2010年4月15日 星期四

150410 約見電療醫生

今日下就又返醫院見電療醫生,其實咪又係之前化療嗰班醫生,今次約見嘅醫生就係之前好惡嘅女醫生,不過佢今日心情好似幾好,解釋成個電療過程同講解要面對嘅問題都好清楚。

療程將會喺兩至三個星期後開始,但正式開始日子暫未排到,要等電話再通知,而治療期限係六個半星期,一個星期五次,即係三十二至三十三次。所以以我估計應該六月可以完成晒所有療程,但醫生就唔能夠覆實,佢話要睇一切完成後再做評估先決定到,所以哩個都係我一廂情願咁諗囉!不過我相信應該都差不遠啊!                    

          
          

見完醫生等咗個半鐘先輪到我入去設計房做素描同喺身上mark位做模,我突然覺得自己好似一隻就嚟比人宰嘅豬瞓喺張豬肉枱上,任由兩女一男嘅護士喺我身上畫嚟畫去,用紅筆畫線、黑筆紋黑點,紋咗五點真係好鬼痛呀!哩啲黑點唔可以整甩咖!要一直keep到個療程完晒為止!所以沖涼要小心啲啊!去到最後我覺得最尴尬係當上半身畫到大花面後,個男護士話要影返幾張相做記錄,咁我就係喺咁嘅情況吓影咗幾張寫真啊! 影之前每張重好似啲豬咁貼返張有我個名同編號嘅貼紙喺我身上添呀!

                         

      

而家就靜待噚日第六針嘅副作用出現同埋電話通知電療開始嘅日期嘞!

 

P.S. 28/04/2010  

等咗十幾日,醫院重未有電話嚟,真係等到好心急啊!幾時先可以開始啊

   

 

 

23 則留言:

  1. 第一次留言,恭喜你已完成化療,我今天第一針呀,同你一樣淋巴也受感染,打TAC針六次。祝早日康復
     
    [版主回覆04/16/2010 11:34:00]你都要勇敢啲啊! 你要有心理準備過程的而且確會幾辛苦, 但只要開心啲同樂觀啲去面對, 就會順利渡過啊! 而且你要盡量食多啲嘢吸收營養, 咁就可以盡快回復狀態打下一針啊!
    我都祝你早日康復啊!

    回覆刪除
  2. 捱過化療了,恭喜!電療的副作用應該沒有那麼強,妳一定會順利過關的!
    [版主回覆04/16/2010 15:56:00]醫生都話電療唔會嘔, 唔會甩頭髮, 只係電嘅位置會紅腫或者發炎, 至於後面講咗一大堆有可能發生嘅後遺症我已經唔多入腦啦! 總之想快快完成治療就算啦! 多謝你嘅祝福, 我都好有信心會順利過關啊!

    回覆刪除
  3. 哈, 你已經變身成了TOP MODEL , 恭喜 .   你應該和醫院商量一下, 點樣收番D版權費
    [版主回覆04/16/2010 15:57:00]! 咁豬肉檔咪好多o靚模囉!

    回覆刪除
  4. 又走過一關,恭喜,繼續和你打打氣~
    [版主回覆04/16/2010 15:59:00]多謝...多謝! 而家開始跑入直路, 終點在望啊!

    回覆刪除
  5. Shirley :          劃完線仲要影相 , 仲要係男護士添 , 真係尷尬死人咯 ,    點都好啦 , 捱完個療程玩得開心D , 叫做補番數 . 
    Bye Bye !
    [版主回覆04/17/2010 13:58:00]唉! 無計啦! 肉隨針上板上, 我都唔理得咁多, 淨係想快快完成療程就算啦!

    回覆刪除
  6. 文章暢順,思路清晰,証明妳狀態奇佳,努力,光明路就在妳前面。
    [版主回覆04/17/2010 14:02:00]講到文章暢順我邊及小子你吖!  多謝你一直以嚟不斷嘅支持同鼓勵, 終於可以捱過三分二嘅艱苦路, 放心我會繼續努力完成埋哩段正路, 目標在望呀!

    回覆刪除
  7. 電療較化療輕鬆一點 , 不用擔心
    保持開朗愉樂觀的心情 , 一定能戰勝病魔 , 努力加油
    [版主回覆04/17/2010 14:04:00]多謝..多謝! 真係好多謝你一直以嚟嘅支持啊! 我會努力完成埋剩返落嚟嘅療程咖啦! 捱過咗化療, 我對電療都好有信心啊!

