2010年10月29日 星期五

又出發啊!順德盤龍峽

啱啱噚日喺台中返嚟,啲嘢都未拾好,聽朝又出發去盤龍峽玩兩日啊!哩次係公司搞嘅旅行,早在個多月前已經報名,開頭都冇諗過搞到咁緊密咖!當時仍未決定去台中,只係因為公司有津貼,只須六百多元已經包括所有費用,所以覺得好抵玩咪報名囉!

聽日都應該會好天,不過希望唔好咁凍啦!

我諗見到薰衣草嘅機會都不大啊!




2010年10月25日 星期一

台中輕鬆四天團 25/10 ~ 28/10

哈...哈...哈! 終於可以去旅行,成年冇坐過飛機嗱!真係未出發先興奮。
其實今次選擇咗幾個地方,最初係想去北非突尼西亞,因為有朋友去過,啲風景真係好靚,但B女媽咪攞唔到咁長嘅假,而且我老豆又好似冇咩興趣,所以就想轉去沖繩,不過又係因為我老豆,佢極唔鐘意日本,尤其近期釣魚台事件,更加唔使諗呀!所以最終扑搥決定去台中嘞!

除咗好耐冇去玩而興奮外,亦因為表弟一家人都join埋我哋一齊出發,一行十人,真係好熱鬧啊!就因為實在太多人,再加上爸、媽、姨媽佢哋對腳麻麻哋都唔可以行太多路,所以最終都係選擇跟團。



今次嘅行程會比較休閒,主要睇風景為主。

清境 ~ 希望天氣好可以影到雲海同睇到日出啦!
 


日月潭 ~ 可以去浸溫泉,正呀!


逢甲夜市 ~ 哩到好多嘢食同好多嘢賣,我諗可以喺到敗家嗱!



出發嗱!Bye
 





2010年10月18日 星期一

切燒豬呀!

今日公司為咗慶祝新老闆上任,所以訂咗隻燒豬返嚟切,除咗有燒豬,重有燒鴨同雞添呀!雖然我唔食得,但見大家食得咁開心,我都覺得好高興呀!


好大隻豬豬呀!




師傳斬得幾落力!



2010年10月9日 星期六

幸運

不經不覺復工都兩個月,表面睇一齊好似回復正軌。頭髮亦長得多咗,望落去已經好自然,所以行喺街上已經唔會再有人用啲特別嘅眼光去望啊!感覺真係舒服好多呀!不過要好似以前嘅長度就真係起碼要等多一年以上啊!



剛剛過去嘅星期日,我參加咗哩區教堂主保瞻禮,夜晚有敍餐,一向欠缺抽獎命嘅我竟然抽到最後嘅壓軸大獎,係一個聖家像,重係由湯漢主教親手頒發,而且佢重親自幫我為聖像祝聖添啊!真係令我好興奮呀!