2010年9月3日 星期五

覆診日

今日係完晒癌症治療後第一次嘅覆診,依例去到都係要等一輪先可以見醫生,今次個醫生又係最好嘅唐醫生呀!佢好詳細咁幫我檢查全身,亦解答咗我一啲疑問,大致上都冇咩特別嘢,咁佢就話四個月後再返去覆診,跟住出去攞覆診時間同去藥房攞藥就得嘞!


點知去到藥房交藥單時,個工作人員話我要先去交藥費再攞埋張收條先可以攞藥。吓!我之前都唔使比錢,點解今次要我自己比呀?嗱嗱四個月嘅藥錢唔嘢少喎!


嗱嗱淋跑返去瘇瘤科大樓問姑娘,姑娘話因為我之前係編入化療組,診金HK$80係包埋藥錢,但而家我已經編咗入去普通組,診金HK$60唔包藥錢。所以而家要自己比藥錢。吓!咁都得!咁唯有叫姑娘搵唐醫生幫我寫Reference Letter話我要食哩隻藥然後去claim返公司醫療啦!


搞咗大半個鐘先可以攞到封信,咁就返落大堂counter計藥錢,點知個職員話唔使計,叫我過隔離窗口交錢就得嘞!吓!嘜唔使計咩? 咁就過去隔離窗口比錢,信用咭都攞定出嚟咖啦!點知個職員話:「唔該十蚊吖!」 我以為自己聽錯,問多次都係HK$10


唓!早講吖!HK$10我即係比啦!等我搞咁多嘢!真係激鬼死呀!不過而家諗返都好笑,點解藥房唔直接叫我去交十蚊要話去會計部計數;姑娘見我要寫Reference Letter都唔同我講只係十蚊啫!唔使搞咁多嘢啦!真係唔知好嬲定好笑,就係咁喺間醫院到謄嚟謄去,令今次本來平淡嘅覆診日增添咗啲趣味呀!


 


13 則留言:

  1. haha..每隻藥收10蚊架..好耐架啦!
    [版主回覆09/04/2010 08:06:00]除咗做化療、電療時,我之前係未試過喺政府醫院求診, 所以真係唔知佢哋有哩啲規矩,而且佢哋個個講到好似要比好多咁,,藥單上又冇例明喎!因為我家姐之前試過食開啲心臟藥無端端要佢比錢, 成二千幾蚊呀!

    回覆刪除
  2. 唔講真係唔知 ~~
    [版主回覆09/04/2010 11:21:00]係囉!因為除咗好貴嘅自費藥,但醫生會講明要自己比, 其他普通藥之前一直攞藥都唔使比咖嘛!

    回覆刪除
  3. 十蚊好平喎 ,有D藥好貴架,例如有D降膽固醇藥要廿蚊粒!妳感冒好番未啊? 返工後有冇時間做運動呢?
    [版主回覆09/04/2010 11:26:00]十蚊四個月藥真係好抵呀!早知十蚊就唔使我搞咁多嘢啦!
    我感冒好返啦!都因為返咗工office啲冷氣勁得制,冷親條氣管,不過而家冇事啦!但每日一返到公司就戴返條頸巾囉!
    我而家每逢二、四放工同埋星期六、日朝早都有去游水呀!今朝都啱啱游完返嚟,游完水個水都好似舒服啲啊!

    回覆刪除
  4. 公立醫院除了自費藥之外每隻藥收$10,有時見到d公公婆婆俾幾十蚊藥費,d藥多到要手用拉車(因藥水好重的),真係好抵架。但又有邊個想有病食藥oY.....
    [版主回覆09/04/2010 11:31:00]哦!原來係咁,我又以為係$10一次, 原來係$10一種藥,咁下次如果醫生開多過一隻藥, 咁我就唔會又白白痴痴咁去問人點解唔係收$10嗱!真係多謝晒你嘅提點呀!
    不過你講得啱,雖然好抵食,但有得簡就緊係唔想食啦!

    回覆刪除
  5. 十元的確好抵,恭喜妳由腫瘤科轉去普通科。
    [版主回覆09/04/2010 11:33:00]多謝多謝!不過我想再由普通科轉去唔使睇呀!  係咪貪心咗啲呢?

    回覆刪除
  6. 我第一次覆診都係出現冇比錢就去攞藥,不過我有問藥房D人幾多錢,佢地講交左$10,就可返黎攞藥.
    [版主回覆09/05/2010 07:13:00]但係藥房位哥仔係叫我去會計部計數, 跟住佢繼續講佢嘅電話冇再理我, 咁以我之前經驗係計親數都唔嘢少咖嘛!
    算啦!等自己又知多樣嘢囉!

    回覆刪除
  7. Shirley :         ~ 咁攪野 ? 好官僚 .     (玩死人麼 ...)
    Bye Bye !
    [版主回覆09/05/2010 07:15:00]咪就係!我寫篇網誌時諗嚟諗去都諗唔起個形容詞, 就係你講嘅官僚呀!

    回覆刪除
  8. 咚咚:媽咪你要開心快樂啊!2010年9月5日 上午8:48

    我成日蒂住老母親出出入公院就已經習慣晒啦!
    [版主回覆09/05/2010 11:07:00]我諗我都要開始習慣吓佢哋哩啲模式嗱!

    回覆刪除
  9. Shirley,
    點解你仲要攞藥嘅?係唔係荷爾蒙藥?
    [版主回覆09/08/2010 06:44:00]係呀! 係控制荷爾蒙藥啊!要食五年, 醫生每次開嘅份量係到下次覆診, 所以咪次次覆診見完醫生都要攞藥啊!

    回覆刪除
  10. 咁你未返工架嘛?!
    [版主回覆09/10/2010 19:18:00]我八月已經返工啦!都開始習慣嗱!

    回覆刪除
  11. 一於拿著省回的藥費同媽咪食番餐勁0既!
    [版主回覆09/16/2010 21:34:00]哈....哈! 所以上星期成家人入咗去長洲住咗晚酒店, 又食又玩, 我包起呀!

    回覆刪除
  12. 叻女兼乖女!
    [版主回覆09/17/2010 06:58:00](Empty)

    回覆刪除
  13. 因為唔同部門理唔同野嘛, 公營機構分公好「精細」o架, 我做咗幾個月完全feel到.
    $10藥費, 幾好喎, 又帶俾你驚喜!
    [版主回覆09/20/2010 19:48:00]總知政府嘅制度真係好死板, 好彩我嗰日都冇咩嘢, 如果係打咗針重走嚟走去就真係死得嘞!

    回覆刪除