2010年5月6日 星期四

160410 ~ 060510 等待...等待...等待...!!

等待真係一個好悶、好心煩嘅時刻。 自三星期前見咗電療醫生後,就一直喺屋企等電話通知開始電療日期,但足足等咗三個星期都音訊全無。前幾日忍唔住打電話去醫院追問,佢哋留底咗我個名話check吓先轉頭覆,但最後都係石沉大海,打多幾次連電話都冇人聽或打唔通,唉....都唔知佢哋想點....! 咁搞法幾時先可以完成晒啲療程呀??  好煩呀!

哩個星期對腳重腫到好似豬蹄咁,行路都冇力,星期一返咗醫院抽血後,正式完晒化療嗰六個療程,所以就可以開始睇返中醫,由於之前啲化療藥太勁,醫生話我啲內臟件件都唔係太好,哩個亦係引至腳腫嘅原因之一,唯有而家慢慢調條理返,續件續件拾返好啦!真係好煩呀!



                      
                     
                    



      
Picture


P.S. 07/05/2010  5:00 P.M.
我今日密集式咁打電話去醫院追問佢哋開始電療日期,終於收到佢哋嘅回覆,係設計同埋量度電療嘅程序啱啱完成,File亦去到電療機嘅部門,但而家嘅電療機仍然排滿晒,所以未有空位比我住,不過佢話我係排喺龍頭,如果下星期有人完咗個療程,咁就會到我喎! 講咗一大輪最後個答案都係:「你繼續等電話啦!」

                                 無奈!!    
          無奈!!




17 則留言:

  1. 無錯,等待是令人最無奈的事情!為您代禱!
    一齊等啦!我都等抽針報告......

    回覆刪除
  2. 唔緊要啦!可能個天想妳執靚副偈先做電療。正如妳所講,身體裏面件件都唔係好好,如果依家立即做電療,可能會冇咁好。
    笑多D,多D正能量埋身,叫D副能量走!
    多D提醒自己笑多D啦!cheer up!
    [版主回覆05/07/2010 17:07:00]唉...因為等得太耐所以等到洩晒氣, 我今日再密集式咁追佢哋, 終於有電話覆, 但都係話未有位, 繼續等啊!

    回覆刪除
  3. 心情唔好會影嚮病情,你要輕鬆面對. 我初初病時,都係好唔開心,日日喊,而家好番6年啦!你都可以架,祝福你.
    [版主回覆05/07/2010 17:08:00]多謝你鼓勵啊! 都因為等得太耐所以等到洩晒氣, 放心啦! 有你哋嘅支持, 我而家冇嘢啦!

    回覆刪除
  4. 唔知有電療消息未呢?希望您一切順利!
    [版主回覆05/07/2010 17:09:00]我今日再密集式咁追佢哋, 終於有電話覆, 但都係話未有位, 繼續等啊!

    回覆刪除
  5. 唉!政府做嘢就係咁!我化療後都要做30次電療,應該會在QE做。不要氣餒,要好好調理身體呀!
    [版主回覆05/07/2010 17:11:00]我都係QE呀! 終於有電話覆, 但都係話未有位, 繼續等啊! 你都係要小心身體啊! 化療啲藥真係可以打到我哋散晒呀! 

    回覆刪除
  6. QE係幾好的,因為器材好先進咁話,所以咁多人等,
    我記得當年我奶奶鼻咽癌要電38次的療程,
    都係要等排期,佢仲係三期添,初初都諗係咪要轉,
    後來都OK,不過電療真係好辛苦,第8次開始就有反應,
    記得到時候煲定D好潤喉的飲品,現在差唔多熱天,
    最好係鮮榨西瓜汁,凍飲特別舒服,
    我奶奶果時有睇中醫,中醫開左D舒緩喉部潰爛的藥,
    又係雪凍飲既,仲有,一些凍的布甸、果凍,都好有效!
    我果時係用IMPACT(速愈素) 做芒果布甸,得又舒服又可以飲埋IMPACT,
    一舉兩得,另外,IMPACT加甘旬汁亦可。睇睇是否幫到忙!
    [版主回覆05/08/2010 11:31:00]你嘅提議幾好呀! 西瓜係我最鐘意嘅生果之一呀! 我而家睇緊嘅中醫除咗都我調理好個身體亦都幫我打定底, 等我做電療時減低啲副作用, 我諗到時情況應該唔會太差啊!

    回覆刪除
  7. 千萬不要洩氣啊!揾D野做下,等自已提起精神,諗多D正面野,要多D正能量啊!加油!
    [版主回覆05/08/2010 11:33:00]Thank you, Maggie!! 收到佢哋回覆電話其實心情都好咗啲啦! 起碼知道冇漏咗我吖嘛! 有你嘅支持我一定會努力啊!

