2010年6月21日 星期一

電療開始啦!(第廿三至廿七次)

12062010 ~ 18062010 (第廿三次至廿七次電療)

今個星期又繼續電、電、電。之前醫生講解過我須要做廿五次大範圍嘅電加六次小範圍但重點電。咁啱第廿五次踏正端午嘅假期, 可能醫院方面想我喺假期後開始新嘅療程,所以特別喺端午節假期為我開機做埋大電嘅最後一次。


喺哩部七號機渡過咗個幾月,要同佢say goodbye啦!



完晒頭廿五次後,噚日就被安排上設計室再劃位同埋見醫生,哩個醫生仔一見到就問我之前做手術嘅醫生有冇放啲品件例如一啲鐵釘仔之類嘅嘢喺個瘇瘤位置以作記號。吓!我自己生出嚟嘅多餘嘢都要切咗佢啦!嘜重有可能放返啲釘落去咁恐怖? 


我話冇喎!咁佢好似好愁咁問我記唔記得個瘇瘤位置,講真大槪就記得啫,準確嘅我都唔係好清楚喎!我有底片比佢,嘜唔可以自己睇吓紀錄咩??


後來有個有經驗啲嘅女醫生叫佢去睇片然後研究咗一輪先決定我補電嘅位置,最後落實只須電之前乳房瘇瘤位置,而腋下淋巴位就唔須要再電嘞!咁都好啲,因為淋巴位已經甩晒皮損晒,個傷口已經好痛,如果再電落去真係唔知會點啊!


治療師解釋哩六次電嘅範圍唔再係A4紙咁大, 會細啲,係10cm直徑圓形咁大,但會電得深層次啲喎!


做完設計再等個幾鐘就安排我去四號機做埋最後六次嘅電療



哩部機等嘅時間比之前七號機耐好多,做咗兩次都係要比預約時間遲成個鐘先排到,好彩都只係做多四次,等都係等埋哩四次啫!


可能醫院方面都知哩到等嘅時間比較長,所以等候區都會整得比較舒服啲啊!咁舒服分分鐘等到瞓著覺呀!



 


13 則留言:

  1. 嘿, 七號轉四號. . . . 七四廿八. . . .廿八易發 , 等我幫你買多注六合彩, 中咗最多我做領隊, 你出豉油, 我出雞, 搞個重新開始立山團 . . . .  嘿, 我想去立山, 想到傻咗  anyway, 好快又可以睇到你出發, 努力
    [版主回覆06/18/2010 17:21:00]! 又真係幾好喎! 咁都比你諗到, 犀利!
    立山團, 好啊! 唔只你, 我連發夢都諗住呀! 諗住去旅行、諗住中六合彩呀!  真係諗吓都開心呀!

    回覆刪除
  2. 我睇電視見過乳房手術,拿了腫瘤後會放一塊比手指尾小一點的薄薄鐵片在切除腫瘤的位置,用作電療的位置記號呢,是永久不用取出來的。
    [版主回覆06/18/2010 18:32:00]啊! 嘜原來係咁! 但我自己覺得將啲外來嘢, 而且重係金屬嘅嘢放喺體內都好似唔係咁好啊!

    回覆刪除
  3. 終點在望 !!
    [版主回覆06/19/2010 13:13:00]係呀! 重有四次咋!

    回覆刪除
  4. 斷續努力,就快又可以去玩喇,加油!
    [版主回覆06/19/2010 13:13:00]哈...哈! 我都想呀!

    回覆刪除
  5. 話咁快又電完lu,
    [版主回覆06/19/2010 18:00:00]未呀! 重有四次咖! 不過都快啦!

    回覆刪除
  6. Shirley :           希望快D捱完佢 . 
    Bye Bye !
    [版主回覆06/20/2010 17:48:00]係呀! 重有四次就得啦!

    回覆刪除
  7. 繼續努力呀Shirley! 為你既立山團而努力!
    [版主回覆06/20/2010 17:48:00]哈...哈! 努力..努力呀!

    回覆刪除
  8. 仲有4次好快過! 希望你可以快啲好返!
    [版主回覆06/22/2010 18:44:00]好快..好快啦! 後日就係大功告成日啦! 真係好期待呀!

    回覆刪除
  9. hi你好叻呀,終點在望啦,我還有一針化療之後先電呀!
     
     
    [版主回覆06/22/2010 18:48:00]多謝你呀! 唔只我, 你都好叻啊! 希望你順利打埋最後一針啦! 我之前睇人哋嘅blog, 見佢哋一個又一個完成療程都好羡慕咖! 但不經不覺自己都差不多捱過了。
    完成咗化療後, 跟住嘅療程就會覺得輕鬆好多咖啦!  所以你都要努力、加油呀!

    回覆刪除
  10. 有妳為我打打氣,我會比心機的,起初我想做完化療就由佢,不做電療,但經家人和朋友的鼓勵,和妳們的加油,我會繼續下去的.
    [版主回覆06/22/2010 21:42:00]唔使擔心呀! 你既然都做化療, 咁就唔好放棄做電療啊! 有家人朋友支持你, 要撐落去呀! 你一定得咖! 

    回覆刪除
  11. 我好緊張!!
    想知道電的時候需時要多久...1分鐘.....30秒.....眨眨眼就過是嗎?
     
    [版主回覆06/23/2010 13:43:00]我開頭都好似你咁好鬼緊張啊! 但原來都唔使太擔心啊! 每次嘅過程都只不過係五至六分鐘, 瞓喺到合埋眼過一陣, 我自己聽到機器發出第六吓聲响就完結嘞! 過程全無感覺咖!
    雖然無感覺, 但亦唔好輕視之後嘅護理啊! 因為部機嘅刹傷力都幾犀利, 我喺第十八、九次啲皮膚就可始損, 不過只要小心打理個傷口, 問題都不大啊!  你有咩問題或擔心而家記底先, 到時見醫生同治療師做電療設計時就一次過問晒佢哋啊! 所以你唔使太緊張啊! 放鬆啲就得咖啦!

    回覆刪除
  12. 放心很多了.謝謝妳.
    妳是不是電療前和後也查定cream?
    [版主回覆06/23/2010 17:41:00]大部份病友都會喺醫院到買蘆薈gel搽, 我自己就冇買, 因為驚佢太"立", 我啲皮膚頂唔順。
    之前又醫生叮囑過未有唔舒服前不能搽任何嘢, 不過自己始終唔放心, 於是問返自己中醫, 佢都話最好唔好搽, 但如果真係想做定準備功夫就搽蘆薈, 夠天然對皮膚又好, 咁我屋企有種開蘆薈, 所以就決定搽蘆薈, 差唔多到十四、五次就開始痕, 啱啱要見醫生, 於是就由醫生開藥膏比我搽(隻藥膏你可以睇返之前嗰網誌), 隻藥膏ok咖! 又幾止痕又唔使自己比錢買。最後哩幾次甩皮個傷口有個五蚊咁大, 醫生又開啲消毒藥水比我洗傷口咁囉!
    而家同有買蘆薈gel搽嘅病友比較, 我自己甩皮嘅傷口反而比佢哋細啊!  
    呀! 重有如果到時你覺得好痕、好痕你就用冰袋敷吓會舒服好多啊! 我問過醫生, 佢都話可以咁做咖!

    回覆刪除
  13. Add oil!
    Pray for you.
    [版主回覆06/24/2010 13:04:00]Thank you!!

    回覆刪除