2010年9月11日 星期六

兩日一夜長洲游

之前好多人都話好返後打算會去邊到玩呀?幾時飛呀?暫時都未得住,或者十月尾啦!不過好耐以前已經好想入去長洲玩吓住吓,而且今年未去過沙灘玩,所以放咗兩日假,全家入去長洲住返晚啊!


我哋搭十點九嘅船,咁啱係快船,所以十一點四已經到嗱!





由碼頭行去酒店要經過好多買手信同海味嘅地方,B女媽咪同大笨蛋就不繼咁比哩啲舖頭吸引住,所以行嚟去都重係條大街上。



由於正值正午時份,真係好熱,所以都冇咩心機影相啊!最後我哋都係食埋晏先向酒店進發。


途經兩間B & B,我都有睇過佢哋啲相,其實都係一個唔錯嘅選擇,不過內裡環境會感覺局促咗啲。



以前讀書時都有嚟過東堤小築,不過而家就冇諗過book哩到啊!



終於行到出嚟沙灘啦!




沙灘好靜呀!冇咩人游水啊!緊係啦!咁鬼曬,想變燒豬咩!



哩隻魚船撐開晒啲爪,好似隻蟹啊!



見到酒店啦!





個門口似酒樓多過似酒店呀!



我哋被安排住三樓,唔知係咪我要求兩張床,所以間房嘅裝飾就普通啲,因為我之前去酒店嘅網頁睇過啲房嘅擺設比哩間新同靚,不過我自己冇咩所為,最重要緊係有個海景露台啊!



浴室設備都OK,之前有睇過一啲BLOG話浴室企缸去水好差,但我哋用浴缸就冇哩個問題啊!



由於我哋係五個人,所以其中一間房要加床。



哩個無敵大海境真係睇極都唔厭啊!



因為真係太曬,我哋落唔到去沙灘住,所以就去泳池游住先!



玩咗一個鐘到,就返上房沖個涼然後去返大街食下午茶。


酒店有個細細嘅燒烤場免費提供比住客用,不過食物、飲品自備。



哩間甘永泰喺長洲好出名咖!佢嘅魚蛋係人氣之選啊!


B女買咗哩條係一啲煙肉包住啲生菜紅蘿蔔絲,都幾好味啊!



魚蛋、四寶丸、炸豆卜魚肉



跟住去咗一間專賣北海道產品嘅店舖 - 富良野



喺長洲都掛住買日本嘢呀!哈..哈..哈!連薯條先生我都買到呀!真係開心啊!



買完嘢,B女見富良野嘅老闆娘食緊碗芝麻糊好正,就問人喺邊到買,咁老闆娘就介紹咗我哋去一間叫開心甜品店,哩間舖都好多人幫襯啊!佢哋嘅芒果最出名,不過我唔好啊!


芒果豆腐花、蕃薯芋頭西米涼粉、蛋白杏仁茶、紫米糖不甩



食飽飽係時候返酒店換衫去沙灘游水嗱!


返到去開始日落啦!



游到七點天都黑啦!又返上房沖涼然後去食飯。



普普通通咁食咗一個晚飯



跟住就沿住沙灘漫步返酒店,雖然唔係一對情人咁行沙灘咁浪漫,但一家人咁行都幾溫馨吖!



當晚成晚都行雷、閃電,後來重落起大雨,但估唔到瞓醒一覺,天氣又唔錯啊!


五點九起身個天都好光嗱!不過間房嘅位置睇唔到日出啊!



早晨嘅長洲



六點幾個天就光晒,嗱嗱聲換衫落去游水啊!


咁早已經有人游緊嗱!



我都唔客氣啦!



游完水先返上房沖涼,然後去酒店嘅中菜部飲茶,其實我哋可以選擇喺房嘅露台享用一個美式早餐,但我爸爸每朝都要飲早茶,而酒店嘅早餐卷又可以轉中式,由一份美式早餐改為兩籠點心,咁我哋五個人就有十籠點心,都唔錯啊!