    回覆刪除
  8. 加油呀﹐ 神會與妳一直同在。
    [版主回覆04/20/2010 19:02:00]Thank you!! 我會繼續努力啊!

    回覆刪除
  9. 有時間睇下我呢篇blog呀,希望幫到你,努力呀
    http://hk.myblog.yahoo.com/pinkpekkle/article?mid=968
    [版主回覆04/20/2010 19:03:00]你啲經驗對我好有用啊! 真係多謝晒你啊!

    回覆刪除
  10. 身體有冇好d 呢?
    加油...多d 休息及運動啦
    [版主回覆04/25/2010 20:47:00]哩一兩日好好多啦! 啲副作用開始慢慢減退, 不過胃口都係嘛嘛哋, 我諗再過多幾日會好好多啊!
    我會繼續keep住運動咖啦! 多謝晒你啊!

    回覆刪除
  11. 希望副作用不要來太多!希望好健康嚟多D!
    [版主回覆04/25/2010 20:51:00]多謝晒你啊! 我ok呀! 啲副作用開始慢慢減退, 而家係等緊醫院電話睇吓可以幾時開始電療囉! 但等咗個幾星期都未有消息啊!

    回覆刪除
  12. 努力呀!加油!支持你!
    [版主回覆04/29/2010 19:53:00]多謝...多謝!! 我會繼續努力啊!

    回覆刪除
  13. ... ...大家加油支持你... ...
    [版主回覆04/29/2010 19:53:00]多謝晒你啊!

    回覆刪除
  14. Shirley :             足足半個月咯喎 , 咁耐都仲未有消息 , 駛唔駛去問呀 ?  
    Bye Bye !
    [版主回覆05/01/2010 14:50:00]唉! 真係等到好心急啊! 嚟緊嘅星期一要返去抽血, 到時我都諗住去問吓情況啊!

    回覆刪除
  15. 咁抽完血就去了解下囉!
    [版主回覆05/02/2010 11:01:00]係呀! 我聽日抽完血就去問吓究竟重要等幾耐啊!

    回覆刪除
  16. hi,你好嗎?幫我做手術ge係男醫生,有時覆診檢查都會係男醫生,有時都唔理得尷尬啦!最緊要身體快d 好番,祝你早日康復!
    [版主回覆05/02/2010 11:03:00]幫我做手術嘅都係男醫生, 不過硬係覺得比人咁影相法個感覺怪怪囉! 多謝你嘅祝福啊!

    回覆刪除
  17. 祝你快些開始電療,早日康復。
    天氣開始熱啦,可能電療會辛苦D!
    [版主回覆05/03/2010 15:18:00]多謝你啊! 我希望到時唔太熱啦! 但捱過咗化療, 相信電療我應該應付到卦!

    回覆刪除
  18. shirley你好叻女呀! 捱過晒化療, 你咁堅強樂觀, 家人一定會以你為榮, 因你而自豪呀!
    唔好心急啦, 好快就可以開電療, 而家輕鬆下先啦!
    [版主回覆05/03/2010 15:21:00]叻就唔講得  但捱過咗化療就真係令我鬆一口氣, 而家完晒先講吖! 個過程真係幾難頂啊!
    今日返醫院抽血時都問過幾時可以開始電療, 但答案都係返屋企等電話!  真係冇計......

    回覆刪除
  19. 祝早日康復
    [版主回覆05/03/2010 15:22:00]Thank you!!

    回覆刪除
  20. 見這麼久沒有妳的網誌貼上來,正擔心妳是否。。。幸而看到剛才妳回覆網友信息,放心了,祝一切順利!
    [版主回覆05/04/2010 20:23:00]放心..放心! 我重喺到 ! 而家重喺到等緊啊! 今日打咗去醫院追問, 佢話轉頭覆, 但等到收工都未覆到啊! 好似唔多順利咁啊!

    回覆刪除
  21. 0係道就多點出現啦馬,妳唔出BLOG都來探探網友 0丫,等人知妳好好嘛!
    [版主回覆05/05/2010 11:17:00]因為近排電腦壞咗再加上等極都冇消息, 所以冇咩心機咪少咗出現囉!

    回覆刪除
  22. 很可能電腦幫妳,故意罷工,使妳多點休息囉!

    回覆刪除