2008年11月23日 星期日

越南五天團(第三天)

17/11/2008(星期一) 天陰  頭頓 (耶穌山)  胡志明市

今朝一早都係喺酒店食早餐,但今朝好多人呀!首先又冇位坐要等位,跟住啲嘢食又補充唔切,個個盤都係空,所以今朝都冇心機影相呀!


原來今朝B女同阿妹一早出咗去沙灘游水重拾咗好多靚貝殼添呀!



準時九點出發去耶穌山嘞!其實耶穌山只係距離我哋酒店五分鐘車程,所以話咁快就到咗嘞!



耶穌山 (Giant Statue of Jesus Chris)


這座屹立在頭頓半島南方、標高約136公尺的耶穌山聳立著一個40公尺高白色且張開著雙臂的巨大雕像-耶穌像,遊客可從像內的螺旋梯直通像的肩膀,每邊肩膀可容得下大概三個人,站在耶穌像的兩個肩膀上,一邊眺望頭頓市全景,另一邊望向南中國海,視野廣達360度,即時感受到大地在我腳下。




因為要行成八百幾級樓梯,我驚Peter仔同阿妹都行唔到上去,所以我、表妹同大笨蛋搶先上去,諗住返轉頭先join返佢哋


沿途有好多石像講述一啲聖經故事



十二門徒





行到半山啦



長長嘅樓梯呀!



轉入最後一行樓梯啦!見到耶穌同聖母啦!





一向缺少運動嘅我都行到上氣唔接下氣,好唔容易終於行到耶穌腳底啦!





因為知道要上耶穌肩頭重要上一條好窄嘅樓梯,而入去係要除鞋咖所以見入口處唔係好多對鞋喺到即係內面而家唔係多人所以就快快脆上埋去,如果唔係一多人就要等上去同埋裡面會好焗咖


!見到條樓梯都暈暈哋呀



條樓梯真係好窄呀!夠一個人咖咋!多一個人上落另外一個要貼埋牆先比人過呀!




嘩!終於上到去啦!啲風景真係好靚呀!哩都好好風好舒服呀!都唔記得行咗八百幾級啦!好值得上嚟呀!













哈!回望落耶穌腳下,原來B女佢哋都行到啦!只有肥家姐一個上唔到嚟!佢未到第一個休息站已經止步啦!



話咁快B女佢哋亦都上到嚟耶穌嘅肩頭啦!但哩到真係好迫好窄,要影相真係要就嚟就去,好彩唔多人,有足夠時間比我哋慢慢影完先返落去!


B女要坐底先可以入返去裡面呀!哩到已經佔咗耶穌肩頭看台一半位置咖啦!所以真係好窄呀!



又轉返落去啦!




耶穌啲腳指好肥大呀



耶穌腳指 對比 大笨蛋腳指



行到全身濕透咁返上旅遊巴,跟住好快就去鯨魚廟


鯨魚廟 (Whale Temple)




鯨魚廟已有百年歷史,古時在暴風雨中有鯨魚為拯救當地漁民,把漁船拖回時犧牲生命,所以鯨魚廟是為了紀念這鯨魚而建的,現在依然保存著這隻擱淺而死的鯨魚,以及140隻海豚的骨頭作供奉。






停留咗十幾分鐘就車我哋返酒店嘞!但並唔係比我哋返上房喎!酒店門口已經有三輪車隊等緊我哋啦




我哋一行十二間三輪車浩浩蕩蕩咁又出發遊頭頓市一圈,大槪一個鐘到啦!中途會有地方放底我哋比我哋影吓相,都幾得意吖




每位HKD60.00,另外再比車扶VND20,000(HKD10.00)做TIPS。


然後就比我哋返酒店沖個涼先再拾埋啲行李Check Out,成個人舒服晒就去食晏嘞



今日晏就有大頭蝦



我哋重自費叫咗青檸梳打、滴滴金咖啡同埋椰子大菜糕。全部都好好味呀!尤其個椰子大菜糕,而家諗起都流晒口水呀






食飽飽又要坐返兩個幾鐘頭返去胡志明市!中途又係去返個搶錢休息站


因為我喺網上知道牛奶果係越南嘅特產而且重要係哩兩個月先有得食,我之前喺其他地方見唔到,淨係哩到有,所以焗住喺到買一個試吓,我問清楚幾錢一個先再攞錢出嚟



嘩!個人真頭想伸手攞我張銀紙,我緊係唔比佢攞啦!跟住佢二話不說就同我切開咗四份,食落又真係幾清甜,味道好特別呀



所以B女又想買多幾個返酒店食,哩間野真係好唔老實呀!又搶錢又扼秤,不過有阿妹喺到你想扼都幾難!你想咋咋帝一定嘈到你暈呀!所以嘈咗輪先買到幾個生果。真係好煩呀


由於今日有個自費行程-古芝地道除咗我哋哩組外冇人肯比錢去所以哩個行程去唔成,變咗今日嘅行程好輕鬆呀


跟住去一間手工藝嘅店舖,係由政府開辦收留一啲被留燀炸傷嘅平民,然後教佢哋一啲手藝,所以當有人參觀時佢哋會好自豪咁舉起自己嘅製成品比你影相咖!如果你讚吓佢,佢哋重會好開心添咖



當我哋參觀完工藝店,導遊收到通知因為今晚將會有個颱風打入嚟胡志明市,所以今晚嘅船河係取消咗咖


由於胡志明市咁多年嚟未試過打風,但如果事後有咩事個市政府有關人仕要負責,所以有理冇理停晒所有嘢先啦


但我真係感受唔到有咩颱風跡象,最後我哋都係決定雖然有得出河遊船河但都上船食餐晚飯先走,咁總算叫做到過隻遊船啦!雖則我都知隻船有啲把鬼,但都要滿足吓B女佢哋啲好奇心,佢哋去唔到行程裡面嘅嘢硬係會忐忑不安。