食完早餐,喺酒店附近行咗陣,又返酒店沖個涼瞓一陣,十二點check out離開,雖然只係短短玩咗兩日,不過感覺好舒服、玩得好開心啊!尤其可以隨時落去沙灘玩,真係好寫意啊!下次有假又再去玩過。


32 則留言:

  1. 哈哈, 長州都系一個唔錯的熱身方法  仲可以游幾次水. . . . 狀態很好啊.  不過是相片問題嗎? 你的薯條先生 顏色有點淡. . . .
     
    [版主回覆09/11/2010 22:05:00]我真係幾鐘意長洲啊!狀態都ok啦!不過玩得攰得制,返到屋企瞓咗大半日啊!
    因為影張相嘅時候間房啲燈光好暗,所以我將佢校光咗啲,引至啲顏色淺咗囉!

    回覆刪除
  2. Shirley :          好呀 ~   
    出去行 , 好過屋企度 "磨爛蓆" , 支持妳 !  
    Bye Bye !
    P.S. : 話時話 "長洲" 我都好似未去過 . 
    [版主回覆09/12/2010 10:27:00]真係多謝你支持啊!以前我放假好鐘意躲喺屋企,不過坐咗「八個月監」之後,而家放假通常都會去做啲戶外活動啊!
    長洲真係一個幾舒服嘅地方,兩三日假去玩吓都幾好,我見梅窩都有間酒店環境唔錯,下次又去試吓先得啊!

    回覆刪除
  3. 去長洲買北海道既野,好似一日去左兩個景點丫.哈哈.
    [版主回覆09/12/2010 10:27:00]哈...哈!因為我人在香港,心在日本啊!

    回覆刪除
  4. 長州好耐冇去過,我都唔係好認得d地方,
    魚旦,糖水美食好吸引,流哂口水.
    [版主回覆09/12/2010 10:28:00]長洲真係好多美食,帶多兩個肚去都唔掂呀!你有機會返嚟嘅時候不妨去住返一、兩日吖!

    回覆刪除
  5. 好耐冇去長洲玩啦,長洲海灘好靚啊!
    [版主回覆09/12/2010 10:31:00]我對海灘真係情有獨鐘呀!我可以對住佢咩都唔做,聽海浪聲聽成日咖!
    哈...如果嗰陣打化療時搬入嚟住,日日對住個海個人係咪會舒服啲呢?

    回覆刪除
  6. 一家人好溫馨!
    [版主回覆09/13/2010 20:44:00]係呀! 唔錯啊!我見你有都一家人去玩好開心啊!

    回覆刪除
  7. 一家人去度假很温馨呀! 有機會我都去長洲玩吓先。
    復工後身體應付到嗎? 很開心一切都回復正常
    [版主回覆09/13/2010 20:48:00]係呀! 一家人去玩真係幾開心啊!
    返咗工都個幾月都習慣啦! 而且同事都安排啲輕鬆嘅工作比我, 所以都唔辛苦啊!

    回覆刪除
  8. 早晨 Shirley!華威酒店有無敵大海景,真係好正!
    [版主回覆09/13/2010 20:48:00]我就係睇中個無敵海景, 我對住佢可以對足半日都得咖!

    回覆刪除
  9. Shirley妹, 好開心啊! 長洲在你的拍攝中走出世外桃源似的, Shirley你會把事物美好的一面跟我們分享, 好羨慕! 看了你的悠閒, 你的講解, 令我心動, 希望在頭髮再多長出時走去逛逛, 謝謝Shirley你的悉心介紹!
    [版主回覆09/13/2010 20:57:00]我影啲相都係嘛嘛! 我見過人哋影嗰啲好靚咖!因為平時我好鐘意去睇吓人哋四周圍去, 自己就好似跟當時人一齊去玩一樣, 所以亦希望睇我個blog嘅人都可以一樣好似一齊去玩咁啊! 好開心係你感受到哩個感覺啊!
    嗰陣我都諗唔知幾時啲頭髮可以見人, 但轉眼佢哋就一枝枝咁生出嚟, 而家都生長得唔錯, 所以你都好快可以咩都唔需要戴四周圍去咖啦! 到時就係你影啲靚相比我睇嗱!  我都等緊你講...「我畢業啦! 可以做返個正常人嗱!」開心啲, 繼續努力呀!

