2016年1月16日 星期六

Day 2.2 @ 松本市、信濃大町

2015年10月11日 / 星期日 (第二天)
15:08 ~ 16:11 | [JR]大糸線 糸魚川方面(下り) | 松本 → 信濃大町
(交通收費及詳細資料請往交通篇)
酒店:ニュー竹乃家

休息過後就慢慢爬樓梯返落地下。


離開松本城就沿住大街前往繩手通,不過哩日係星期日,所以大街亦被封做行人專用區,街道兩旁好多商販擺檔,有賣生果、包點、手工藝品,再加上街上店舖,每間行吓睇吓,每檔行吓買吓,真係好開心啊!



哩間係旅遊客務中心,遊客可以入去裡面攞旅遊資料外,重可免費借用單車遊覽松本市啊!

繩手通前有間神社



終於都行到去繩手通,反而哩到比想像中少嘢行,行咗一陣又返出大街。








街邊有啲果樹 ,但唔知咩果實嚟。

喺大街中心聚集咗好多人,有好多大鼓、小鼓放咗喺路中心,應該會有一場精彩嘅打鼓表演,但唔知幾時會開始表演,而且真係越嚟越多人從四方八面向哩個方向嚟,我哋都係離開哩個人多嘅地方會好啲。 之前上網睇人哋嘅旅遊網誌都話松本市係一個寧靜悠閒嘅城市,但哩日我完全感受唔到哩份寧靜囉!

跟住我哋去咗無印行咗陣,就去車駅前嘅松屋食晏就。



食飽之後我哋去咗超市入貨,因為哩晚會喺信濃大町住宿,上網睇過哩區嘅食市大多早收(由六點至八點),剩下的大多至十點,但選擇亦唔多,再加上後一日要搭早車,所以決定哩晚喺超市買埋晚餐同早餐,稍後去到旅館就唔再出嚟。


買好嘢之後,先帶兩位靚太去車駅等候室坐住等我哋返酒店攞返啲行李再同佢哋會合坐車前往立山黑部嘅入口處 – 信濃大町。





一個鐘車程,有手機在手就唔覺得太耐,亞姨問上山會唔會睇到雪呢!我就話咪傻啦!而家先十月,上山係睇紅葉,點會有雪呀!點知當我Click去Live Camera一睇,點解成個山頭舖滿白雪咖!我當場呆咗,我重諗住無雪,將釘鞋底pack咗喺大件行李到寄咗去高山。真失察!

四點多已經到咗信濃大町駅


哩晚住嘅旅館就喺車駅旁,喺車駅行過去五分鐘內到。出駅轉左見到指示牌跟住行就會到。

見到養老乃瀧嘅牌,大家都覺得係養老院,其實係間燒肉店。

話咁快就到咗旅館,雖然外表好似有點舊,但入到裡面感覺又幾唔錯。(酒店詳情請往 ニュー竹乃家)

同埋網上話辦理入住手續嘅係個伯伯,但接待我哋嘅係一位太太同一位中年男士,太太只識講日文,見我哋係外國人後就留待中年男士幫我哋辦手續。佢可以用英文溝通。

 哩位先生問我哋聽日幾點上山,基本上嚟哩到住嘅人都係準備第二朝一早上立山,我話要搭七點開出嘅巴士,跟住佢就比咗立山黑部交通時刻表我哋後就帶我哋上房嘞!房間係二樓無電梯。


兩位靚太嘅房有洗手間無浴室。我同大笨蛋嘅就無浴室無洗手間。因為哩間旅館有浴場,所以太多房間都無浴室。為免一陣會太多人一齊去沖涼,所以襯時間尚早,先去洗白白。


浴場比想像中大同企理,因為之前上網睇好似話到個浴場麻麻地,但我哋又覺得都唔錯喎!
沖好涼都搞掂嘢傾陣計就開餐嘞!雖然簡簡單單,但大家都食得好開心,旅遊心情真係唔同啊!


食飽後各自返房搞自己嘢!我同大笨蛋臨瞓前再去浴場浸一浸,然後就早早上床瞓,因為要抖足精神為咗第二日嘅重點行程 ─ 立山黑部。









Day 2.1 @ 松本城

2015年10月11日 / 星期日 (第二天)
15:08 ~ 16:11 | [JR]大糸線 糸魚川方面(下り) | 松本 → 信濃大町
(交通收費及詳細資料請往交通篇)
酒店:ニュー竹乃家

2013年到訪松本時只係路過性實,只係住咗一晚及到松本城外影咗幅到此一遊嘅相就走咗!所以今次又有機會嚟到,就留咗半日同哩個松本市認識認識吓!

