Day 2.2 @ 墾丁海生館

2013年9月21日

(由於天氣極之惡劣關係，好多情況係影唔到相，所以哩篇會文字記錄多，因為對於自己係好難忘嘅經歷，但如果怕淨係睇字又無相嘅話就可以跳過哩篇唔好睇嘞！)

前篇講到天兔越嚟越迫近台灣南部，當時我哋身在墾丁市內餐廳，雖然話係市內，但四周都喺幾空曠，所以風力都相當大。

導遊們見風雨略略減細就快快地安排我哋返上旅遊巴，向哩日唯一嘅行程海洋生物館進發。而平時海生館閉門時間係下午六點，但當日都提早四點關門。

雖然由餐廳去海生館只係幾個字嘅車程，但車外嘅風雨不斷咁打落旅遊巴上面，其實都幾驚啊！

由於由售票處到展館要行經分幾鐘嘅空曠地方，所以導遊叫我哋準備好雨褸，但佢之前明明話係全部都係室內，好似有少少比佢呃咗！(下圖紅色路線)

之前講過天兔最接近墾丁嘅時間係下就兩點至四點，當時我哋到達時間係一點幾，海生館又係建喺海邊，好似我哋海洋公園咁，四周亦係空曠地方，所以風力相當大。

我哋喺售票處旁派好入場卷，大家著好雨褸，導遊一聲領下沖呀！大家就一齊走出售票處向珊瑚王國館沖過去，但風力相當強勁，我跟本自己控制唔到自己嘅步伐，一時啲風喺正面吹嚟，我完全行唔到，一時又响後面吹嚟，我連企都企唔穩，差啲比風吹跌，好艱辛咁終於可望到珊瑚王國館嘅門口，就喺哩刻，一直喺我前面嘅導遊被風吹跌咗成個人轆咗喺地下，大笨蛋想扶佢起身都無能為力，因為喺強風下我哋無辦法企得好穏，所以出唔到力去扶人，一陣混亂之後終於到咗珊瑚王國館，雖然只有分幾兩分鐘路程，但真係好難忘。

入到室內時，同事們亦喺後面陸續到達，由於好多人都無諗過會咁大風雨，只準備咗遮，而當時遮已經係無用，所以大部份人都係買咗一啲好單薄嘅雨褸，經過哩分幾鐘路程，強風已經將佢哋嘅雨褸吹爛到四分五裂，個個都好似落湯雞，都幾狼狽啊！當然我同大笨蛋有準備一件正規雨褸，所以無事。

其實如果講多嘢睇應該要再由珊瑚王國館行過去世界水域館，不過經頭先一幕，導遊已經強烈見意大家留喺珊瑚館算了。我都係咁諗呀！

因為我之前都去過幾個大型水族館，所以好老實講哩個珊瑚館真係無咩特別，但咁嘅環境嚟就令我不生難忘呀！

哩個魚缸有啲奇怪，竟然放咗啲海鮮壽司模型喺到，表示啲咩呢？好似唔係幾好啊！

雖然無咩特別，不過睇吓啲魚仔游嚟游去都幾開心啊！喺到超慢速欣賞咗個幾鐘之後，就開始諗住返去售票處嗰邊等集合。當時三點幾，比起之前入場更大風大雨，館內好多天花同幕門都漏水，啲記念品店有輕微水浸。

當我哋走到出口處時，暫時封咗，因為有一道玻璃門被強風吹爛咗！眼見佢哋工作人員都束手無策，只係搵兩個人頂住道門，不過情況都幾危險，風實在太大，哩兩位人兄都好似唔係好頂得住。

企咗幾個字，雨勢好似細咗啲，出口亦開返比人離開，於是我同大笨蛋就牽實兩手喺強風下向售票處進發，啲雨喺風勢下打落塊面到好鬼痛呀！

好艱辛咁行到一半，過咗幾條大柱之後，感到啲風突然唔係向一個方向推，好似打轉咁，我同大笨蛋敵不過啲風力，大家都不由自主哋被風吹開咗而且企唔到退咗幾個身位，我當時真係幾驚，因為我已經無力企穏，如果我一跌底一定會被強風吹咗去，後面幾個台灣人見我哋吹散咗都好驚喺到大叫，佢哋就即時抱住身邊幾條大柱，我同大笨蛋只有盡力向前90度彎腰，最後大家都終於拉住大家，定神後再努力向前行，千辛萬苦終於可以返去售票處室內嘅地方，好驚...當時真係好驚，重來未有過嘅經歷。

大家最後都齊齊整整咁返上旅巴，原來大部份人都被強風吹散咗，有位太太亦被吹跌咗，本來重安排返酒店前會去一去恆春古城同老街，但嚟到哩刻，導遊們都已經唔敢再冒險，宣佈邊到都唔去要返酒店。

之前旅遊巴會人齊先離開，不過而家四間一齊行動，一間緊貼住一間嚟行呀！

與此同時，導遊亦都同我哋講航空公司已經取消咗我哋第二日返香港嘅航班，因為天兔打完台灣墾丁之後會直吹向香港，我哋哩次嘅行程係跟住天兔玩遊戲。

返到酒店後，原以為會安排喺酒店食晚飯唔再出去，但哩間酒店竟然話因為之前無預先通知，霎時間做唔到百幾人嘅晚餐，所以我哋都係要出返去市區食晚飯。

大家都好無奈，返房休息一陣，沖個涼後六點又喺大堂集合準備出發，不過當時已經覺得風勢同雨勢都無之前咁恐怖，出去食咗一餐略為豐富嘅晚餐，因為哩餐原本係行程裡面最後嘅晚餐嘛！

食飽飽返上車之後，導遊話由於原定返香港航班取消咗，所以旅行社(香港永安同台灣嘅旅行社)同我哋公司嘅工作人員正不斷聯絡航空公司爭取機會，首先希望可以攞到第二朝十一點幾飛嘅機位，但可能性不高，因為機位一早已經買晒，後補都無可能有百幾個機位咁多，最壞打算係遲一日走，不過為咗方便安排，所以第二日無論天氣好壞都唔會再走墾丁嘅行程，食完早餐後就立刻返高雄，如果有機會可以安排我哋即刻走，無亦都唔擔心，因為佢哋已經訂定高雄嘅酒店，所以我哋係唔使瞓機場。但一切安排都未落實，佢哋要十一點前同航空公司取得最後結果先知點安排。

我唔擔心要遲一日走，但就驚咁多人同時要爭機位，機場一定好混亂，睇新聞都好多要團友嘅機場呆等咖嘛！

返到房本想去三溫暖，但因颱風關係，驚室內玻璃會引至意外所以封閉咗，酒店上網嘅線路被颱風吹壞咗上唔到網，電視接收本來由幾十個台吹到得返三四個台可以睇，墾丁好多電纜亦吹倒，酒店只可以用後備電，所以間房就好似無冷氣供應咁，好彩我一向都唔怕熱啫！

無嘢做其實最好就早抖，但因為要等電話通知第二日嘅安排，所以都唔敢瞓住，唔使十一點，十點已經有電話通知聽日十一點班機我哋上唔到，所以一定要喺高雄滯留一晚，但聽日都要食完早餐九點半返出高雄，因為大家都唔知返出去嘅路面情況，所以都係盡早離開為妙呀！

第二日嘅行程就係喺咁嘅情況下完咗嘞！

續.... 3.0@三天變四天高雄、墾丁追風遊