    回覆刪除
  10. 去一次長洲可以拍到咁多靚相,相信你是一個對周圍事物睇得好正面的人,觀察細微,懂得欣賞和珍惜,把美麗的東西拍下,好欣賞你啊!我雖然對長洲好喜愛,但沒有你那種觀察入的細心,下次去長洲時都要放慢腳步,細心觀察,慢慢欣賞及拍下靚的圖片而且要去你曾去過的地方.你有信仰嗎?送首歌給你聽.<object width="500" height="405"><param name="movie" value=" http://www.youtube.com/v/Srpz1-wA03Q?fs=1&amp;hl=zh_TW&amp;color1=0x5d1719&amp;color2=0xcd311b&amp;border=1"></param><param name="allowFullScreen" value="true"></param><param name="allowscriptaccess" value="always"></param><embed src=" http://www.youtube.com/v/Srpz1-wA03Q?fs=1&amp;hl=zh_TW&amp;color1=0x5d1719&amp;color2=0xcd311b&amp;border=1 " type="application/x-shockwave-flash" allowscriptaccess="always" allowfullscreen="true" width="200" height="145"></embed></object>
    [版主回覆09/14/2010 07:44:00]我係一個天主教徒, 讀書時都有喺聖堂唱choir, 不過緊係唔叻嗰個啦! 首歌好好聽呀! 多謝晒你啊!

    回覆刪除
  11. 太好了,有美食有美景,仲有摯愛親朋一齊玩
    我都係剛剛去完長洲,唔知係米平日關係,乜都無開,
    原來有薯條先生買,唔知係邊到買的,要$,
    看看能否為了薯條先生及紅豆餅再去過
    不過你有無食過紅豆餅,ok嗎(在巨型薯片隔離)
     
    [版主回覆09/16/2010 07:02:00]原來你都剛剛去完返嚟, 我哋嗰日都係平日, 好多之前見過嘅舖同樣冇開, 所以紅豆餅都試過呀!
    薯條先生喺一間叫富良野嘅舖頭買, 佢嗰到好多北海道嘅特產賣咖! 詳細地址你睇哩條link吖!  http://hk.myblog.yahoo.com/furano_cc/article?mid=39

    回覆刪除
  12. 先恭喜妳一切回復往昔!
    看來「華威酒店」多得妳唔少喇,0甘落力介紹佢。房租如何?
    [版主回覆09/17/2010 21:00:00]多謝...多謝!!
    房租(2人)HKD720一晚包一個早餐, 唔算太抵, 不過諗住同媽咪、爸爸去, 住渡假屋或B & B唔係幾好, 所以貴少少都住酒店囉! 而且我鐘意露台個大海景呀! 

    回覆刪除
  13. 我成世人都係去過長洲三四次, 全部day trip, 除咗一次成斑同學去瞓沙灘.
    你今次成家人一齊睇晒長洲日景夜景, 日出日落, 好幸福呀!
    其實南丫島都唔錯o架, 冇長洲咁多人咁嘈, 我試過住2晚, 好relax.
    [版主回覆09/20/2010 19:34:00]聽你咁講, 等我下次都去南丫島試吓先得啊!

    回覆刪除
  14. Wish you all the best... enjoy...
    [版主回覆09/22/2010 07:25:00]Thanks Bear Bear, 祝你中秋節快樂呀!

