2010年5月28日 星期五

電療開始啦!(第一至十二次)

1052010 ~ 12052010 (第一至二次電療)

噚日已經開始咗電療!我比預約時間早15分鐘到,我被安排喺哩到嘅七號機做治療。

由於係第一次,所以個治療師好詳細咁講解治療嘅過程,佢話我會喺七號機做二十五次治療,之後會轉去另一部機再做多六至七次就可以完成療程,之後佢就指導我去邊到換衫同擺放用完嘅袍,換好衫就等叫名,都好快啊!等咗幾個字就叫名入去放射治療室。


治療室內有兩個男治療師負責喺我身上度位同調校電療機,另外重一個阿嬸企喺一邊,我好似上次做設計時咁樣瞓上張特別嘅床上。真係有啲緊張呀!


由於係第一次做治療,所以就用多咗時間將定咗位嘅資料輸入電腦,其中一個治療師亦用紅色水筆喺我要放射嘅位置畫咗幾個十字,一切準備就緒治療師同阿嬸就離開治療室,剩返我一個後就可以開機開始治療嘅過程。


由於副射嘅強光會傷眼,所以全程我都係合埋雙眼,只聽到一啲機器嘅聲音,我覺得大概十分鐘,治療師就入嚟話治療完成走得啦! 聽日再返嚟繼續啦!噢!原來都冇咩嘢啫!


治療師話頭兩個星期應該唔會有咩特別唔舒服,所以三星期後先會安排見醫生,而兩星期後電療位置會出現紅腫,到時就要小心處理啊!


             


13052010 ~ 20052010 (第三至七次電療)

電咗七次暫時冇咩特別唔舒服,只係已經唔痛嘅傷口經過幾次嘅電療又開始有啲“咭咭”痛,同埋一向都唔怕熱嘅我,三十幾度都可以唔開風扇,但而家成日都覺得個人好“慶”,問過治療師,佢哋話係正常喎!

本來今日可以做第八次,但啱啱收到醫院電話話今日部電療機壞咗要停一日。 嗱! 咁個療程又拖遲一日啦! 我重諗化療要睇抽血報告所以好難控制, 電療就唔會有哩啲情形, 點知今次唔係我唔得係部機唔得, 真係....... !


唯有當比個傷口休息一吓, 下星期一再繼續啦!

    

    

 24052010 ~ 28052010 (第八至十二次電療)

療程去到三分一啦!被電嘅位置已經出現咗一個淺啡色A4 size大嘅哄,開始有好輕微嘅刺痛,但唔嚴重,暫時情況都尚可以接受。

因為每日接受治療嘅時間通常都一樣,所以喺醫院會遇到幾個排喺我前面或後面嘅病友,大家都會傾吓計交流吓心得,尤其哩個搽唔搽Gel 嘅問題,醫生就一定吩咐咩都唔好搽,但有啲電咗十幾廿次話要喺未紅瘇時就要搽定啲Gel以防發炎或甩皮,又有啲話冇咩事就唔好搽,最初我都唔知搽唔搽好,最後我決定冇咩嘢都係唔搽,因為搽咗又要洗,咁喺洗嘅途中都會產生磨擦,對個傷口都係唔好,所以都係唔好搞咁多嘢嘞!

而家繼續有睇中醫,好多嘢都唔食得要誡口,但自己太為食,一時忍唔住口食咗啲凍嘢,哩兩日隻腳又有少少腫返,而且用手指咁咗落去,啲肉唔識彈返上嚟呀!

(後加:哩張相放咗出嚟之後,因為角度問題,令到好多人都誤會我隻腳真係好腫,其實正面影都只係腳眼有少少腫啫!多謝大家關心,請放心啊!)









變黑咗嘅手指甲就開始退色,慢慢變返粉紅色。

而個光頭亦開始長毛毛啦!但如果要流返以前咁長就有排等啊!一年都唔知得唔得呢?

                     


51 則留言:

  1. 記住著深色衫和高領衫去做呀! 唔係d筆痕會弄污衣服的
    [版主回覆05/13/2010 11:12:00]我哩兩日都係著淺色衫, 都冇留意有冇整咗落件衫到添, 多謝你嘅提點啊!

    回覆刪除
  2. 好順利,有個好開始,加油!
    [版主回覆05/13/2010 11:13:00]多謝...多謝!! 我都希望一切會順利完成啦!

    回覆刪除
  3. 好嘢!好快就 順順利利完成所有療程啦!支持你.
    [版主回覆05/13/2010 11:13:00]多謝你支持啊! 我都希望一切會順利完成啦!

