2010年11月4日 星期四

馬不停蹄 兩日一夜盤龍峽 (上)

30/10/2010 星期六      
   

啱啱去完台中,抖咗一日,又出發去盤龍峽嗱!哩次係參加公司搞嘅 Annual Tour,一行二百人,旅行社要派出五個領隊 + 五個導遊 + 五輪旅遊巴嚟接待我哋。

早上七點鐘喺中港城集合,點晒名,齊集晒人之後就搭八點半船去順德港。兩個鐘頭嘅船瞓個覺就到咗。

上咗碼頭就坐咗兩個鐘頭車去到七星岩,食個午飯又繼續上路。差不多四點多先去到第一個景點 ~ 金林水郷




一落旅遊巴,就有四個八至十歲嘅妹妹仔走過嚟,佢哋同我哋啲導遊都好熟,佢哋係向遊客賣薰衣草,為咗多啲人幫襯佢哋,佢哋會充當小導遊,一路帶領我哋遊水鄉,一路講解佢哋嘅風俗習慣,連我哋個導遊都話佢好專業,就嚟飯碗都比佢搶埋呀!


不過佢又真係好口齒伶俐,又唔會好hard sell,所以氹到我哋好多同事幫襯佢啊!





哩啲紅頭雞係好意頭喎!摸吓雞頭就好運同長命百歲,好運就唔拒,但一聽到長命百歲就嚇到個個都唔敢掂佢呀!


跟住我哋就坐哩啲木伐遊池塘一周。




我哋實在太多人嗱!佢哋得六隻木伐,每隻只可以坐十二人,所以先到先坐。





哩到都幾寧靜啊!


去到池塘中央,有個台有啲人喺到唱歌表演。如果你覺得高興可以入錢落個紅色箱到,但唔係強制性,我見我哋好似無人放入去啊!






開始黃昏嗱!




上返岸就行吓啲舖頭,哩到啲豆腐花好出名,我嚟之前都諗住會食,點知原來旅行社包埋,唔使我哋自己比錢。




真係好香、好滑呀!


哩到係製酒嘅地方。








哩啲酒好核突呀!


好多同事識飲咗啲糯米酒話好飲,好多都買返一、兩枝,我唔識飲亦都唔飲,所以唔啱我啊!


哩啲花生就唔錯,大笨蛋(我細妹)都買咗包呀!




日落西山嗱!


離開金林水鄉後,就繼續向盤龍峽進發。差不多六點鐘先去到目的地呀!







原本行程寫明住賞星閣,每間房都有個天窗觀星,但我哋實在太多人,二百人即係要一百間房,所以觀星閣、賞星閣同埋唔知咩星閣都住晒,分到咩房就咩房,睇吓好唔好彩,我哋就緊係.....唔好彩。


我諗住住哩隻咖!




最後被分配住哩種,重要係樓下。


間房只有個對住大路嘅露台,所以要拉埋窗簾,如果唔係做咩都比人望晒呀!


未入嚟住對哩到好有期望,但一入房就好失望,開晒啲燈都昏昏暗暗,牆紙甩晒出嚟,五個電制得兩個有電到,水口頭好似就快甩出嚟咁呀!只係開咗三年到,啲嘢就殘成咁,真係.....無奈!

放低晒啲嘢就落餐廳食飯。 二十圍枱,我坐一號呀!因為都係一般團體餐,而且無咩特別,所以都無影相啊!


食完飯就睇民族表演,但因為個場地係喺一個露天嘅草地上,當晚溫度得十一度,我企咗一陣已經頂唔住返去房嗱!






由導遊安排,我哋訂咗隻雞做宵夜,因為係鄉下地方,佢講明係走地雞,所以我都食咗少少。


味道唔錯啊!細細隻咁,大笨蛋自己都可以食到一隻呀!


食飽飽就上床瞓嗱!

                                                                                 .....續 (31/10/2010)


3 則留言:

  1. 真係開心呀!又有得去玩.
    這木伐好得意呀!坐上去你驚唔驚呀?

    [版主回覆11/08/2010 07:29:00]去玩又真係幾開心啊! 哩啲木伐都幾穩陣咖! 所以我唔驚啊! 反而覺得幾得意呀!

    回覆刪除
  2. 但一聽到長命百歲就嚇到個個都唔敢掂佢呀!
    哈哈 ~  因為香港人工作得太辛苦啦 (我覺得)  ~
    另外我覺得旅行時酒店房間係好重要 ~ 哈哈(個人感受)  !!
    [版主回覆11/10/2010 20:30:00]我身邊啲朋友話哩個唔係祝福, 係咀咒喎!
    哩間酒店都係五星咖! 不過佢嘅保養就差咗啲, 所以就嘛嘛哋囉!

    回覆刪除
  3. 宜家好少有公司有annual tour, 雖然是返大陸玩, 但都ok啊!
    [版主回覆11/16/2010 21:42:00]我哋公司年年都有搞, 如果可以就到三日紅假, 試過搞去泰國添呀! 不過嗰年我抽唔到囉!  近近哋又平平哋都ok咖!

    回覆刪除