    回覆刪除
  8. 請問你看那個中醫~ 我都想拾下d內臟
    [版主回覆05/08/2010 11:34:00]我去你個blog到留言啦!

    回覆刪除
  9. 世事是沒有樣樣都一帆風順的,多點忍耐吧!
    小子看過一有博士銜頭的中醫師,(在觀塘APM)收費不貴,醫術也好,最好是不用執茶煲藥,是用藥粉沖劑,不怕煲齈藥,可考慮。
    [版主回覆05/08/2010 11:40:00]知道啦! 等咗咁耐, 都係等多陣啫! 唯有咁同自己講啦! 我而家睇緊嗰個醫生我睇咗好耐咖啦! 而且佢喺我返工附近, 方便我復工後都可以搵佢呀! 佢都有藥粉沖劑, 不過醫生話我用煲嘅方法會好啲喎! 我以前都成日煲 齈孳咖! 所以我亞姨買咗個用電嘅藥煲比我, 哈...哈! 咁就有死啦! 小子, 多謝你嘅資料呀! 如果我有須要再問你攞吖!

    回覆刪除
  10. ....等候真係幾無奈洩晒氣,會為您身體代禱!
     
    加油啊!
     
     
    [版主回覆05/08/2010 11:40:00]多謝你呀, 阿耀!

    回覆刪除
  11. Hi Shirley, 好耐嚟你個 blog 探您。祝早康復,為您代禱!
    [版主回覆05/08/2010 11:40:00]Thank you Bear Bear !!

    回覆刪除
  12. 睇過你個化療過程好似同我差唔多時間電療, 真係好喇~ 有你同行, 我一定不會孤獨 。我癌腫係HER2比較惡而且擴散可能性大, 所以要電療30次再補電5次淋巴, 真係有d驚, 驚位置太近心臟真係會影響心臟衰弱架... 。兩個年輕設計模型醫生嚮我身上度尼度去, 畫尼畫去, 睇尼睇去, 我成個人硬晒, 雙手仲有d抽筋震震哋! 終於畫咗成粒鐘至大功告成! Shirley, 一齊肩負同一個旅程吧!
    [版主回覆05/08/2010 11:45:00]噢! 咁啱呀! 但我到而家都未有確實開始啲日子啊! 醫生話我唔需要電淋巴位, 但佢都有講可以心臟同個肝都可以會有影響, 而且亦因為電療而引至其他哋方出現另一個腫瘤, 不過佢話機會好微, 所以我哋都唔好諗咁多啦! 而家只要諗住做晒應做嘅療程就冇問題咖啦! 一於大家一齊努力、加油! 過埋哩關就好咖啦!

    回覆刪除
  13.  
    shirley:祝母親節快樂!也祝你一切順利!
    [版主回覆05/08/2010 20:18:00]Thank you啊!! 等我轉送比我媽咪先!!

    回覆刪除
  14. 「你繼續等電話啦!」 - 嘿, 真奇怪, 我總是覺得這是一個很美的祝福  
    居然有人讓我一直等待下去.  是的, 等待的過程, 有時真系幾令人發瘋, 特別系當我怕會等唔到的時候.  但是, 想真一下, 原來有人正在為自己做緊一D讓我可以變得更好的事, 好感動呢  
    [版主回覆05/08/2010 20:19:00]聽你咁講, 咁我就繼續靜心啲等啦!

    回覆刪除
  15. 祝你母親節快樂
    [版主回覆05/08/2010 20:18:00]Thank you啊!! 等我轉送比我媽咪先!!

    回覆刪除
  16. 恭喜哂!有電話覆好過無。真係要好好調理D五臟六腑呀!仲有排用加嘛!
    睇住中醫做電療,應該舒服好多的!加油!
    [版主回覆05/10/2010 17:56:00]啱啱收到電話, 聽日可以開始電啦!

    回覆刪除
  17. 終於我地都可以由(長頸鹿變成小烏龜)等是人生中最能叫我地學習的功課;聽說妳都是在QE做呢?我現在的標靶都是在一樓打,仲有7針,吾知我有無見過妳呢?妳要好好努力,我記念妳吧!
    [版主回覆05/11/2010 19:08:00]係呀! 喺政府醫院, 樣樣都要等啊! 我打頭三枝化療針就喺四樓, 尾三枝就喺一樓, 所以見過都唔出奇啊! 而家就喺地下做電療囉! 我都希望你快啲完成晒所有療程, 早日康復啊!

    回覆刪除