    回覆刪除
  4. 噢!終於開始了耶!
    加油啊!十次打後就會開始有反應了!
    要小心清潔及唔好用普通梘液沖涼啊!
    倒數倒數!好快完成的!努力!為您代禱!
     
    [版主回覆05/13/2010 11:18:00]要電嘅位置我唔敢用梘液, 只係用清水輕輕咁印佢咋! 而且嗰到用咗啲水筆畫咗位, 治療師都講咗唔可以用梘液啊! 係呀! 我已經開始倒數呀! 所以雖然做緊治療, 但心情都相當興奮同輕鬆啊! (可能啲副作用未到所以就得戚呀!)

    回覆刪除
  5. 呀!仲有呀,最後個十次八次,最好有人相伴去,
    因為個身又痛,個人又暈暈地,有人伴會好D,
    用埋盡量快D返屋企,唔好吹風,我奶奶個時話,
    D風吹埋來好辛苦的。
    [版主回覆05/13/2010 11:21:00]Hmm....哩個問題, 要睇到時嘅情況呀! 因為屋企人個個都要返工, 所以冇可能日日都陪我去啊! 不過如果到時真係覺得唔舒服就唯有豪啲咁坐的士返去啦! 不過真係好多謝你嘅提點呀! 等我有啲心理準備呀!

    回覆刪除
  6. 開始了!要提起精神啊!其他Blog友的意見要聽啊!
    [版主回覆05/13/2010 11:22:00]係呀! 終於開始啦! Blog友嘅好嘢緊係要聽啦! 我會照做咖啦! 好多謝你嘅打氣呀!

    回覆刪除
  7. 記得食番D好野呀,電療始終都很有殺傷力的。
    [版主回覆05/14/2010 11:28:00]知道啦! 不過一切要以清淡為主囉!

    回覆刪除
  8. 電療會燥熱,飲多D滋潤湯水,例如蔗水、雪耳湯、萍果雪梨湯咁,加油啊!
    [版主回覆05/15/2010 10:53:00]係呀! 一電完出嚟已經覺得口乾啦! 我帶埋啲蜜糖水去飲囉! 你講哩幾樣都幾喎! 等我都煲吓嚟飲先!

    回覆刪除
  9. 喂, 我回來啦.  真好, 你可以和呢個 "Lucky Seven" 交往廿幾次咁多  . . . .
    我唔會去看薰衣草和太陽菊啦, 會改在9月到Tomamu 看雲海 和小樽看積丹岬的海岸景  一定會帶多D 相回來給大家分享 . . . .比你多一個出發的藉口  
    [版主回覆05/15/2010 16:55:00]點解你可以一年去咁多次旅行咖! 真係羡慕死我啦! 我見你post啲雲海真係好靚呀! 你咁引我法, 以我有限嘅盤川都唔知去得邊到好呀!

    回覆刪除
  10. 唔好以為呢部機威力唔勁,過左14日後,你就知佢厲害喇.....
    [版主回覆05/15/2010 20:32:00]你咁講真係有啲驚啊! 希望到時唔好太差啦!

    回覆刪除
  11. 唔使驚,只不過係皮開肉爛ja. ,比起打化療針,真係濕濕碎啦.
    [版主回覆05/16/2010 11:45:00]淨係「皮開肉爛」哩四個字就已經好得人驚啦! 不過你都講得啱, 比起化療應該哩項我都可以應付得到啊!

    回覆刪除
  12. Shirley, 好多謝寫下電療的過程啊! 我仍未收到消息何時開始電療, 有點緊張! 因為你說過程很快而且沒有打針的痛苦, 哪我不怕了~ 你也要需要太緊張, 有沒有買醫生介紹的gel藥膏來塗抹啊? 加油, 加油! 加多點gel油啊!
    [版主回覆05/16/2010 12:00:00]唔使客氣, 我都等咗三個幾星期先收到電話, 所以你放鬆心情再等吓啦! 可能我真係好驚打針, 所以電療對我嚟講真係冇咁辛苦, 我未買gel呀! 因為暫時醫生同電療師都話唔使搽嘢住, 所以佢哋冇介紹啲咩比我啊! 不過我有個friend佢喺私家醫院電, 佢個醫生就教佢電療後搽啲橄欖油, 如果等損咗先搽嘢就太遲, 我見係醫生嘅見議, 我而家都開始搽少少橄欖油囉! 我見你會電喉嚨位, 可能會辛苦啲啊! 你到時都要小心保重啊! 我哋大家一齊努力, 過埋哩關就可以康復啊! 一於加油....咩油都加多啲!!

