2010年7月5日 星期一

.....休養中

自完成療程後都個幾星期啦!除咗個人好攰,成日都想瞓覺外,大致上都冇太多唔舒服,腋下嘅電療傷口都好得七七八八,而家重淨返最後補電嗰六次嘅位置重有一大個哄未退色。


唔知係咪食咗啲控制荷爾蒙藥,個人總係覺得好眼瞓,所以無時無刻都掛住瞓覺,真係名副其實嘅休養啊!近排天氣好熱,真係好想啲傷口快啲好晒!咁就可以去游水啊!


不過而家啲頭髮都重係好短,每次出街都重要戴帽/假髮,熱到個頭頂出晒煙啊!好有衝動咩都唔戴就行出街,但我諗到時實比人當怪物咁睇呀!



除咗瞓覺外,哩排都忙住幫表妹個仔仔做啲考小學嘅profile,原來而家啲小朋友咁巴弊,為咗考入一間心儀學校,爸爸、媽媽要為佢四出奔波,為咗攞多幾張證書,又去學嘢、又去考試,淨係睇到佢每日嘅schedule都覺得頭痛啊!我哩個電腦白痴冇咩嘢幫到手,只有用我略懂嘅photoshop幫佢做個profile。問過好多人都冇一啲sample比到我參考吓,有嗰啲都好神秘唔比人睇,唯有樣樣都試吓希望啱佢哋心意啦!


做咗幾個封面比佢哋簡                                    內頁資料


 


34 則留言:

  1. 讚下你先
    你個頭好圓...:)
    做人父母都好煩, 又要做晒profile 去sell 喎...唉....
    [版主回覆07/06/2010 20:33:00]嘜唔係個個頭都係圓咖咩??!!  唔係剃咗頭都唔知個頭形係咁咖!
    係呀! 而家做父母真係好艱難啊!

    回覆刪除
  2. 你d頭髮仔好似好靚喎! 好羨慕呀! 我仲係毛仔咋~ 仲有d白頭髮tim, 點算呢?
    [版主回覆07/06/2010 20:35:00]你唔使羡慕呀! 你遲啲都會生得靚咖啦! 我上個月都未有咁密同埋最初出返出嚟時都有白頭髮, 但生生吓就黑返啊! 所以你使擔心啊!

    回覆刪除
  3. 做完咁多療程,對身體的傷害不小,要多多休息,不要逞強啊!
    [版主回覆07/06/2010 20:36:00]知道啦! 多謝晒你嘅關心啊!

    回覆刪除
  4. d頭髮都生得好快喎, 是否化療完後便開始生長呢?
    [版主回覆07/06/2010 20:40:00]係呀! 一完晒化療之後就開始生出嚟, 不過都而家都重未長到可以就咁行出街囉! 真係希望佢生得快啲啊!

    回覆刪除
  5. 相信那些藥不是荷爾蒙,是催睡丸,使妳多點休息,休息是最佳的補藥,因為電療如戰爭,砲火連天,誤殺了很多有用細胞,要有足夠休息去重建被摧毀的城市吧!
    [版主回覆07/06/2010 20:42:00]! 我諗都係啊! 所以我要襯哩個月瞓多啲啊!

    回覆刪除
  6. 加油努力 , 我媽媽患有血癌 , 現正需找尋合適骨髓 .
    [版主回覆07/07/2010 15:00:00]多謝你鼓勵, 我都希望你媽媽可以搵到合適嘅骨髓, 早日康復吧!

    回覆刪除
  7. 好好休息,早日復原!
    [版主回覆07/07/2010 15:01:00]Thank you!!

    回覆刪除
  8. 我嗰時唔駛做化療,電療,但係d 頭髮都甩得好犀利,後來我都剪到好短,不過好快又會長番出來,不用擔心.
    [版主回覆07/07/2010 15:04:00]唔化療都會甩頭髮?? 我以前一向都係長頭髮, 所以而家咁嘅樣真係唔慣, 如果要好似以前咁長, 我諗都要一年時間啊!

    回覆刪除
  9. 你要好好休息...要許地(癌細胞)永不番身...
    [版主回覆07/07/2010 15:05:00]Yeah!! 以後都唔比佢哋再踏足我領土之內呀!