咁六點半就食飽飯返酒店,導遊重千叮萬囑叫我哋唔好亂咁出街呀!打風好危險呀!佢真係未見過咩叫打風呀


最後哩兩晚我哋住天虹酒店! 係咁多間最差一間,啲房同浴室都好細,個花灑啲水重出得好慢添呀

 


咁返房食埋個牛奶果又可以沖涼瞓覺嘞



 


9 則留言:

  1. 牛奶果味道是否像山竹呢?
    The shells are so beautiful.
    又話VIETNAM 改善左好多...其實都好多人重好窮咁喎
    [版主回覆11/24/2008 13:53:00]我唔食山竹所以唔知似唔似啊!不過佢有啲好似牛奶嘅汁,所以叫牛奶果, 有啲似荔枝嘅清甜囉!
    啲貝殼真係好靚咖!我媽咪最鐘意拾哩啲嘢咖嘞!
    其實越南而家真係比以前好好多, 但導遊話越南貧富懸殊嘅問題都好嚴重, 我諗同中國都差唔多!

    回覆刪除
  2. 呀B女真係很叻呀!
    [版主回覆11/24/2008 20:48:00]我冇擔心過B女上唔到去呀!反而阿PETER仔同阿妹就真係令我SURPRISE呀!估佢哋唔到呀! 重係成團人得我哋幾個上到耶穌肩頭咋! 我都覺得幾自豪呀! 全團最大年幾嗰幾個反而咁醒呀!

    回覆刪除
  3. 如果我上耶穌山, 一定扯晒蝦呀!
    D三輪車好搞笑喎, 好似倒轉踩咁嘅.
    乜D越南人真係咁差o架, 搶人D錢都有嘅, 我會打佢隻手o架!
    椰子大菜糕, 真係好正咁bor, 我好想試呀! 我仲留意到你地好似餐餐都有炒鮮魷喎, 不過個樣就唔太掂喇.
    [版主回覆11/24/2008 20:32:00]我都扯晒蝦呀!但一場去到冇理由唔上吖嘛! 不過又真係好值得上去呀!
    係呀!啲三輪車我哋坐前面就可以睇風景囉! 都幾舒服咖!
    其實唔係到到啲人都咁衰, 係哩到啲人特別狼死囉! 所以我哋都唔想幫襯呀!
    啲椰子大菜糕真係好食到不得了呀! 其實我哋每餐啲送都差唔多, 但又整得幾好食咖! 你唔好睇佢哋樣衰衰呀!啲魷魚好林好鮮味咖! 所以我哋七個人一枱都餐餐清晒啲送咖! 食到返嚟要減肥呀! 

    回覆刪除
  4. 耶穌山要行8百幾級樓級都幾係野架, 行到我身水身汗, 不過d風景真係幾靚架, 咁辛苦都值得!!! 上去耶穌肩膊條樓梯真係好窄, 你去果時無咁多人喎, 但我果時好多人, 落樓梯時仲要有個大肥佬鬼佬上來, 都唔知點避佢喎~~
    你食晏果間餐廳我都有去, 杯青檸梳打好好味, 哈哈...可能又熱又口喝啦, 反而個椰子大菜糕無食過, 因為導遊無推介囉~~
    我想問吓你個導遊叫咩名?? 我果個叫"阿呂"呀, 唔知會唔會相同呢??
    [版主回覆11/25/2008 07:47:00]我哋真係好好彩, 冇咩人所以可以喺耶穌肩頭玩咗幾個字呀!我哋六個人重可以一個個影相, 啲椰子大菜糕係我去之前喺blog見到你哋食,所以我第一餐晏就已經問導遊邊到有得食,佢話頭頓最出名, 佢唔係好主動講多嘢!但你有須要佢會盡力幫嗰種囉!
    唉.....我都係喎! 佢又係叫阿呂喎! 係咪佢呀?

    回覆刪除
  5. 你寫BLOG十分生鬼兼傳真,令人容易投入!
    蝦!點解上次我個導遊冇帶我們行耶穌山0既?好彩你介紹得很詳細,連翻轉頭都再描繪多一次,使小子不用賣命爬上去都好像去了一樣,好野!
    [版主回覆11/25/2008 20:50:00]真係多謝讚賞, 我只係將自己感受同經歷寫出嚟啫! 我哋個導遊都冇跟我跟上咖! 佢只係喺山腳等我哋咋! 不過個領隊係一個好虔誠教徒所以佢就有一齊上囉!

    回覆刪除
  6. 哦,係好就要讚0既!
    你話導遊冇跟你們上耶穌山。梗唔上啦,你估他以前上得少咩,可免則免囉,0甘辛苦!

    回覆刪除
  7. 係呀係呀, 我果時個導遊係佢呀"阿呂", 佢話負責"永安"帶團喎, 哈哈~~
    [版主回覆11/26/2008 08:59:00]真係咁啱呀!

    回覆刪除
  8. 成個Yahoo Blog 我睇咗有四、五十篇越南遊記,你都算寫得特別詳細,好有心機。唔信你去揾下有邊個可以Post 埋 "耶穌腳趾"。揾到請你食"牛奶果"!
    [版主回覆12/03/2008 20:23:00]只不過係我個人特別鐘意啲人腳趾"肥du du", 覺得好得意所以post埋上嚟囉!

    回覆刪除