2014年7月12日 星期六

Day1.4@白良浜、円月島黃昏

Day1.4@白良浜、円月島黃昏
2014年5月18日 晴天
01:45~06:10 | CX566 | 香港 → 関西国際空港
07:42~07:52 | [普通]JR関西空港線  日根野方面(上り) | 関西空港(大阪府) → 日根野(大阪府)
08:30~10:09 | [特急]くろしお1号  和歌山方面(下り) 新宮行 | 日根野(大阪府) → 白浜(和歌山県)
10:30~10:56 | [明光バス] 白浜駅前 → 白浜バスセンター (經臨海円月島)
11:40~11:50 | [明光バス] 白浜バスセンター  → 三段壁
13:20~13:28 | [明光バス] 三段壁 → 白浜バスセンター
(交通收費及詳細資料請往交通篇)
酒店:南紀白浜温泉 旅館むさし (武藏)

坐車返到白浜巴士中心已經一點九,因為我諗住去喜樂(日本喜字寫法係三個七字)食晏就,不過舖頭下午只開到兩點,所以有點趕之剩,我擔心人哋唔做我生意,好彩入到去侍應都招呼我哋。



我叫咗哩間店嘅人氣套餐 - 熊野路丼,我鐘意食魚生,但唔係每種魚都食,尤其紅色嘅吞拿魚,喺香港食會好腥,但哩碗魚生飯不單一啲腥味都無,每嚿魚肉都好鮮甜好味啊!侍應話白色嗰碗係撈落啲飯到食,不過佢無咩味之餘重好砬口,所以我無落到啊!


真係食得好滿足呀!食飽飽後,大家都好似好攰啦!不竟由前一晚到而家十幾二十個鐘,連我自己都有啲頂唔住啦!本想行埋白良浜沙灘先返酒店,但最後對腳都不由自主地向住酒店前進,準時三點鐘辦理入住手續。

辦手續時,櫃檯職員同我講貴志川士多啤利園落實咗我嘅預約(前文),估唔到我寫嘅預約信佢哋真係收到之餘重真係會跟我入住嘅酒店聯絡,當時真係好開心啊!

出發前寄出嘅預約信及內容



手續辦好後,有一位工作人員幫我哋推行李,我以為會推上房。由於哩到喺度假區,好多日本人都會嚟度假,不過佢哋只會帶輕便行李,好似我哋咁一個個大喼就比較少,所以職員間行李車都放唔晒我哋六件行李,唯有我哋自己推返兩件啦!


去到隔離座(由本館去南館),職員招呼我哋喺個休息間坐坐,每人飲杯Welcome Drink,之後就交鎖匙同講解酒店設備,但全程都雞同鴨講,大部份都係靠估,真係估唔到嘅時候就用寫,點知佢見我哋睇得明佢寫咩,佢就越寫越興奮,真係以為我哋識日文咁,其實我哋只係識睇漢字,佢寫埋啲日文字鬼識睇咩!不過嚟嚟去去都係話你知食飯時間、地點,浴場風呂開放時間、地點,所以都唔同佢糾纏太耐,快快攞咗鎖匙返上房比大家休息休息。



自己本來都諗住先去浸一浸溫泉,但實在攰得緊要,一坐底就已經好快咁進入夢鄉嘞!

休息到五點,諗住同三寶行吓沙灘,點知有兩寶仍然呼呼大睡,我又唔甘心留喺酒店等佢哋醒,於是就唔理佢哋,自己同大笨蛋去沙灘走走。


個沙灘真係好靚,啲海水好清,不過好凍,好似冰水咁,唔怪得無人落水啦!我重想落去游返轉添!



酒店好近沙灘,真係好方便

話咁快太陽快要落山啦!

無三寶同行,我哋嘅步伐快咗好多,影完沙灘就行過去好近沙灘嘅足湯橫丁

我自己覺得足湯橫丁都無咩特別嘢睇,所以影咗張到此一遊就算了。




返到酒店三寶已經义夠電啦!於是就出發同佢哋去御船足湯,只需喺酒店步行幾分鐘就到,哩個足湯係對住円月島,可以浸足腳睇黃昏。

哩到啲溫泉水比起晏就喺三段壁足湯嘅溫泉水熱好多,好似我咁受熱嘅人就好舒服,但表妹就接受唔到,熱到佢呱呱叫呀!


行出去碼頭可以再近少少欣賞円月島,碼頭好多人喺到釣魚,三寶都好鐘意釣魚咖!

所以佢哋都唔理我,四周圍睇人哋釣到啲咩魚,我哋三老表就影相,佢哋三姊妹就睇魚,不經不覺個太陽變成好靚嘅咸蛋黃慢慢咁落喺水面,如果秋天嚟個咸蛋黃會喺円月島嘅窿都穿過,喺白浜一個出名嘅景點嚟咖!


碼頭旁有嚿石好似隻青蛙呀!

睇完日落係時候返酒店晚餐,哩晚係自助餐呀!





種類好多好豐富,食到好飽啊!


食飽飽就過去24小時超市行咗個圈,唔知係咪香港而家咩都有得賣,超市裡面八成嘅嘢都熟口熟面,所以都無咩購物意慾,而且確實好攰好眼瞓,都係返酒店浸返個溫泉,未夠十一點就已經上床瞓啦!



4 則留言:

  1. 白色嗰碗叫とろろ,日本人經常食,不過香港人好多都麻麻。
    原來封信收到,係兩封信都OK?無postcode都收到?你又咁醒寫哂幾日酒店contact俾佢。
    呢間酒店好正,近沙灘,自助餐又豐富。

    回覆刪除
    回覆
    1. 我唔知第一封佢哋收唔收到,我見你話無postcode可能寄唔到,所以我再查吓,搵到有postcode同聯絡人咪再寄去囉!
      我又諗住佢真係收到但有可能大家都溝通唔到,不如試吓比埋酒店資料佢哋,點知佢哋真係留咗message喺酒店,不過就算佢唔覆,我都會搵酒店職員幫手打去問啊!

      刪除
  2. 嗯,好正嘅日落!酒店都唔錯 。。。最正系有得摘士多啤利! ^.^

    回覆刪除
  3. 係呀!我就係睇中哩間酒店近円月島可以睇日落同近沙灘。
    無錯無錯,知道有得摘士多啤利就真係至高興呀!:)

    回覆刪除