    回覆刪除
  10. 休養過程都好重要架.....好似人地生完仔要好好休養咁,唔使話補咩既,只緊要係保持心境開朗,諗番自己竟然可以平安過渡!跟住大讚自己好勁!好強!好有恩典!記住:「我是最棒的!」唔好再比過去的陰翳繼續蓋住自己,好多人成日諗番以前,點解有病?點解會有?會否復發?等等......
    我相信每一個人生的經歷都有意思,睇您點樣睇,悲觀與樂觀都係一線之差!我奶奶雖然好番,但佢好驚自己會復發,又成日話過去的治療好辛苦,早知就唔醫!  又開始逃避,唔想定期照鼻鏡,唉!有時真係幾擔心!
    好容易新開始!加油!
     
     
    [版主回覆07/07/2010 15:23:00]我啲休養其實只係瞓吓覺, 做吓運動, 食吓嘢, 過一啲嘈豬嘅生活啊!  
    其實復發哩個問題都有擔心咖! 但其實又擔心唔嚟, 連醫生都答唔到個發生嘅機會率有幾高, 而要做嘅療程亦盡力做晒, 咁唯有靠自己以後小心照顧自己, 加強抵抗力同定期檢查, 我都有回想之前做治療嘅過程, 係用嚟警惕自己以後唔可以懶惰啊!
    你奶奶嘅恐懼我好明白, 但檢查唔可以唔做啊! 你多啲同你奶奶傾吓, 氹吓佢啦!

    回覆刪除
  11. SORRY..係好不容易的新開始!加油!
    [版主回覆07/07/2010 15:23:00]唔使sorry喎, 明白咪得囉! 我都成日打錯嘢咖!

    回覆刪除
  12. 你要加油呀!!休息好身體再去玩~支持你呀!!
    [版主回覆07/08/2010 11:16:00]多謝晒你啊!

    回覆刪除
  13. Shirley :            慢慢休生養息啦 ,    "日本" 唔會走去既 , 總之記住大把好日子等住過 . 
    Bye Bye !
    [版主回覆07/13/2010 14:16:00]而家雖然未可以去, 但睇住你嘅遊記都可以頂住引先啊!

    回覆刪除
  14. 嘿, 天氣熱啊 . . . .  還睡得好嗎 ?
    [版主回覆07/13/2010 14:15:00]都ok啦! 因為我一向都唔怕熱, 而家嘅溫度我都重可以唔使開冷氣咖!

    回覆刪除
  15. Long Time No See, 見到您update個Blog,重有精神去幫表妹個仔仔,證明您可以好快好番去旅行了。
    [版主回覆07/13/2010 14:19:00]Hi, 真係好耐冇見喎! 多謝你一直以嚟嘅支持呀!
    我其實係一個電腦白痴, 今次都係盡力而為咋! 但一講到去旅行就真係好精神啊! 希望今年年尾可以飛返轉就好嘞!

    回覆刪除
  16. 嘩   而家嘅溫度我都重可以唔使開冷氣 . . . . 勁   我都系夜晚可以唔開, 日間如果留系屋企上網, 因為是西斜 . . . .  會熱到融 呢   
    [版主回覆07/13/2010 14:33:00]我屋企都係西斜咖! 電腦喺窗邊, 而家啲陽光都曬到手臂啦! 不過有風都ok啦!

    回覆刪除
  17. 恭喜你完成療程呀 ! 我姐姐 6 月中確診乳癌, 6 月 26 做手術, 7 月 30 開始會做化療 (4 個療程 ) 及 25 次電療,醫生話係 2b 期。有標準藥同比錢針藥 ( 加白血球針 ) 兩個選擇。請問有冇咩要留意 ???
    另外佢而家可唔可以食蛋同飲奶架 ?
    仲有 .. 佢有貧血 .. 飲 impact 奶同紅棗圓肉花生衣 ( 定係花生連衣 ) 粗米煲水飲會有效 d 打到針呀 ??
    請幫幫忙 !
     
