2015年4月12日 星期日

Day 5.3@ 雲場池、王子購物廣場、味の街

2015年3月18日 / 星期三 (第五天)
09:10~10:19 |  (北陸新幹線) あさま605号 | 上野  → 軽井沢 (指定席) 5,900円
12:19~12:38 | (草軽バス) 軽井沢と草津温泉  | 旧軽井沢 → 白系の滝  620円
13:10~13:29 | (草軽バス) 草津温泉と軽井沢  | 白系の滝 →  旧軽井沢 620円

(交通收費及詳細資料請往實際交通篇)
酒店:アパホテル<軽井沢駅前>軽井沢荘

一點半就返到旧軽井沢銀座通り,先去Church Street食晏先!

哩個商場都有幾間幾吸引嘅食店

最後覺得哩間唔錯,於是就食佢啦!

睇相好似吸引啲,實際食物就嘛嘛哋!

啲肉有啲硬,不過咖哩幾好味!

食飽飽後要去洗手間,軽井沢係無咩洗手間,同埋有都係要收費,其中一間就係Church Street,所以解決埋先行,但好得意洗手間門口有個入錢位,但放100円落去都係跌返出嚟,後來睇真啲,原來個入錢位只接受代幣。

代幣要喺隔離部機換,原來唔係我大鄉里,我喺門口等大笨蛋時都見啲日本人都唔知,搞嚟搞去都入唔到去,忍唔住埋去幫佢哋換代幣,點知亞太太見我幫佢,鬼咁熱情咁多謝我,同我係咁講係咁講,我唔識日文,佢唔識英文,大家身體語言傾咗一陣,最後講Bye Bye時佢重同我嚟個擁抱,真係好熱情啊!我唔係好慣添!

跟住再行旧軽井沢銀座通り,另一間都係賣蜜糖好出名,上次嚟店舖堆滿遊客,今次真係空洞好多啊!

跟住就嚟到龍貓專門店。喺我出發前我日日都會上Line Camera睇吓當地嘅情況,軽井沢我都日日上網睇,哩間店就係Line Camera影住嘅位置啊!

所以我做咗一個好無聊嘅舉動,就係走埋去個Camera前跟住上去Line Camera影返自己呀!真係好無聊不過又幾得意啊!

行到龍貓店後就返轉頭,行過去雲場池。

我記得雲場池係由我上次住嘅民宿條林蔭大道行過去。哩間就係當年住咗一晚嘅Pension EXE,由一對老夫婦主管。

而另一間喺佢哋對面,由一對年青夫婦主管,叫CoCoMo,本來今次想住返佢,但上網預訂條線出現error,嚟到先知原來原址已經變成一塊咩都無嘅草地。唔怪得上唔到線啦!

沿住哩條路一直行一直行,就諗返喺多年前同朋友LH嚟嘅時候遇到嘅趣事同埋大家嘅傻事。
 

一直行大笨蛋一直問到未咖?我明明記得唔使行好耐,於是佢上網查吓個位置,我竟然不經意同佢講我哋要去嘅係大正池,佢一查話好遠喎!我睇吓佢個地圖,點解見到上高地嘅,原來我真係好掛住上高地嘅景色,講錯咗上高地嘅大正池,今年十月就會向大正池進發。 家陣要去嘅係雲場池至真。

過咗迴旋處繼續直行


行咗四個字終於到啦!

但係點解會變成咁嘅!!池境灰暗就預咗,但池邊好污俗。一啲都唔清,又無鴨仔或鴛鴦喺到游水。

湖邊可能剛剛溶雪無耐,所以泥土好鬆軟,好難行同有啲污糟嘅感覺。

大笨蛋不斷話點解要嚟,其實哩到啱季節係好靚咖!上次嚟雖然無櫻花、無紅葉,但綠油油咁好舒服好靚咖!有相為證咖!

攝於2007年6月@雲場池

攝於2007年6月@雲場池

 攝於2007年6月@雲場池

時間唔啱,無計!跟住都攰攰哋,於是就行返酒店Check In。返到酒店休息咗一陣,大槪六點我哋就出發去酒店附近嘅Prince Shopping Plaza (王子購物廣場),嗰到晚上營業至七點,如果係鐘意買嘢行Outlet嘅朋友,一個鐘真係唔足夠行哩個咁大嘅Outlet。但對於我倆,一個鐘行晒哩個Outlet真係卓卓有餘,我意思係喺Outlet行一周嘅行。

如果間間店舖都入去睇吓,相信一日都行唔完啊!


反而吸引我哋嘅係湖中嘅亭喺黃昏嘅藍天襯托吓覺得好靚。

 係到留逗咗一陣影咗好多張相。


大笨蛋重悶我話哩到靚過雲場池多多聲喎! ~ ~ 無語!


反而哩間運動舖做到我生意,我個背囊啱啱爆咗兩條拉鍊,重諗住返香港要買個新,點知喺到見到個啱心水重做緊半價,二百幾蚊都幾抵,所以就買咗佢返去即用呀!

有收獲後就準備離開,商場都有廣播叫客人要開始離開。咁就行過去Outlet隔離嘅味の街食晚飯。


睇吓食咩先!有間幾靚嘅中國料理,嚟哩到緊係唔會食中國菜啦!

 哩間熟成和牛焼肉,出發前都已經睇過資料諗住嚟食。

當然係因為啲和牛吸引我哋啦!


揀咗3,900円嘅 “最高級熟成和牛5種盛り合わせ 200g”

就係佢啦!一共十件,每人五件!

牛五個不同部位 

開動啦!

 好好味啊!

繼續繼續!

重叫咗個牛骨湯。

 真係好好食呀!



好滿足嘅一餐。埋單都唔算太貴。

食飽飽由餐廳出嚟,好凍呀!點解食飽嘢都咁凍,一路行一路震,行快兩步返酒店先得。

返到酒店食埋買咗嘅甜品同士多啤利做宵夜就早抖啦!