    回覆刪除
  15. Shirley :
    祝你們一家 中秋節快樂  

    [版主回覆09/22/2010 17:55:00]多謝晒你呀, 小肥! 我都希望你有個快樂中秋啊!

    回覆刪除
  16. 前年我同老公慶祝結婚週年都係入住華威酒店的呀! 
    記得翌日早上,當我望出沙灘,竟睇到沙灘上有一個寫着I Love You! 嘅心心哩!
    祝你中秋節快樂!
    [版主回覆09/22/2010 18:01:00]嘩...咁個心係咪你老公送比你呀! 如果係又真係幾浪漫同難忘啊!
    我都希望你有個快樂嘅中秋節啊!

    回覆刪除
  17. 中秋節快樂!
    [版主回覆09/22/2010 18:01:00]大家咁話啦!

    回覆刪除
  18.  
     
      祝 中 秋 節 快 樂 !~YEAH~
     
     
    [版主回覆09/22/2010 18:01:00]多謝阿耀, 我都希望你有個快樂中秋節啊!

    回覆刪除
  19. Shirley :             中秋節快樂 ~  
    大把節目啦 . 
    Bye Bye !
    [版主回覆09/23/2010 07:46:00]多謝...多謝!! 係呀! 我大把節目呀! 十點幾就約咗周公一齊大事慶祝一番呀!

    回覆刪除
  20. 中秋節快樂
    [版主回覆09/29/2010 16:10:00]Thank you!! gc

    回覆刪除
  21. Shirley, 你番工之後有冇感覺力不從心呀?  疲倦?  ...前日老闆同我食午飯, 因為我仲放緊病假, 佢問我幾時番工, 我覺得有D壓力呀! 點算呀?
    [版主回覆09/29/2010 16:31:00]Hi, 娜娜, 可能老闆、上司都就住我, 所以我暫時都唔覺得有力不從心嘅感覺, 不過比起以前就真係大不如前, 個人嘅反應同記憶都差咗好多, 表面睇重好似好精靈, 但一病起上嚟就不堪一擊, 我星期日半夜開始發燒, 星期一朝即刻去睇醫生都燒到103度, 一燒重要燒幾日, 今朝都重有少少燒未退晒呀!
    估唔到而家自己啲抵抗力真係咁差, 我以前真係唔會咁咖! 哩啲都係我哋控制唔到, 力不從心嘅一種啊! 所以你都唔好比壓力自己急於返工呀! 要抖夠先呀! 你唯有同你老闆講未得返得住, 而且醫生都會開假比你, 唔係你唔想返, 只係真係冇咁嘅能力嘛!

    回覆刪除
  22. Shirley :           發燒 ~ 唔好掛 .   
    多休息 ~ 多飲水 , 祝早日康復 . 
    Bye Bye !
    [版主回覆10/01/2010 20:16:00]多謝你嘅關心啊! 噚日朝早終於退晒燒, 但啲咳同鼻水都未清, 所以要繼續食藥, 真係食都手軟腳軟, 而且啲藥令個人昏昏欲睡, 今個假期都係同周公為伍啊!

    回覆刪除
  23. Shirley,
    你退咗燒未呀?昨晚得悉你發燒,心很不安;但為你及為娜娜禱告後,心裡立時很平安,相信父神一定會醫治你地嘅。好好保重! 切記唔好食咁多甜食啊! 因為癌症係以糖為食。(詳情可參考" 自然就會抗癌--罹癌醫師的科學觀點 "一書。
    願主看顧你!
    [版主回覆10/01/2010 20:22:00]多謝你嘅關心同祈禱啊! 噚日朝早終於退晒燒, 但啲咳同鼻水都未清, 所以要繼續食藥。以前哩啲咁嘅感冒邊使睇醫生, 拍兩粒感冒藥瞓一覺就冇事, 估唔到今次搞到咁大, 103度我真係未試過, 重要燒幾日真係幾攞命, 唔認身體差咗都唔得, 所以大家都要保重啊!
    我而家都好少食甜嘢咖啦! 因為我都有睇過你講嗰啲資料, 但間唔中去玩一次半次就會有囉!