    [版主回覆07/14/2010 17:19:00]如果你姐姐係打4枝化療針即係未擴散至淋巴, 而我係擴敟咗去淋巴, 所以要打6針同埋電療31次, 我係打3枝AC(免費)+3枝TC($8,084 X 3)
    我本人覺得AC針嘅副作用比TC針辛苦, 至於有咩唔舒服真係因人而議, 而且我唔想嚇親你哋, 最重要係瞓得到, 咁就會比較容易捱過囉! 同埋打咗針就盡量唔好去啲多人嘅地方, 我嗰陣除咗去醫院同樓下公園之外, 我好少出街咖! 而且你姐姐打針時天氣都好熱, 都係唔好四圍走啦!
    打針時你不妨叫你姐姐帶個暖包去, 因為吊針時啲冰冷嘅化療會經手腕嘅靜脈注入, 感覺好冰涼令血管收縮, 有個暖包敷住個手腕會舒服啲同埋等條血管唔好收縮, 之後隻手唔會咁痛啊!
    我因為當時化療時傷口已經埋晒, 所以我照食蛋, 奶就一定有飲啊! 其實有啲人講過化療藥根本就係毒藥, 一打入去已經全身係毒, 所以重使嘜介意食啲咩, 我當時因為白血球唔夠, 所以無論海鮮、牛肉我都有食, 我係冇食雞、鵝、鴨囉!
    我有飲營養奶粉, 但Oral Impact嘅味道我接受唔到, 一飲就嘔, 所以我係飲保康速, 跟住就係花生衣煲紅棗水, 同埋做適量嘅運動咁囉! 六針中第二同三針試過delay一星期, 其餘四針都可以準時打啊!
    另外哩到有好多同路人, 你可以入去請教吓佢哋, 佢哋個個都好好人, 可以同係分享吓佢哋嘅經驗咖!  如果你有問題都可以再搵我啦! 我會盡力幫忙啊!
    希望你姐姐順利完成治療,早日康復啊!
     

    回覆刪除
  18. 個日妳返公司我仲以為妳係 Carey 添, 因為我有近視架, 攰就抖下啦!
    [版主回覆07/16/2010 18:01:00]! 你啲近視都深吓喎! Carey咁靚女, 你點會以為我係佢呀!
    我見到你坐counter, 諗住你坐返埋位先搵你, 點知轉頭又唔記得咗啊!
    我而家日日都瞓幾次覺呀! 都好夠休息啊! 到時返工都唔知點算呀!

    回覆刪除
  19. 攰係正常架,唔使擔心,呢個問題,當年我都有問醫生.
    可以用頭巾,唔係咁焗
    [版主回覆07/20/2010 15:45:00]我希望過多一排冇咁攰, 咁到返工會快啲適應返囉!
    其實我而家啲頭髮都勉強可以見人, 但自己始終唔慣, 而頭巾我又唔係好識用, 所以都係戴住帽先啦!

    回覆刪除
  20. Hi Shirley
    好耐冇上嚟啦, 我返咗工兩個幾星期, 感覺真係好攰好眼瞓,
    所以你如果仲有假, 都係抖耐D至返工呀!
    [版主回覆07/20/2010 15:52:00]我都擔心會做做吓嘢恰眼瞓呀! 我雖然重有假, 但係再放落去都係會感覺攰, 希望返咗工有動力, 有生氣, 咁會快啲回復返以前嘅生活, 唔使成日都好似個病貓咁囉!
    你覺得攰就盡量放工後早啲休息啦! 始終停咗咁耐冇做嘢, 真係要一段時間先可以調效返正常啊! 大家都繼續努力啦!

    回覆刪除
  21. 好耐冇來看你,掛住搬屋、執屋,你要多休息啊!
    [版主回覆07/20/2010 17:00:00]多謝晒你呀! 真係啱嘞! 我正想去你嗰到睇吓你搬屋搬成點, 你就嚟先啊!
    你搞掂晒都好好休息吓啦!

    回覆刪除
  22. 真好耐無上嚟﹐都唔知道妳完成療程添﹐依家係好好休養嘅時候啦﹐唔好太操勞喎。
    [版主回覆07/26/2010 16:46:00]多謝你嘅慰問啊!

    回覆刪除
  23. 多謝你到訪!
     
    在此謹祝你早日康復, 休息多啲呀! 
    [版主回覆07/26/2010 16:46:00]Thank you!!

