrade"咗之後,覺得好唔慣,所以提唔起勁去寫。再加上近期工作比較忙,每日返到屋企都只係想賴喺床上,所以個blog都比我荒廢咗好耐啊!係時候寫返啲嘢啊! 但寫啲咩好呢?

十月中嘅時候,一口氣放咗十六日假,本想出外走走,但由於家中有啲事要去處理,所以行唔開。 不過又唔想嘥咗十幾日假,所以搵咗幾日喺香港某啲地方走走。

其中一日去咗三門仔釣魚,之前嚟過哩到玩,好鐘意大海嘅感覺啊!



入到嚟哩到感覺環境真係好舒服啊!


當日所見,好多人都攞住相機嚟哩頭影相,當時我哋喺碼頭等魚排嘅排主開艇嚟接我哋,啲影相發燒友重想跟我哋一齊上船,以為我哋去啲離島玩呀!




釣魚嘅時間好快過,轉眼又到日落嘅時候,哩到黃昏嘅景色真係唔錯啊!



另一日就去咗馬灣,因為好耐以前睇咗套「最美麗的第七天」,覺得哩到好靚,成日都想嚟行吓啊!但嚟到原來係兩回事呢!

一上碼頭就係一條林蔭大路,好舒服啊!



行咗陣就嚟到馬灣沙灘,當時真係想跳落水游返兩轉啊!



哩個景就係我成日喺人哋嘅相到睇到,自己嚟到又好似唔係太特別啊! 而且如果講沙灘嘅環境,我都係比較喜歡我去開嘅銀線灣同埋清水灣多啲。




兩條橋,究竟邊條先係青馬大橋呀?

返到中環見到我哋旅遊發展局為遊客而設「漁船」啊!