    回覆刪除
  13. 哈哈, "一年去咁多次旅行"  . . . .我都只不過系借個位, 成日做"菠蘿雞"  . . . . 遲D等我將D小秘密POST出來大家分享  - - - "最適合單身人士" 的出遊方案, 當然, 小不免要抵吓諗  等我啊  . . . . .
    [版主回覆05/16/2010 18:54:00]啱我呀...!! 我等你呀!

    回覆刪除
  14. Shirley
    ajouter de l'huile
    (It's French)
     
    [版主回覆05/16/2010 22:03:00]知道啦! 我會加油啊! Thank you 呀!

    回覆刪除
  15. Health Beauty Workhsop2010年5月17日 中午12:22

    Hi Shirley
    支持您,也欣賞您這樂觀的面對人生,一切都會順利的,努力加油啊!
    [版主回覆05/17/2010 12:59:00]Thank you!!

    回覆刪除
  16. Shirley :              總算可以開始 , 俾心機捱埋個療程 , 咁就舒服晒 . 
    Bye Bye !
    [版主回覆05/19/2010 11:21:00]係呀! 完埋哩個階段就舒服晒啦!

    回覆刪除
  17. 好欣賞你的樂觀和積極面對。之前一直都好想替你加油,但每次都驗證錯誤,搞到我無晒心機再回應!希望今次會OK啦。加油呀!朋友!
    [版主回覆05/19/2010 11:22:00]多謝你嘅鼓勵呀! 我會加油咖啦! 過埋最後哩個階段, 一切就可以回復正常啊!

    回覆刪除
  18. 身體發"慶" 好正常架,食果凍最好,又消暑又有益,當然係自己整個D,
    唔係現成買個D果凍,最好係用IMPACT整,一舉兩得的!
    加油啊!天氣熱了,您要保持身體乾爽,唔好濕住,
    電到後期要多加注意啊!盡量COTTON,或滑D質地又吸汗的衫啊。
    倒數倒數!
    [版主回覆05/21/2010 17:08:00]你啲資料次次都咁詳盡, 真係多謝晒你呀! 我會照辦咖啦!

    回覆刪除
  19. 轉咗個底啲相,有小小花碌碌呀,不過望真啲,幅幅想都有好的記念回憶,証明你去過唔少地方 (大家一樣),post 出來看,真係好有記念。
     
    關心你電療的位置怎樣。
    [版主回覆05/22/2010 10:51:00]我都覺得有少少花, 但又好似幾得意啊! 而且有一半都喺同你一齊影, 大家嘅回憶啦! 其實個電療位(即手術傷口位)而家有啲"咭咭"痛囉! 治療師話其實我啲傷口表面睇係好似痊癒, 但內部其實係未好晒! 咁而家喺皮膚上面咁電, 會令表皮薄咗, 所以會係有唔舒服嘅感覺, 不過以佢哋睇我暫時都冇咩嘢, 亦唔須要安排見醫生住啊! 由於而家天氣開始熱, 個位置盡量唔可以比佢出汗, 所以而家成日都义住腰囉! 你都知我一向唔怕熱咖啦! 但自從電咗之後就好易出汗, 尤其個頭頂, 好似出煙咁啊! 我諗哩啲都係副作用之一啦! 但比起化療都只係小兒科, 所以放心, 我頂得住啊!

    回覆刪除
  20. 有開始就有結束,好快過的,唔好怕,加油。
    [版主回覆05/22/2010 10:42:00]係呀! 我讚誠「有開始就有結束」, 再過多過多月, 啲衰嘢都會結束啊! 多謝你呀!

    回覆刪除
  21. Add oil!
    [版主回覆05/22/2010 10:41:00]Thank you !!

    回覆刪除
  22. 加油, 努力, 好快有得去旅行了
    [版主回覆05/22/2010 19:16:00]! 多謝...多謝!!

    回覆刪除
  23. 歐羅大跌,可以盤算歐遊路線了!
    [版主回覆05/23/2010 18:04:00]哈...哈! 我都想呀! 等我諗諗先!

    回覆刪除
  24. Shirley,電療是否真的要用紋身mark位呢?
    [版主回覆05/23/2010 18:03:00]係呀! 我比佢紋身五點, 跟住每次電嘅時候再會喺嗰五點上面用紅色水筆畫個小十字, 雖然只喺紋幾點, 但都幾痛咖!

    回覆刪除
  25. 祝 一切順利!
    [版主回覆05/24/2010 19:44:00]I hope so, 多謝晒!!

