2008年11月23日 星期日

越南五天團(第一天)

15/11/2008(星期六) 天晴    香港 胡志明市


每次出門旅行都係落大雨,從未試過好似今次咁好天,真係有啲不詳預兆。



香港機場已經有晒聖誕裝飾啦!



大會指定時間兩點集合,但我諗住早啲去到見到領隊可以早啲寄咗啲行李可以去Terminal 2 邊食吓晏仔,所以1 點半已經到咗,點知個領隊成1點9先到重要慢慢搞啲登機證,最後得返半個鐘比我哋,咁唯有去大家樂,又多人啲嘢又貴又唔好食,四個下午茶餐食咗百幾蚊呀!搶錢呀!


三點三再集合攞返晒所有證件入閘,但從領隊短短十多分鐘簡介就已經提咗六、七次叫我哋唔好出夜街,因為有電單車黨好危險,所以七點後就留喺酒店唔好出去嘞!好彩我睇過吓越南啲資料,如果唔係真係會比佢嚇親呀!


!解散後我哋一行七人浩浩蕩蕩咁過關嘞!


今次成員有:


Peter仔(我老豆) B女媽咪、阿妺(B女家姐即係我姨媽) 、表妹、我肥家姐同埋同我去過京都大阪嘅大笨蛋(即係我細妹呀)


B女同阿妹一入到免稅店就好開心,四周圍睇嘢同入貨,而我又大意,將最後召集嘅時間當成可以上機嘅時間,所以搞到人哋喊晒咪我哋先跑到閘口登機,跟團同自由行真係差好遠,個腦完全放底咗!成個人都鬆懈晒!




去越南只係兩個幾鐘機,坐吓食吓飛機餐就話咁快到咗胡志明市嘅上空啦!



到達時已經係當地時間六點幾啦!




由於哩個機場係舊年先啟用,所以好新,感覺並唔係咁落後




攞晒行李就上旅遊巴嘞!成團得十六人所以都坐得好鬆動呀



導遊自我介紹一番後就先幫我哋唱錢,咁我哋就係咁意唱住百六萬使住先啦!…哈…(其實即係HK$800.00咋!) 


今日第一個又係最後一個行程就係食晚飯 - 越南河粉




有好多不同嘅香料比你自己落



我要生牛肉河,但啲牛肉實在太啃o趙唔到,但個湯就好清甜囉!




食飽飽就返酒店,我哋今晚住八達酒店(Bat Dat Hotel),係哩幾日最好一間,跟住會越住越差


 


大堂



房間都幾大同啲設備都幾齊全啊!



因為真係好早,所以我哋都落街行咗陣,其實只要唔好帶啲大袋同埋自己小心啲!都唔係講到咁恐怖啫!返而過馬路就真係好考人嘞!佢哋好似大陸咁好多電單,當你過馬路時佢哋不斷喺你身邊穿插,真係每行一步都驚心動魄,但當過晒條馬路時竟然重可以安然無恙咁企返喺到就好有成功感嘞!




其實酒店附近都冇咩特別嘢行,哩間餐廳導遊話好出名食燒乳豬喎!啲乳豬全部即叫即燒



行咗大半個鐘就去酒店街尾嘅檔口買咗個法包試食嘞!嘩!好好味呀!



酒店對面有間便利店都算方便啊!



食埋杯乳酪就沖涼瞓覺嘞!都只不過係十點到咋!



土多啤利乳酪 - VND3,600 = HKD1.80


8 則留言:

  1. 唔知可唔可以自己去呢
    [版主回覆11/24/2008 12:44:00]應該到冇問題, 我覺得哩到比大陸安全呀! 而且喺胡志明市啲遊客區好多人都識講廣東話同英文, 做好準備功夫就冇問題啊!

    回覆刪除
  2. 架車都幾靚喎...不過間酒店就麻麻地喎
    [版主回覆11/24/2008 12:47:00]都OK啦!你睇間酒店娘娘哋, 但都幾舒服, 最緊要係乾淨企理囉!三星算係咁咖啦! 我試過喺台灣住嗰啲三星都係好恐怕咖! 啲床有嘢咬咖!

    回覆刪除
  3. 你真係搞笑, 好天就有不詳預感  
    d電單車真係好誇張呀, 我可能都會唔敢過馬路.
    碗越南河同埋個法包已經睇到我流晒口水喇!
    [版主回覆11/24/2008 21:04:00]因為次次喺香港落大雨去到目的地就好好天咖! 真係未試過咁好天咖! 所以今次連越南未試過打風我哋都遇到呀!
    我初初都唔識過呀! 後尾就死就死啦! 但佢哋都好守規矩咖!你一踏出馬路佢哋會就住你行, 只要你唔好退返後就得咖啦! 因為佢哋會喺你身後片過, 一退後就會出事咖!
    我最鐘意啲法包,真係好味到唔識點形容呀!

    回覆刪除
  4. 我去果時個導遊都成日話夜晚最好唔好出街, 好危險喎, 有電單車黨搶野, 所以我都無點出去~~
    d法飽真係好好味呀, 不過只係街邊有得買~~
    [版主回覆11/25/2008 07:34:00]我哋個導遊都有講,但我睇過啲blog話唔係佢哋講到咁誇張,我哋又多人所以都喺酒店附近行吓囉! 遠就冇去啦!
    係呀!而家都好回味呀! 我哋喺酒店旁有個靚姐姐賣法包好好人咖! 所以我哋都幫襯咗佢幾次呀!

    回覆刪除
  5. 嘩!舊年小子去時D電單車冇0甘誇張多0窩!
    十六人一架車,正!
    [版主回覆11/25/2008 20:57:00]嗰啲電單車真係多到嚇死人咖! 我哋第一次真係企咗喺馬路好耐先過到馬路呀!
    係呀!人少少唔錯咖!

    回覆刪除
  6. 你寫Blog越黎越Pro.... 勁....
    Pui
     
    [版主回覆11/26/2008 21:20:00]哈...哈! 你都唔弱喎! 靜靜雞出咗blog都唔知添! 咁你都寫返個越南之旅啦!

    回覆刪除
  7. 去越南只係兩個幾鐘機,坐吓食吓飛機餐就話咁快到咗胡地明市嘅上空啦!  <==  係胡志明巿吖嘛(又打錯字~~~~  ~.~)
    [版主回覆11/29/2008 15:12:00]咩呀! 一時手快啫! 咁叻你嚟啦!

    回覆刪除
  8. 大陸現在少左好多電單車咖啦!只不過江門仲系鬼死甘多電單車。
    [版主回覆11/30/2008 17:35:00]但我覺得江門都唔算多啦! 越南真係多到望唔到地下咖!  

    回覆刪除