    回覆刪除
  24. hihi!又要打攪你啦!今日我家姐睇私家的腫瘤科醫生..
    佢有新建議比我家姐!就係...4枝AC...再加4枝T針..即係8枝...
    (QE係4枝TC)!
    電療就同QE一樣..25次.!
    價錢係...化療11萬...電療要8萬..白血球針2萬!共21萬(家姐公司可以包到所有費用)
    問題係....佢話打埋AC會<包抄>好d喎...但係要打多4枝...時間同副作用都會加長...!唉..真係難決定!
    請問有冇意見?
    謝謝!
    [版主回覆07/27/2010 08:18:00]QE醫生曾經同我講過公立醫院唔會同你做多餘嘅嘢, 夠就得咖啦! 但我亦見過有個病友喺QE打完4針AC, 之後佢私家醫生叫佢打多4針TC作保險, 而我自己因為喺浸會同QE都係比出相同嘅方案, 所以就冇咁難做決定。
    我自己覺得如果負擔得到, 我都會選個全面啲嘅方案囉! 因為「復發」對於我嚟講真係好沉重, 所以只要係可以盡量減低「復發」率我都會做。不過哩啲都純屬我自己個人見解, 希望唔會影響咗你哋嘅決定。
    至於時間方面就真係無辦法啦! 要double, 不過如果喺私家醫生到做治療會比QE準啲, 因為佢哋會幫你打白血球同補血針(當病人唔達標時), 但QE只會延遲直到病人回覆到要求為止, 所以好多時比預期都會遲咗!
    希望你家姐唔好擔心太多, 選擇咗自己適合嘅方案後可以安心治療, 早日康復啊!
     
     
     

    回覆刪除
  25. 我都係叫Shirley. 現在等候電療統治,想請問你在哪裏中醫調理呢?現在心情有啲緊張

    回覆刪除
    回覆
    1. Shirley,你好。電療過程相對比化療輕鬆好多,所以你盡量放鬆心情地等待及接受療程,咁對你嘅病情會比較好,因為不竟癌症起因其中一環係負面情緒同埋緊張心情。
      我當時係喺鰂魚涌養正堂陳曉明醫生調理身體,都睇上咗兩年,但佢都係見意我搵一個適合自己運動持久去做先係正確面對病發嘅方法,因佢佢話比我食得落去嘅藥,無論係唔係補品都三分毒,靠自己增加抵抗力先係最好。
      所以我近兩年幾經介紹練緊氣功,加強自己抵抗力,亦大大改變咗自己身體狀況。
      希望你能正面地面對療程,時時保持住喜樂嘅心情,祝你早日康復,以後健健康康。😘😘😘

      刪除
  26. 多謝Shirley, 我會加油。我想問問你荷爾蒙藥係喺電療療程前食定開始左電療療程食?

    回覆刪除
    回覆
    1. 作者已經移除這則留言。

      刪除
    2. 醫生喺我電療開始後第一次覆診就開荷爾蒙藥,但我聽好多人講話做緊電療其實都唔係太適宜同時食藥,咁我就等到電療完晒先開始食,都係差廿幾日。開頭話話食五年,後來話要食十年,所以而家我重食緊啊!😅😅

      刪除
  27. 多謝,我都想電療後先開始食賀爾蒙藥。你好快就完哂食藥療程,好快就10年喇恭喜晒你。你食緊荷爾蒙藥有沒有什麼反應?,除咗眼瞓之外。感恩及好開心見到你去了那麼多地方,影多D靚相。

    回覆刪除
    回覆
    1. 荷爾蒙藥反應係最初係攰、心悸,跟住令我提早收經,再嚟眼比同齡人同出現老花,因為啲藥傷肝臟,肝臟會反影喺眼睛,最大問題係啲骨提早退化,所以背痛、腰痛,要去睇脊醫治療,不過我哩兩年幾經脊醫介紹學咗氣功,套功法日日練幫我減少咗身體痛楚,減慢咗退化速度,連停咗五、六年嘅經期都嚟返。
      其實食所有藥都有一定負作用,而運動都係一種增強自我保護力嘅方法,你完咗治療休息過後,不妨搵一種啱自己又鐘意嘅運動持久地做,咁對我哋哩啲抗癌病人會有好大幫助,自己健康要靠自己啊!
      我哋一齊加油努力💪💪💪

      刪除
  28. 多謝你咁快答覆及鼓勵。係,自己健康要靠自己的努力,如果你吾介意想問你套氣功是什麼名字?我也會在完成療程後努力運動,一起加油💪

    回覆刪除
    回覆
    1. 我學緊白雁氣功,裡面有套回春功係主要調脊堆同內分泌都好好。
      你可以上Youtube打白雁氣功就會有好多片係關於這個氣功,每個星期三頭條日報都有登有關養生嘅文章,不妨睇吓。
      祝你早日康復呀!😄😄

      刪除