    回覆刪除
  26. Shirley, 你真係好叻! 繼續努力呀!
    [版主回覆05/25/2010 21:16:00]多謝...多謝啊! 我會繼續努力咖啦!

    回覆刪除
  27. 努力 努力 快d好番 就可以去旅行出旅記啦~~yeah
    [版主回覆05/25/2010 21:19:00]知道啦! 見你同man wai不繼咁出遊記真係好羡慕呀! 我會繼續努力咖啦!

    回覆刪除
  28.   加 油 !   順 順 利 利
    [版主回覆05/25/2010 22:07:00]Thank you!!

    回覆刪除
  29. 差唔多十次羅,可好呢?比心機,倒數啦!
    [版主回覆05/27/2010 19:24:00]係呀! 今日電第11次, 重有20次啊!

    回覆刪除
  30. 近況好嗎?加油啊!
    [版主回覆05/27/2010 19:26:00]ok啦! 係傷口有啲痛, 但重未有紅腫嘅跡象, 暫時情況都可接受, 不過啲內臟就都重好弱囉! 哩範就有排拾啦!

    回覆刪除
  31. Shirley, 我剛到醫院通知星期一, 5月31日開始電療喇! 再次睇你第一次經驗都好似好緊張, 我都係呀! 點算呀? 早上仲要去鄧肇堅上堂, 下午去瑪麗電療, 好緊張呀!! 你寫多d電療護理俾我睇啦! 我依家已經生飛滋, 好怕電療之後仲犀利呀! 點算呀? 仲有一個叫"小車"blog友, 我都有睇佢寫d野, 好驚呀! (娜娜)
    [版主回覆05/28/2010 18:31:00]可以開始啦! 真係恭喜晒啊! 唔使緊張啊! (自己當初都鬼咁緊張呀) 其實同你做設計時差唔多咖咋! 而且時間重短啲, 你只須要瞓上床合埋眼聽住部機郁動嘅聲一陣就會完咖啦! 我用嘅時間大槪六分鐘啦!
    至於護理, 我冇咩特別呀! 我沖涼時會避開電嘅位置, 然後用濕毛布輕輕咁印, 暫時我咩都冇搽, 因為我唔想搽咗嘢又要洗返, 不過中醫教咗我如果真係好乾想搽啲嘢滋潤吓就搽蘆薈, 又天然又易吸收, 搽完吸收咗又唔使洗返。
    不過電完真係好乾, 我一踏出電療室就已經覺得口乾, 所以我袋定枝蜜糖水去, 一出嚟就飲, 喺屋企我都不定咁飲水呀、蜜糖水呀,又煲啲竹庶馬蹄水呀咁囉!
    緊張都會生痱滋咖! 你放鬆啲啦! 勤啲用鹽水"朗"口, 你有冇蘆薈呀? 蘆薈對痱滋都好好咖! 如果有你都試吓啦!
    希望你都一切順順利利呀!! 

    回覆刪除
  32. 嘿 , 今日電第11次, 重有20次啊!  . . . .即系一個月後可以 飛啦  
    [版主回覆05/28/2010 18:07:00]! 係呀! 快啦...快啦!!

    回覆刪除
  33. 為搽咗又要洗,咁喺洗嘅途中都會產生磨擦,對個傷口都係唔好 . . . .  真系醒  要小心感染是這1 個多月的重要課題, 記得帶巾他, 唔好用紙巾呀
    [版主回覆05/28/2010 18:46:00]知道啦! 多謝提點呀! 好彩我唔係一個大汗嘅人 !

    回覆刪除
  34. 記得帶手巾仔, 唔好用紙巾呀   - -  -SORRY 打錯字
    [版主回覆05/28/2010 18:47:00]唔緊要啦! 睇得明咪得囉! 唔使sorry咁嚴重喎!

    回覆刪除
  35. 你隻腳好腫喎!食凍嘢會腫?
    戒口,除咗雞鴨牛羊還要有乜嘢唔食得啊?我每次化療第3天~8天都水腫呢!
    加油~加油啊!好快到家鄉啦!
    [版主回覆05/29/2010 10:40:00]哈...哈! 應該係影相時嘅角度問題, 我喺上面影落去, 所以小腿好似好脹, 其實我只係腳眼位腫脹囉!
    因為凍嘢對啲內臟唔係幾好, 而我自己副"計"又已經差, 食咗落去咪負荷唔到囉! 我諗住食少少唔怕, 點知又衰咗啊!
    而家真係好多嘢唔食得, 除咗你講嗰啲, 重有海鮮、所有菇類、所有豆類都唔食得住, 一切以清淡為主, 少油、少鹽、少糖, 因為我唔係好鐘意食肉, 所以而家通常都係瓜、菜、魚咁囉!
    你水腫其實都係副作用嚟咖! 中醫啲藥傷咗我哋嘅脾令我哋去唔到水, 所以咪有水腫囉!

