2010年3月22日 星期一

220310 終於一次成功過關啦!& 230310 完成第五針!

22/03/2010

今日嘅抽血報告終於全線合格,白血球指數重升到5.9添啊!所以順利批准聽日11:30打第五針啦!

今日哩個醫生係咁多個見過最正常嘅一個啊!一個有肚腩少少光頭嘅中年醫生,有問必答而且答案清澈,佢重好細心睇晒我嘅case之後話如果我打完晒六針先去排期做電療的話要等六至七個星期先可以開始做,所以佢就幫我寫紙叫我今日就攞去排定先,咁就可以慳返啲時間,到時一完晒化療,就可以好快咁開始做電療嘞!佢真係諗得週到啊!

由於今日公司有啲要事做,所以朝早抽完血就返咗上公司一轉,見返多月冇見嘅同事,大家嚟個擁抱,佢哋送上一連串嘅祝福、慰問,真係令我好開心同窩心啊!重有位靚太同事專登留起啲利是比我啊!繼上次喺街遇到老闆比利是,今日又有利是逗,真係利利是是,唔通今日咁順利就係袋住四封利是??!!哈...哈!咁我下次覆診打最後一針時我都袋晒哩四封利是去先得啊!

23/03/2010

今日順利完成咗第五針啦!即係重有一針咋!真係想快啲可以打埋佢啊!

今日哩姑娘手勢嘛嘛!竟然搵條最幼嘅血管插落去,唉!緊係唔得啦!痛餐死咪又係拮返上次個位。

哩啲自費嘅貴藥水係透明啊!唔係之前咁粉紅色,感覺上好似冇咁嘔心啊!



哩份係我每次抽血嘅指數,不過有啲都唔知係咩,醫生好少會每一項同我講,我淨係知 BW=體重 WBC=白血球 ANC=肝酵素。







完成咗吊針就打多枝鹽水針就大功告成,可以返得屋企開始做一條死魚嘞!

2010年3月19日 星期五

100310 ~ 190310 不經不覺快四個月啦!

到23號就已經放咗四個月病假啦!時間過得好快,喺哩幾個月除咗食同瞓真係冇咩建設性嘅嘢做到啊!

哩個星期嘅情況又恢復返正常,但下星期一又到覆診嘅時候,每次都係覺得最舒服嘅時候又要再挨過,不過重有兩針啫,好快就得咖啦!

希望22號可以遇到個「正常」醫生同埋順利打到第五針啦!

2010年3月3日 星期三

030310 終於打到第四針啦!

幾經波節,終於等到今日打第四針,約咗11:30打針,但唔知點解唔使錢啲針藥就會直接送到打針房,但今次係自己比錢,反而要預早啲自己去藥房排隊攞藥過去打針。

兩盒藥水,多謝承為HK$8,084.00

咁攞住啲藥去打針,今次係去一樓而唔係平時嘅四樓,哩層原來叫日間化療中心係專打化療針,並冇醫生喺到診症啊!不過姑娘做事作風就同上面完全唔同,其中一個好話我點解唔係屋企食定啲止嘔藥先,嚟到食又要嘥時間等成個鐘,但另一個又話要量過血壓合格先可以打針!

真奇怪,咁我食咗但血壓唔得我咪又食錯咗!我都係等佢話得我先食嘞!真係唔知佢哋嘅準則係咩咖!

我今次吊針要成個幾鐘頭先可完成,但嗰到個個都起碼要吊三、四個鐘,所以我都係好濕濕碎咋!吊針過程雖然長咗啲,但藥水流經體內嘅唔舒服感覺就好似比之前幾針少。而其他副作用就要再觀察啊!

多謝大家關心同鼓勵啊!               

   
 04/03/2010

P.S. 用咗啲咁貴嘅新藥,感覺好似都唔錯,啲作嘔、作悶同埋胃漲明顯減少咗!今日都可以正常用餐啦!所以大家可以放心啊!

 

2010年3月1日 星期一

010310 唔知係好彩定唔會好彩

今朝照例返醫院抽血,下就見醫生睇報告,但今日約見醫生時間係四點,比平常晏咗兩個鐘。初初覺得好怪,因為打針部門係收五點咖嘛!四點先見醫生咪好趕囉!原來有原因啊!


等到四點九先見到「失魂醫生」,佢話白血球指數係4,升返少少,而肝酵素亦下降返到41,但正常係35,不過既然係有下降嘅趨勢,咁哩針都可以打。


聽到哩到我好開心咁就問係咪即係可以食定止嘔藥等打針呀!(因隻好貴嘅止嘔藥係要打針前45分鐘食,當時已經快5點啦!) 佢答我係呀!我重前後問咗佢兩次,佢都答係,跟住就忙住填寫一大堆資料,重話照舊開返我食開啲藥比我,但今次我哩針係要自費打,所以佢話要搞啲嘢,返轉頭再同我講。然後就將print出嚟嘅report、覆診信等文件同file攞走晒。


喺哩個時間,身邊亞B女係咁催促我快啲食止嘔藥啦!如果唔係有排等,人哋收工咖啦!咁我咪「咕」一聲就吞晒啲藥,喺嗰刹那,「失魂醫生」返嚟話confirm咗啦!因為哩針係自費,啲藥唔同咗,今日冇得打,幫你book咗哩針星期三打呀!


吓.....! 醫生我吞晒啲止嘔藥啦喎!佢話點解你唔問吓我先呀!


吓.....! 醫生我問咗你兩次啦喎!咁而家點呀??


最後佢只係安慰我冇事嘅,啲藥有效5日,而且哩枝新嘅化療針冇咁嘔咖!唔使擔心啊!嗰刻我只好唯有接受佢實牙實齒嘅說話。佢重話你出去等,一陣姑娘會教你哩針要做啲咩準備咖啦!咁佢就收工走人嘞!


咁就又等啦!不過比平時等得耐,差不多最後一個入去,姑娘第一句問我有冇攞咗張覆診紙去預約下次覆診時間,我話冇啊!醫生都冇比。姑娘:「唔係嘛!我哋哩到都冇喎!咁去咗邊呀?咁有冇比抽血紙你呀!」我再話冇喎!姑娘:「吓!咁你即係好返唔使再嚟咖啦!」吓..!唔係呀話姑娘。姑娘:「如果唔係你好返,有咩理有又冇覆診紙、又冇抽血紙呀!真係激鬼死呀!」佢應該係話個醫生。


又搞咗一大輪姑娘都搵唔返啲文件,咁佢就手寫過晒一set,再同我講解聽日同後日啲止嘔藥點食,我話比佢知我啱啱食咗一次啊!姑娘:「吓!你食咗....!咁而家點呀!」醫生話你哋姑娘會話比我知會點做啊!姑娘反眼加氣頂:「唔係呀嘛!」跟住佢唔識講嘢咁制!最後佢話聽日同醫生搞清楚咗先再打電話比我。但都已經搞到成六點,預約覆診同交錢買藥嘅部門都收咗工,要過急診室嗰邊同人一齊迫。真係好多人啊!但最後原來哩位「失魂醫生」只係開咗一隻普通嘅止嘔藥,其他食開尤其打完針要食嘅抗生素都全部冇開到。咁點算....!


最後八點先返到屋企重要係咩都冇做到,但無論如何星期三可以一定打到第四針,其他我都唔想諗啦!大不了咪又做返條嘔吐獅子魚囉!