2010年4月15日 星期四

150410 約見電療醫生

今日下就又返醫院見電療醫生,其實咪又係之前化療嗰班醫生,今次約見嘅醫生就係之前好惡嘅女醫生,不過佢今日心情好似幾好,解釋成個電療過程同講解要面對嘅問題都好清楚。

療程將會喺兩至三個星期後開始,但正式開始日子暫未排到,要等電話再通知,而治療期限係六個半星期,一個星期五次,即係三十二至三十三次。所以以我估計應該六月可以完成晒所有療程,但醫生就唔能夠覆實,佢話要睇一切完成後再做評估先決定到,所以哩個都係我一廂情願咁諗囉!不過我相信應該都差不遠啊!                    

          
          

見完醫生等咗個半鐘先輪到我入去設計房做素描同喺身上mark位做模,我突然覺得自己好似一隻就嚟比人宰嘅豬瞓喺張豬肉枱上,任由兩女一男嘅護士喺我身上畫嚟畫去,用紅筆畫線、黑筆紋黑點,紋咗五點真係好鬼痛呀!哩啲黑點唔可以整甩咖!要一直keep到個療程完晒為止!所以沖涼要小心啲啊!去到最後我覺得最尴尬係當上半身畫到大花面後,個男護士話要影返幾張相做記錄,咁我就係喺咁嘅情況吓影咗幾張寫真啊! 影之前每張重好似啲豬咁貼返張有我個名同編號嘅貼紙喺我身上添呀!

                         

      

而家就靜待噚日第六針嘅副作用出現同埋電話通知電療開始嘅日期嘞!

 

P.S. 28/04/2010  

等咗十幾日,醫院重未有電話嚟,真係等到好心急啊!幾時先可以開始啊

   

 

 

2010年4月12日 星期一

120410 成功過關啊 & 140410 完成最後第六針

120410 哈!哈!成功過關啊

今日覆診,抽血報告全線合格,所以已經約咗星期三上就打最後一針啦!打埋哩針就可以完成晒化療嘅療程啦!

           

    
      
  

跟住星期四就見電療嘅醫生,為將會做電療而準備。好快好快就可以做返「正常人」啦!

  

140410 完成最後第六針

終於打完最後一針完成歷時四個月嘅化療,今日所有嘢都順利進行,而且心情非常輕鬆重有少少興奮添啊!今次學醒咗啦!護士落針時我話佢知邊條血管次次都失敗,叫佢唔好試,咁就減少不必要嘅痛楚,之後亦帶咗暖包敷住注射嘅血管,等佢唔好收縮,咁吊針時間可以快少少同埋之後隻手亦冇咁拉扯感覺。

唉!點解我個人咁後知後覺,到最後一針先識哩啲嘢,真係覺得自己好白痴啊!

不過唔哩咁多啦!完咗就算啦!哩個化療中心我以後都唔再嚟咖啦!



 

 

2010年4月8日 星期四

240310 ~ 080410 努力中!

繼上次打完針後都有兩個幾星期冇update個blog啦!因為今次除咗打針後嘅副作用令身體唔舒服外,亦因為天氣唔好,屋企人病完一個又一個,最後都感染到我都中招,所以自己都咳同流鼻水咗成個星期,而家距離最後一針重有幾日,唯有盡力做運動同食返多啲嘢,希望下星期一可以順利過關啦!

    努力…!