2013年1月6日 星期日

Day 2.3 新加坡三天四人行

Day 2.3 : 小印度 →  Lavender →  牛車水 →  Lavender

離開Botanic Garden後,我哋搭返MRT去小印度,喺小印度略略行過啲大街當遊咗一個景點。




街市


印度傳統嘅物品


啲香蕉真係好似隻手咁,好大條呀!


好多金舖,啲金式好多款呀!





沿住小印度行返去Lavender方向


行咗大半個鐘終於行到去結霜橋叻沙,上次嚟食過到而家都重好回味,所以今次一定要嚟食返次。


哩個伯伯同炭爐相信好多人都識佢哋啊!本本旅遊書都印哩個嘜頭呀!


四碗叻沙到,我唔客氣啦! (SGD2.00 一碗)


真係好正呀!


最後每人encore多一碗,total食咗八碗,勁呀!


食飽之後就諗住行十分鐘就可以返到酒店,點知竟然橫風橫雨,避雨都等咗半個鐘,但都唔見有停雨嘅跡象,重好似越落越大,最後迫於無奈就務住雷雨行返酒店,返到去濕晒。


返到酒店都三點啦!嗱嗱淋換衫落去泳池游返轉先。



游咗大半個鐘就返上房沖個涼瞓一陣,五點鐘又再出發去牛車水。

喺牛車水行咗一陣手信店就去林志源買咗少少豬乾做手信。我買咗1KG招牌豬肉乾 SGD45.00


出發前有朋友托我買奇字油,佢話朋友送比佢好好用,但唔知可以喺邊到買到,上網亦搵唔到任何資料,喺林志源旁有間藥房,所以就即管入去問吓,點知真係有得賣喎!SGD6.00一枝。 不負所托。


再行一陣又開始落雨啦!


既然大家都行得差唔多,就決定離開去食晚飯嘞!


途經馬里安曼興都廟,係新加坡最舊嘅印度廟。


哩晚我哋晚飯嘅地點係瑞記(家嫂)魚頭米線,上次嚟想食胡椒蟹但話要早一日訂先有得食,所以今次我哋就早一日嚟訂位,本來老闆都話無咖!因為我哋前一晚太晏去訂,佢話無準備黑胡椒做唔到胡椒蟹,後來佢打咗幾個電話叫人幫手送啲黑胡椒,咁我哋哩晚先有得食咋!



一坐底先放底幾小碟,嗰碟青瓜、波羅好正呀!


我哋叫咗碟炒菜心,好細碟呀!


當然有哩到嘅招牌菜 - 魚片魚湯米線


上次食過哩個麥片蝦對佢念念不忘,所以今次緊係要encore啦!真係超正。
 


最後就係主角 - 黑胡椒蟹,味道......好似B女嘅薑葱炒蟹加咗黑胡椒咁囉!唔覺得太特別啊!


哩餐食咗SGD116.84,下次有機會再嚟可以唔使食蟹,麥片蝦就好啦!

食飽飽就行去Raffles Place搭MRT返Lavender,哩日嘅行程就完成咗啦!

 

Day 3.1 新加坡三天四人行


 


 

 

2 則留言:

  1. (家嫂)魚頭米線..係電視見過.相信食落味道一定好正!.......
    [版主回覆01/13/2013 10:58:30]哩間舖裡面影咗好多明星同老闆嘅合照, 都幾出名啊! 佢啲嘢食真係唔錯! 不過價錢就貴咗啲囉! 不過行程中一餐半餐都無咩所謂啦! 有機會你都同家人去試吓啦!

    回覆刪除
  2. Flor Flor 小小的陳夫人2013年4月12日 下午12:12

    HI, 請問去瑞記食胡椒蟹要早一日訂意思係特登走去訂一隻,之後就第 2 晚先去食先有呀?? 咁咪會重複路程去多一次??
    蟹...點計? 一隻、一斤計算??
    [版主回覆04/12/2013 13:37:24]其實可以打電話, 因前年去過瑞記話即日係無得食, 所以比張咭片我哋叫我哋下次早一日打電話去訂, 而我今次前一日係喺附近食飯, 所以咪直情走去訂囉! 其實佢哋啲景點嚟嚟去去都係嗰附近
    隻蟹係用kg計, 哩到兩隻六十幾蚊SGD囉! 你可以訂位嗰陣問埋佢價錢, OK先confirm囉!
    Tel: (65) 6224 9920

    回覆刪除