    回覆刪除
  36. 加油呀! May God Bless U!
    Be Happy ! Be Healthy!!
    [版主回覆05/29/2010 10:40:00]Thank you 啊!

    回覆刪除
  37. 你隻腳真係腫得好犀利,使唔使睇醫生呀! 除咗雞牛羊鴨外,仲有榴槤和蟹都唔好食呀! 所有熱毒嘅嘢都唔可以食,知道嗎?
    [版主回覆05/29/2010 10:44:00]哈...哈! 應該係影相時嘅角度問題, 我喺上面影落去, 所以小腿好似好脹, 其實我只係腳眼位腫脹囉! 我睇緊中醫, 佢開咗藥比我咖啦! 同埋我下星期四電療後要見醫生, 我諗到時我都會同佢講囉!

    我而家通常都係食瓜、菜、魚咁囉! 所以一時忍唔住食咗少少雪糕同雪杷就衰咗咯! 以後都係唔好咁為食啦!

    回覆刪除
  38. 恭喜哦!繼續加油!
    雖然現在頭髮短得像毛毛,將來會鸞鸞地很漂亮很可愛的!
    [版主回覆05/29/2010 10:47:00]多謝...多謝!  我而家見到啲BB, 我就會覺得BB啲頭髮重多過我啊! 真係好有衝動即時除底頂帽同佢哋比一比咖!

    回覆刪除
  39. 祝你早日康復!
    [版主回覆05/29/2010 14:45:00]Thank you!!

    回覆刪除
  40. 努力d!!!!!
    [版主回覆05/29/2010 14:46:00]知道啦! Thank you!!

    回覆刪除
  41. 過多三星期就完成啦!要聽話誡口呀!第日好番,鍾意食乜都得呀!加油!
    [版主回覆05/29/2010 14:46:00]! 知道啦! 以後唔敢啦! 多謝你啊!

    回覆刪除
  42. 您真係要戒戒口,水腫都好辛苦的,行怪怪的。頭髮好快的,我奶奶差不多一年倒生番晒,您咁後生,應該好快的。加油!為您仲有個20 次祈禱!順順利利!一take過!
    [版主回覆05/29/2010 14:48:00]我知道啦! 開頭諗住少少唔怕啦! 但原來真係唔得, 以後唔敢啦!
    多謝你嘅祝福啊!

    回覆刪除
  43. 喂喂,腳咁腫,你係唔係食左好多鹽份既食物丫,
    [版主回覆05/29/2010 20:54:00]冇呀! 而家媽咪煲湯、煮送都唔好少落鹽, 我都冇咩特別嘢食過, 係食咗凍嘢囉! 雪糕同雪杷呀!

    回覆刪除
  44. 隻腳又真係好腫喎! 睡覺時"氈"高雙腳, 可能會好一點的, 加油!!
    [版主回覆05/30/2010 18:07:00]多謝你嘅關心啊! 應該係影相時嘅角度問題, 我喺上面影落去, 所以小腿好似好脹, 其實我只係腳眼位腫脹囉!
    我都有瞓覺時用個枕頭墊高雙腳, 但次次瞓醒個枕頭都係比我踢咗落地下囉!  不過我都會照做啊!

    回覆刪除
  45. Be Strong .... + oil + oil !!
    [版主回覆05/30/2010 18:07:00]Thank you!!

    回覆刪除
  46. 祝 一切順利!  努力!
    [版主回覆05/31/2010 12:13:00]Thank you!!

    回覆刪除
  47. 真係唔容易,倚靠 主,祂、他、她都會陪伴你走每一步路!
    [版主回覆06/01/2010 10:57:00]Thank you !!

    回覆刪除
  48. 加油,默默支持妳!就快就成功
    [版主回覆06/01/2010 10:58:00]多謝你嘅支持啊!

    回覆刪除
  49. 好快就得啦喎,加油!
    [版主回覆06/03/2010 13:06:00]係呀! 做埋今日就重有15次, 好快啦! 多謝晒你呀!

    回覆刪除
  50. 6月27日誠邀您參與!
    (網友團契) 詩歌見證分享聚會:
    I wi l l fol low Him
    「定意跟隨衪」


    希望您能抽到時間出席啦

    回覆刪除
  51. 你真係好勇敢. 祝早日康復!
    [版主回覆06/04/2010 16:19:00]Thank you!!

    回覆刪除