平常我訂酒店通常會揀啲不含早餐嘅Plan,但今次揀酒店時因哩幾日係日本假期,所以松本市酒店好Full,而哩間酒店亦都只係淨返包早餐嘅Plan,反正我都要等松本城開,就食飽飽先出發啦!

酒店早餐喺地下嘅餐廳,係24小時營業咖!食物都算多選擇,不過對於我哋嚟嚟去去都係麵包、咖啡早餐嘅人,多選擇都係食返嗰幾樣,所以除咗訂溫泉酒店外,我唔會特別去訂啲包早餐嘅酒店。


 十月餐廳掛滿萬聖節裝飾

餐廳地方唔太大,但食物種類都足夠。






對於我哋食量唔大嘅大人,其實早餐都唔會食到太多嘢。我通常一轉就已經飽晒。


食飽飽就攞齊行李去大堂,因為聽日要上立山黑部,所以首先將四件大件行李托酒店幫我哋寄去後日飛驒高山嘅酒店,每件都係千多円,我覺得日本哩個服務真係好正,尤其我哋哩啲要不斷地區移動嘅旅客。 (寄行李方法可參考哩到)

淨返兩件細嘅小行李就先暫放喺酒店,晏就行完街先返嚟攞返!

搞掂好嘢可以出發!行程第一景點 – 松本城,哩一日天色麻麻,落咗一晚雨,出發時都有少少毛毛雨。不過沿途好多好靚嘅植物喺街道兩旁美化街道。




 由酒店行過去十多分鐘,沿途經過繩手通,哩到會返轉頭先行,跟住就會到目的地。



有個檔販喺小廣場準備開檔


哩幅牆喺人哋啲遊記見過,而家我都見到啦!

哩間舖頭之前嚟都見到,不過未開,今次見佢開舖啦!係間書店嚟,因為老闆好鐘意松本城,所以自己店舖都搞到同松本城一樣呀!

哩個水池幾得意,但有啲無手尾嘅人放留底啲水樽垃圾囉!

終於行到松本城門外啦!


哩朝覺得松本市好多人向住松本城嘅方向行,我最初以為因為哩日係星期日所以遊客會多啲,但去到城本城門口發覺城內公園超超熱鬧,我唔識睇日本,但應該係日本全國地區嘅烏東麵店嚟咗哩到擺檔,真係好多好多檔,經過每一檔都店員送上一杯仔烏東比你試食,如果由入口一直食到入最後嗰檔,相信都已經飽咗啦!

雖然遇到哩啲熱鬧節目好難得,不過我自己本人覺得哩啲檔舖喺到完全破壞晒松本城嘅寧靜同城嘅氣氛。



個天色越嚟越黑,我哋喺城外影咗幾張相就快快入城。




松本城 (文章來自日本見聞錄 )
松本城是擁有日本12座現存天守當中天守閣最古老的城堡,是城堡迷絕對不能錯過的景點。日本所有的城堡當中,松本城唯一未遭遇破壞,以400年前當時的樣貌保存下來,非常珍貴。因為外觀釉黑,所以擁有別名「烏鴨城」。舊稱「深志城」。松本城與姬路城、彥根城、太山城同稱為日本4大國寶級城堡。


天守閣裡有個地方,據說是城主座的地方。這個地方有放1個三角椎,很好認。半蹲在上面,可以體驗一下作城城主的滋味。




 由天守閣望出去嘅景色。

一些關於城堡嘅資料

好鐘意哩啲大柱呀!睇親空間大改做,啲舊屋都係咁咖!



鑄做指彈呀!



爬咗一連串嘅樓梯後到咗天守閣最高處,出面亦落緊大雨,加大家都好攰,所以就搵個角落唔阻人嘅位置坐底休息一吓!

啲樓梯真係好企咖!

慢慢地從遠方見到天空開始出現藍色,雨勢亦越嚟越細。從天守閣望出去公園,哩日真係好熱鬧啊!



又行返落嚟到城門口啦!

喺城堡下再影返張先!

嘩!重有一片藍天添呀!

 去手信店買完嘢去埋洗手間就離開啦!