    回覆刪除
  24. 謝到訪 myblog! 祝你身體健康, 繼續開心遊歷的日子!
    [版主回覆10/04/2010 20:40:00]多謝你嘅祝福啊!

    回覆刪除
  25. 好久都沒有上YAHOO BLOG 了,這幾天天氣都比較涼,要小心身體!
    [版主回覆10/04/2010 20:41:00]Hi, 真係好耐冇"見", 多謝你嘅關心同慰問呀! 真係好窩心啊!

    回覆刪除
  26. 天氣轉涼,加點衣裳
    Take Care
    [版主回覆10/07/2010 20:38:00]我知道嗱! 多謝你嘅關心啊!

    回覆刪除
  27. 你好! 祝你身體健康 ! 工作順利 !
    [版主回覆10/11/2010 07:17:00]Thank you!!!

    回覆刪除
  28. 雖然只係去長洲﹐但能夠開開心心同家人一齊玩兩日﹐已經係好滿足啦﹐無需介意去邊到﹐希望妳繼續保持住這份開心嘅心情﹐享受每一天。
    [版主回覆10/11/2010 07:19:00]係呀! 其實去邊、好唔好玩、開唔開心都好睇個人自己嘅心態, 我自己只一家人一齊有得玩咁就開心嘞!

    回覆刪除
  29. 十月尾啦! 決定飛邊道未呀 ?
    [版主回覆10/11/2010 07:22:00]小肥真係好記性啊! 同屋企人商量過, 因為今次一行十人, 太多人嗱! 所以會跟團去台中玩幾日咋! 不過因為有兩家人(同亞姨一家)一齊去好難得, 所以都好期待今次嘅旅程啊!

    回覆刪除
  30. hihi  好耐無上來了  知道你成功戰勝病魔 真係好開心丫~~不過都要休息多d 養番好過身體呀  .
    長洲 我 n 年無去過啦~~~有機會都想去渡下假 1  ,  2 天 廿 正
    等你個日本遊記咖  我今年轉左工無假 無錢 無得去旅行啦  等睇你個個咖啦  哈哈
    [版主回覆10/11/2010 07:29:00]多謝你嘅慰問啊!
    轉咗工未攞得假住咪儲吓彈藥先囉! 到時可以攞假嘅時候就可以重鎚出擊呀!
    我嘅日本遊記.....今日應該成行唔到嗱! 哩個月尾會同屋企人去台中玩幾日, 由於成十個人一齊去, 重有幾個老人家, 所以都係跟團咋! 日本...我就希望出年可以去睇櫻花囉! 不過都要睇吓出年啲假點安排先得啊!

    回覆刪除
  31. 哈哈, 跟團去台中都系一個幾好的選擇, 台中人熱情率直, 小食又和台北的有點不同風味. .  .. 好啊.  我09年也是和家人一起跟團去過台北, 現在也很回味1家人的快樂 . .. .  你們也要玩得開心點呀  呀, 會看農場嗎 ? 如果會飲花茶, 蜂蜜/蜂膠的, 你要留心不要隨便試呀  
    [版主回覆10/11/2010 20:55:00]會呀! 我哋會去農場咖! 多謝你提點呀! 我會記住唔好亂咁試啊!

    回覆刪除
  32. Wonderful...nothing better than that!!  a sweet family trip !!
    Hey Shirley, expecting to have a lunch or dinner with you and LoLo....really long long time no see ar !!
    [版主回覆10/12/2010 21:42:00]我幾時都得閒啊! 不過Lo Lo要上堂同趕assignment好忙, 咁等我問吓佢再覆你吖!

    回覆刪除